തിരുവനന്തപുരം∙ റിസോര്ട്ട് വിവാദത്തിലെ പാര്ട്ടി അന്വേഷണ വാര്ത്തകളോട് പ്രതികരണവുമായി ഇടതുമുന്നണി കണ്വീനര് ഇ.പി.ജയരാജന്. തനിക്കെതിരെ ആരും ഒരു ആരോപണവും ഉന്നയിച്ചിട്ടില്ലെന്ന് ഇ.പി പറഞ്ഞു. സാമ്പത്തികമായി താൻ തെറ്റായ നിലപാട് സ്വീകരിച്ചെന്ന് ആരും എവിടെയും പറഞ്ഞിട്ടില്ല. കേരളത്തിന്റെ മുഖ്യമന്ത്രി പറയുന്നതു പോലെ മടിയിൽ കനമുള്ളവനേ ഭയപ്പെടേണ്ടതുള്ളൂ, എനിക്ക് ഭയമില്ല.
ഞാൻ ശരിയായ നിലപാടേ സ്വീകരിക്കാറുള്ളൂ. ഞാൻ ജനങ്ങൾക്കു വേണ്ടി ഒരുപാട് കാര്യങ്ങൾ ചെയ്യാറുണ്ട്. നാടിന്റെ ക്ഷേമത്തിനായി ഒട്ടനവധി കാര്യങ്ങൾ ചെയ്യുന്നുണ്ട്. ഇനിയും ആ ദൗത്യങ്ങൾ നിർവഹിച്ചുകൊണ്ടേയിരിക്കും. വാർത്തകൾ സൃഷ്ടിക്കുകയും പ്രചരിപ്പിക്കപ്പെടുകയും ചെയ്യുന്നു. എവിടെനിന്നാണ് വാർത്തകൾ വരുന്നതെന്നും ആരാണ് സൃഷ്ടിക്കുന്നതെന്നും മാധ്യമങ്ങൾ കണ്ടെത്തണമെന്നും അദ്ദേഹം പറഞ്ഞു. എല്ലാ കാലത്തും ഇത്തരം പ്രചാരണങ്ങൾ തനിക്കെതിരെ ഉണ്ടായിട്ടുണ്ടെന്നും അദ്ദേഹം പറഞ്ഞു.
ഇ.പി.ജയരാജനെതിരായ റിസോര്ട്ട് വിവാദത്തില് പാർട്ടി അന്വേഷണമില്ലെന്ന് സിപിഎം സംസ്ഥാന സെക്രട്ടറി എം.വി.ഗോവിന്ദൻ ഇന്ന് അറിയിച്ചിരുന്നു. വിവാദം മാധ്യമസൃഷ്ടിയാണെന്ന് അദ്ദേഹം പറഞ്ഞു. സിപിഎം സംസ്ഥാന കമ്മിറ്റിയിൽ ഒന്നര മാസം മുൻപാണ് സംസ്ഥാന സമിതി അംഗം പി.ജയരാജൻ, ഇ.പിക്കെതിരെ ആരോപണം ഉന്നയിച്ചത്.
ഇ.പി.ജയരാജന്റെ ഭാര്യ പി.കെ.ഇന്ദിരയ്ക്കും മകൻ പി.കെ.ജയ്സനും പങ്കാളിത്തമുള്ള കണ്ണൂരിലെ വൈദേകം ആയുർവേദ റിസോർട്ടിനു പിന്നിലെ ധനസമാഹരണവും വിനിയോഗവും സംബന്ധിച്ച ഗുരുതര ആരോപണങ്ങൾ ഡിസംബറിൽ ചേർന്ന സംസ്ഥാന കമ്മിറ്റിയിലാണ് പി.ജയരാജൻ ഉന്നയിച്ചത്. ആ യോഗത്തിൽ ഇ.പി. പങ്കെടുത്തിരുന്നില്ല. തുടർന്ന് സംസ്ഥാന കമ്മിറ്റിയിൽതന്നെ മറുപടി പറയാൻ കേന്ദ്രകമ്മിറ്റി അംഗമായ ഇപിയോടു സംസ്ഥാന സെക്രട്ടേറിയറ്റ് നിർദേശിക്കുകയായിരുന്നു.