സന്ദേശം സിനിമ മലയാളികളുടെ മനസ്സിൽ എന്നും ചേർന്ന് നിൽക്കുന്ന ഒന്നാണ്. അതിലെ ഹിറ്റ് ഡയലോഗുകൾ നിത്യജീവിതത്തിൽ ഉപയോഗിക്കുന്നവരും ഏറെയാണ്. അക്കൂട്ടത്തിലൊന്നാണ് ‘പോളണ്ടിനെ പറ്റി ഒരക്ഷരം മിണ്ടരുത് ’. ഇതാ ആ ഡയലോഗ് ഇപ്പോൾ വീണ്ടും വൈറലാക്കിയിരിക്കുകയാണ് വിനീത് ശ്രീനിവാസൻ. അതും അങ്ങ് പോളണ്ടിൽ പോയി പറഞ്ഞ്.
പോളണ്ടിൽ പോയപ്പോൾ അച്ഛന്റെ ഡയലോഗുള്ള ടീഷർട്ട് ധരിച്ച് ‘മിണ്ടരുത്’ എന്ന് വ്യക്തമാക്കിയാണ് ഫോട്ടോ എടുത്തിരിക്കുന്നത്. ടിഷര്‍ട്ട് നല്‍കിയതിന് ആര്‍.ജെ മാത്തുക്കുട്ടിയാണെന്നും വിനീത് ശ്രീനിവാസന്‍ പോസ്റ്റിൽ പറയുന്നുണ്ട്. ഇനി നിക്കരാഗ്വയിൽ എന്ത് സംഭവിച്ചുവെന്ന് നോക്കൂവെന്ന് ഉപദേശിക്കുന്നവരെയും കമന്റ് ബോക്സിൽ കാണാം.
‘പോളണ്ടിനെ പറ്റി ഒരക്ഷരം മിണ്ടരുത്’ സന്ദേശം സിനിമയിലെ പ്രഭാകരന്‍ കോട്ടപ്പള്ളിയെന്ന ആര്‍ഡിപിക്കാരന്‍റെ പ്രശസ്തമായ ഈ ഡയലോഗ് മലയാളികള്‍ അത്രപെട്ടന്ന് മറക്കില്ല. ഒരേ വീട്ടില്‍ എതിര്‍ പാര്‍ട്ടിക്കാരനായ സഹോദരനുമായി തര്‍ക്കിക്കുന്ന ഈ രംഗങ്ങളിലെ ശ്രീനിവാസന്‍റെയും ജയറാമിന്‍റെയും പ്രകടനം പ്രേക്ഷകരെ ഒന്നടങ്കം പൊട്ടിച്ചിരിപ്പിച്ചിരുന്നു. സത്യന്‍ അന്തിക്കാട് സംവിധാനം ചെയ്ത് ശ്രീനിവാസന്‍ എഴുതിയ സന്ദേശം പൊള്ളയായ രാഷ്ട്രീയ കോമാളിത്തരങ്ങളെ ആക്ഷേപ ഹാസ്യത്തിലൂടെ തുറന്നുകാട്ടിയ ചിത്രമായിരുന്നു.
ഗായകനായി സിനിമ ലോകത്ത് എത്തിയ വിനീത് പിന്നീട് നടന്‍, സംവിധായകന്‍, തിരക്കഥാകൃത്ത്, നിര്‍മ്മാതാവ് എന്നീ നിലകളിലും തന്‍റെ കഴിവ് തെളിയിച്ചു കഴിഞ്ഞു. പ്രണവ് മോഹന്‍ലാലിനെ നായകനാക്കി വിനീത് ശ്രീനിവാസന്‍ ഒരുക്കിയ ഹൃദയം കഴിഞ്ഞ വര്‍ഷത്തെ മികച്ച ഹിറ്റുകളിലൊന്നായി മാറി.