ട്രിച്ചിയില്‍ തൃഷ സ്ഥാനാര്‍ത്ഥി? നിര്‍ണായക തീരുമാനവുമായി വിജയ്‌

ചെന്നൈ: തമിഴ്‌നാട് നിയമസഭാ തിരഞ്ഞെടുപ്പിൽ അപ്രതീക്ഷിത വിജയമാണ് വിജയ്‌യുടെ പാർട്ടിയായ ടിവികെ സ്വന്തമാക്കിയത്. 107 സീറ്റുകളുമായി കന്നിയങ്കത്തിൽതന്നെ അവർ ഏറ്റവും വലിയ ഒറ്റകക്ഷിയായി. മത്സരിച്ച രണ്ട് സീറ്റിലും വിജയ് വിജയിച്ചു. പെരമ്പൂരിലും ട്രിച്ചി ഈസ്റ്റിലുമാണ് നടൻ ജനവിധി തേടിയത്. പെരമ്പൂരിൽ 53715 വോട്ടുകളുടെ ഭൂരിപക്ഷം നേടിയപ്പോൾ ട്രിച്ചി ഈസ്റ്റിൽ 27000-ത്തിൽ അധികം ഭൂരിപക്ഷവും നേടി. ഇതോടെ 14 ദിവസത്തിനകം ഏതെങ്കിലും ഒരു സീറ്റിലെ എംഎൽഎ സ്ഥാനം വിജയ് രാജിവെയ്‌ക്കേണ്ടി വരും. അങ്ങനെയാണെങ്കിൽ ആ സീറ്റിലെ ഉപതിരഞ്ഞെടുപ്പിൽ ആര് മത്സരിക്കും എന്നതാണ് ചർച്ചാവിഷയം.

പെരമ്പൂർ നിലനിർത്താനാണ് വിജയ് താത്പര്യപ്പെടുന്നത് എന്നാണ് പ്രാദേശിക മാധ്യമങ്ങൾ റിപ്പോർട്ട് ചെയ്യുന്നത്. ഇതോടെ ഉപതിഞ്ഞെടുപ്പ് വന്നാൽ ട്രിച്ചി ഈസ്റ്റിൽ നടി തൃഷയെ ടിവികെ സ്ഥാനാർഥിയാക്കുമെന്നും റിപ്പോർട്ടുകളുണ്ട്. ഇതുസംബന്ധിച്ച് ടിവികെയിൽ നിന്ന് ഔദ്യോഗിക സ്ഥിരീകരണം ഇതുവരെ വന്നിട്ടില്ല. വോട്ടെണ്ണലിന്റെ തുടക്കത്തിൽ ടിവികെ ലീഡ് നേടിയപ്പോൾ തൃഷ വിജയ്‌യുടെ ചെന്നൈ നീലാങ്കരയിലെ വീട്ടിലെത്തിയിരുന്നു. തലേദിവസം തിരുപ്പതി ക്ഷേത്രത്തിലെത്തി തൃഷ പ്രാർഥിക്കുകയും ചെയ്തിരുന്നു. മെയ് നാലിന് തൃഷയുടെ 43-ാം പിറന്നാൾ കൂടിയായിരുന്നു.

ഈ ചർച്ചകൾക്ക് പിന്നാലെ തൃഷയുടെ പഴയൊരു വീഡിയോയും സോഷ്യൽ മീഡിയയിൽ വൈറലായി. എന്താണ് ആഗ്രഹം എന്ന് തൃഷയോട് ചോദിക്കുമ്പോൾ അടുത്ത പത്ത് വർഷത്തിനുള്ളിൽ തമിഴ്‌നാട് മുഖ്യമന്ത്രി ആകാൻ താൻ ആഗ്രഹിക്കുന്നു എന്നാണ് നടി മറുപടി നൽകുന്നത്.

തമിഴ്‌നാട് തിരഞ്ഞെടുപ്പിനിടെ തൃഷ-വിജയ് ബന്ധവും എതിരാളികൾ ആയുധമാക്കിയിരുന്നു. വിജയ് യുടെ ഭാര്യ സംഗീത നൽകിയ വിവാഹമോചന ഹർജിയിൽ വിവാഹേതര ബന്ധം എന്ന ആരോപണം തൃഷയെ ഉദ്ദേശിച്ചാണെന്ന് റിപ്പോർട്ടുകളുണ്ടായിരുന്നു. ഇരുവരും ഒരു വിവാഹ ചടങ്ങിൽ ഒരുമിച്ചെത്തിയതും ചർച്ചകൾക്ക് ആക്കം കൂട്ടി.ഗില്ലി എന്ന ചിത്രത്തിലെ പാട്ട് പശ്ചാത്തലമാക്കിയാണ് തൃഷ വോട്ട് ചെയ്തശേഷമുള്ള ചിത്രം സോഷ്യൽ മീഡിയയിൽ പങ്കുവെച്ചത്. ഇതും ചർച്ചകൾക്ക് വഴിയൊരുക്കി.

Following TVK’s massive victory in the Tamil Nadu elections, speculation is rife that actress Trisha Krishnan might contest from the Trichy East constituency. Since Vijay won in both Perambur and Trichy East, he is required to resign from one seat within 14 days, and reports suggest he prefers to retain Perambur. Trisha’s recent visit to Vijay’s residence and a viral old video where she expressed a desire to become CM have fueled rumors about her political debut in the upcoming by-election.