ചെല്ലാനം ഹാർബറിൽ തീപ്പിടുത്തം; രണ്ട് ഫൈബർ വള്ളങ്ങളും ഒരു പെട്ടിക്കടയും കത്തിനശിച്ചു

കൊച്ചി: ചെല്ലാനം ഫിഷിങ്ങ് ഹാർബറിലുണ്ടായ തീപിടിത്തത്തിൽ രണ്ട് ഫൈബർ വള്ളങ്ങളും ഒരു പെട്ടിക്കടയും പൂർണ്ണമായും കത്തിനശിച്ചു. ഹാർബറിലെ പുലിമുട്ടിന് സമീപം വൻ നാശനഷ്ടമാണുണ്ടായത്.

ഹാർബറിനോട് ചേർന്നുള്ള പുലിമുട്ടിന് സമീപം ഉണങ്ങിയ ഇലകൾക്ക് തീപിടിച്ചാണ് അപകടം ആരംഭിച്ചത്. പിന്നീട് തീ അതിവേഗം ആളിപ്പടർന്ന് സമീപത്തുണ്ടായിരുന്ന രണ്ട് ഫൈബർ വള്ളങ്ങളിലേക്കും ഒരു പെട്ടിക്കടയിലേക്കും വ്യാപിക്കുകയായിരുന്നു.

വിവരമറിഞ്ഞയുടൻ സംഭവസ്ഥലത്തെത്തിയ ഫയർഫോഴ്സ് സംഘം തീയണക്കാനുള്ള ശ്രമങ്ങൾ തുടരുകയാണ്. തീപിടിത്തത്തിന്റെ കാരണം സംബന്ധിച്ച് ഇതുവരെ വ്യക്തമായ വിവരങ്ങൾ ലഭ്യമല്ല. സംഭവത്തെക്കുറിച്ച് വിശദമായ അന്വേഷണം ആരംഭിച്ചിട്ടുണ്ട്.