FOOD POISON 🥗തൃശ്ശൂരിലെ ഹോസ്റ്റലിൽ ഭക്ഷ്യ വിഷബാധ,നൂറോളം നഴ്സിംഗ് വിദ്യാർത്ഥിനികൾ നിരീക്ഷണത്തിൽ

തൃശ്ശൂർ: നഴ്സിംഗ് വിദ്യാർത്ഥികൾ താമസിക്കുന്ന തൃശ്ശൂരിലെ ഹോസ്റ്റലിൽ ഭക്ഷ്യ വിഷബാധ. ആളൂർ സ്നേഹോദയ കോളേജ് ഓഫ് നഴ്സിംഗ് ഹോസ്റ്റലിലാണ് സംഭവം. വയറ്റിളക്കവും ഛർദിയും ഉണ്ടായതോടെ നൂറോളം നഴ്സിംഗ് വിദ്യാർത്ഥിനികൾ നിരീക്ഷണത്തിലാണ്. ഈ മാസം 26 ന് വൈകിട്ടാണ് കുട്ടികൾക്ക് ദേഹാസ്വാസ്ഥ്യം ഉണ്ടായത്.  ഭക്ഷ്യസുരക്ഷാ വകുപ്പ് സാമ്പിളുകൾ ശേഖരിച്ച് പരിശോധനയ്ക്ക് അയച്ചിരിക്കുകയാണ്.

ഭക്ഷ്യവിഷബാധയെ തുടർന്ന് ലക്കിടി ജവഹർ നവോദയ സ്‌കൂളിലെ എഴുപതോളം വിദ്യാർത്ഥികൾ ചികിത്സയിൽ. ഛർദ്ദിയും വയറുവേദനയും അനുഭവപ്പെട്ടതിനെ തുടർന്നാണ് കുട്ടികളെ ആശുപത്രിയിൽ പ്രവേശിപ്പിച്ചത്. സ്ഥാപനത്തിലെ ജീവനക്കാർക്ക് ആരും കുഴപ്പമില്ല. ജവഹർ നവോദയ സ്കൂളിൽ അഞ്ഞൂറോളം വിദ്യാർത്ഥികളാണ് താമസിച്ച് പഠിക്കുന്നത്. ഭക്ഷ്യവിഷബാധയുടെ കാരണം പരിശോധിച്ച് വരികയാണ്.

ഞായറാഴ്ച 58 വിദ്യാർത്ഥികളും തിങ്കളാഴ്ച രാവിലെ 12 വിദ്യാർഥികളുമാണ് ചികിത്സ തേടിയത്. ശാരീരിക അസ്വാസ്ഥ്യങ്ങളോടെ വൈത്തിരി താലൂക്ക് ആശുപത്രിയിൽ പ്രവേശിപ്പിച്ച ഭൂരിഭാഗം വിദ്യാർഥികളും നിലവിൽ ചികിത്സയിൽ തുടരുകയാണ്. കടുത്ത ഛർദ്ദിയും, വയറുവേദനയും അനുഭവപ്പെട്ട കുട്ടികളെയാണ് വൈത്തിരി താലൂക്ക് ആശുപത്രിയിൽ പ്രവേശിപ്പിച്ചത്.

ഞായറാഴ്ച രാത്രി ഒമ്പത് മണി മുതലാണ് കുട്ടികൾക്ക് ശാരീരിക അസ്വാസ്ഥ്യങ്ങൾ അനുഭവപ്പെട്ടു തുടങ്ങിയത്. തിങ്കളാഴ്ച രാവിലെയും കുട്ടികൾ ചികിത്സ തേടിയെത്തുന്നുണ്ട്. എഴുപതോളം പേർ ഇതുവരെ ചികിത്സ തേടിയതിൽ 10 പേർ തിരികെ പോയിട്ടുണ്ട്. മറ്റുള്ളവർ നിരീക്ഷണത്തിലാണ്.