കൊച്ചി: മഞ്ഞുമ്മല് ബോയ്സ് നിര്മാതാക്കളുടെ അക്കൗണ്ടുകള് മരവിപ്പിക്കും. പറവ വിതരണ കമ്പനികളുടെ അക്കൗണ്ടുകളും മരവിപ്പിക്കും. കള്ളപ്പണം വെളുപ്പിച്ച കേസിലാണ് നടപടി. കഴിഞ്ഞ ദിവസം കേസുമായി ബന്ധപ്പെട്ട് നിര്മാതാക്കളെ ചോദ്യം ചെയ്തിരുന്നു. സൗബിന് ഷാഹിര്, ഷോണ് എന്നിവരെയാണ് ചോദ്യം ചെയ്തത്.
7 കോടി രൂപ അരൂര് സ്വദേശിയില് നിന്നും വാങ്ങുകയും പിന്നീട് ലാഭവിഹിതം നല്കാതിരിക്കുകയും ചെയ്ത പശ്ചാത്തലത്തിലാണ് നടപടി. ചോദ്യം ചെയ്യലിന്റെ അടിസ്ഥാനത്തിലാണ് പറവ ഫിലിംസിന്റെ അക്കൗണ്ട് മരവിപ്പിക്കണമെന്ന് ആവശ്യപ്പെട്ട് നിയമോപദേശം തേടിയത്. അതിലാണ് ഇപ്പോള് നടപടി വന്നത്.
കഴിഞ്ഞ അഞ്ചുവര്ഷത്തിനിടയില് കേരളത്തില് പ്രദര്ശന വിജയം നേടിയ മുഴുവന് സിനിമകളുടെയും സാമ്പത്തിക വിവരങ്ങള് ശേഖരിക്കാന് ഇ.ഡി ഒരുങ്ങുന്നുണ്ട്. സിനിമകളുടെ നിര്മാണച്ചെലവു സംബന്ധിച്ച വിവരങ്ങളും ശേഖരിക്കാനാണു നീക്കം. ‘മഞ്ഞുമ്മല് ബോയ്സ്’ സിനിമയുടെ ലാഭവിഹിതം പങ്കുവയ്ക്കുന്നതുമായി ബന്ധപ്പെട്ട തര്ക്കങ്ങളാണു കള്ളപ്പണം വെളുപ്പിക്കല് നിരോധന നിയമപ്രകാരമുള്ള (പിഎംഎല്എ) ഇ.ഡിയുടെ കേസിന് അവസരം ഒരുക്കിയത്.