RAJNI🎞️’രജനികാന്തിന്റെ പേരോ ശബ്ദമോ ചിത്രമോ ഉപയോഗിക്കരുത്’; കർശന നടപടി എന്ന് അഭിഭാഷകൻ

ചെന്നൈ:തമിഴ് സൂപ്പര്‍താരം രജനികാന്തിന്റെ പേര്, ചിത്രം, ശബ്ദം അനുമതിയില്ലാതെ ഉപയോഗിക്കരുതെന്ന് നടന്റെ അഭിഭാഷകൻ. അദ്ദേഹത്തിന്റെ വ്യക്തമായ സമ്മതമില്ലാതെ ഇവ വാണിജ്യപരമായി ചൂഷണം ചെയ്യുന്നവർക്കെതിരെ സിവിൽ, ക്രിമിനൽ നടപടി സ്വീകരിക്കുമെന്ന് അഭിഭാഷകൻ അറിയിച്ചു.

‘ഇന്ത്യൻ സിനിമയിലെ, പ്രത്യേകിച്ച് ദക്ഷിണേന്ത്യൻ സിനിമയിലെ ഏറ്റവും പ്രശംസ നേടിയ നടന്മാരിൽ ഒരാളാണ് രജനികാന്ത് എന്ന ശിവാജി റാവു. കഴിഞ്ഞ ഏതാനും പതിറ്റാണ്ടുകളായി വിവിധ ഭാഷകളിലായി നിരവധി സിനിമകളിൽ അഭിനയിച്ചിട്ടുള്ള അദ്ദേഹത്തിന് വലിയ പ്രശസ്തി ഉണ്ട്.

ഒരു നടൻ എന്ന നിലയിലും മനുഷ്യനെന്ന നിലയിലും അദ്ദേഹത്തിന്റെ സ്വഭാവം കൊണ്ടും അദ്ദേഹത്തെ ലോകമെമ്പാടുമുള്ള ദശലക്ഷക്കണക്കിന് ആരാധകർ ‘സൂപ്പർസ്റ്റാർ’ എന്ന് വിളിക്കുന്നു. സിനിമാ വ്യവസായത്തിലുടനീളമുള്ള അദ്ദേഹത്തിന്റെ ആരാധകവൃന്ദങ്ങളുടെ ബഹുമാനവും സ്നേഹവും വാക്കുക്കൾക്ക് അതീതമാണ്. അദ്ദേഹത്തിന്റെ പ്രശസ്തിക്കോ വ്യക്തിത്വത്തിനോ എന്തെങ്കിലും കേടുപാടുകൾ സംഭവിച്ചാൽ അത് എന്റെ കക്ഷിക്ക് വലിയ നഷ്ടമുണ്ടാക്കും’, അഭിഭാഷകൻ അറിയിച്ചു.

വിവിധ കമ്പനികൾ അവരുടെ ഉൽപ്പന്നങ്ങൾ വിൽക്കാൻ നടന്റെ പേര്, ശബ്ദം, ചിത്രം, ഫോട്ടോ, കാരിക്കേച്ചർ ചിത്രം തുടങ്ങിയവ ദുരുപയോഗം ചെയ്യുന്നതായി ശ്രദ്ധയിൽപ്പെട്ടതായി അറിയിപ്പിൽ പറയുന്നു. നടന്റെ മുൻകൂർ അനുമതിയില്ലാതെ ഇത്തരം അനധികൃത ചിത്രങ്ങൾ ഉപയോഗിക്കുന്നത് വഞ്ചനയക്ക് തുല്യമാണ്.

രജനികാന്തിന്റെ വ്യക്തിത്വം, പേര്, ശബ്ദം, പ്രതിച്ഛായ എന്നിവയും അദ്ദേഹവുമായി ബന്ധപ്പെട്ട മറ്റ് സ്വഭാവ സവിശേഷതകളും വാണിജ്യപരമായി ഉപയോഗിക്കാനുള്ള അവകാശം രജനികാന്തിന് മാത്രമാണെന്നും അനുമതിയില്ലാതെ മറ്റാർക്കും അവ ഉപയോഗിക്കാൻ കഴിയില്ലെന്നും നോട്ടീസിൽ അറിയിച്ചു.