IPL 🏏കലമുടച്ച് സൺറൈസേഴ്‌സ് ഹൈദരാബാദ്,തുടർച്ചയായ രണ്ടാം വിജയവുമായി ഡൽഹി

ഹൈദരാബാദ്: വാശിയേറിയ പോരാട്ടത്തില്‍ ഡല്‍ഹി ഏഴ് റണ്‍സിന് ഹൈദരാബാദിനെ തകര്‍ത്തു. ഡല്‍ഹി ഉയര്‍ത്തിയ 145 റണ്‍സ് വിജയലക്ഷ്യത്തിലേക്ക് ബാറ്റേന്തിയ ഹൈദരാബാദിന് നിശ്ചിത ഓവറില്‍ ആറുവിക്കറ്റ് നഷ്ടത്തില്‍ 137 റണ്‍സെടുക്കാനേ സാധിച്ചുള്ളൂ.

34 റണ്‍സെടുക്കുകയും രണ്ട് വിക്കറ്റ് വീഴ്ത്തുകയും ചെയ്ത അക്ഷര്‍ പട്ടേലാണ് ഡല്‍ഹിയുടെ വിജയശില്‍പ്പി. അവസാന ഓവറില്‍ ഒന്‍പത് റണ്‍സ് പ്രതിരോധിച്ച് പന്തെറിഞ്ഞ മുകേഷ് കുമാറും വിജയത്തില്‍ നിര്‍ണായക പങ്കുവഹിച്ചു. ഡല്‍ഹിയുടെ തുടര്‍ച്ചയായ രണ്ടാം വിജയമാണിത്.

145 റണ്‍സ് വിജയലക്ഷ്യവുമായി ബാറ്റിങ്ങിനിറങ്ങിയ സണ്‍റൈസേഴ്‌സിന് തുടക്കത്തില്‍ തന്നെ ഹാരി ബ്രൂക്കിനെ നഷ്ടമായി. ഏഴ് റണ്‍സെടുത്ത താരത്തെ ആന്റിച്ച് നോര്‍ക്യെ ക്ലീന്‍ ബൗള്‍ഡാക്കി. പിന്നാലെ വന്ന രാഹുല്‍ ത്രിപാഠിയെ കൂട്ടുപിടിച്ച് ഓപ്പണര്‍ മായങ്ക് അഗര്‍വാള്‍ മികച്ച പ്രകടനം പുറത്തെടുത്തു. ഇരുവരും ചേര്‍ന്ന് ടീം സ്‌കോര്‍ 50 കടത്തി.

എന്നാല്‍ ടീം സ്‌കോര്‍ 69-ല്‍ നില്‍ക്കേ മികച്ച ഫോമില്‍ കളിച്ചുകൊണ്ടിരുന്ന മായങ്ക് പുറത്തായി. 39 പന്തില്‍ നിന്ന് 49 റണ്‍സെടുത്ത താരത്തെ അക്ഷര്‍ പട്ടേല്‍ പുറത്താക്കി. പിന്നാലെ ക്രീസില്‍ നിലയുറപ്പിച്ചുനിന്ന രാഹുല്‍ ത്രിപാഠിയെ (15) പുറത്താക്കി ഇഷാന്ത് ശര്‍മ സണ്‍റൈസേഴ്‌സിനെ തകര്‍ച്ചയിലേക്ക് തള്ളിയിട്ടു. പിന്നാലെ വന്ന അഭിഷേക് ശര്‍മ (4) വീണ്ടും നിരാശപ്പെടുത്തി. കുല്‍ദീപാണ് താരത്തെ പുറത്താക്കിയത്.

അഭിഷേകിന് പകരം വന്ന നായകന്‍ എയ്ഡന്‍ മാര്‍ക്രത്തിനും പിടിച്ചുനില്‍ക്കാനായില്ല. വെറും മൂന്ന് റണ്‍സെടുത്ത താരത്തെ അക്ഷര്‍ ക്ലീന്‍ ബൗള്‍ഡാക്കി. ഇതോടെ സണ്‍റൈസേഴ്‌സ് 69 റണ്‍സിന് ഒരു വിക്കറ്റ് എന്ന നിലയില്‍ നിന്ന് സണ്‍റൈസേഴ്‌സ് 85 ന് അഞ്ച് വിക്കറ്റ് എന്ന സ്‌കോറിലേക്ക് കൂപ്പുകുത്തി. ആറാം വിക്കറ്റില്‍ ഹെന്റിച്ച് ക്ലാസനും വാഷിങ്ടണ്‍ സുന്ദറും ക്രീസിലൊന്നിച്ചു.

ഇരുവരും ചേര്‍ന്ന് ടീം സ്‌കോര്‍ 100 കടത്തി. സുന്ദറിനെ കൂട്ടുപിടിച്ച് ക്ലാസന്‍ അടിച്ചുതകര്‍ത്തു. ഇതോടെ അവസാന രണ്ടോവറില്‍ വിജയലക്ഷ്യം 23 റണ്‍സായി ചുരുങ്ങി. സുന്ദര്‍ മികച്ച പിന്തുണയാണ് ക്ലാസന് നല്‍കിയത്. 19-ാം ഓവറെറിഞ്ഞ നോര്‍ക്യെ അപകടകാരിയായ ക്ലാസനെ മടക്കി. 18 പന്തില്‍ 31 റണ്‍സെടുത്ത ക്ലാസനെ അമന്‍ ക്യാച്ചെടുത്ത് പുറത്താക്കി. ഇതോടെ സണ്‍റൈസേഴ്‌സ് പ്രതിരോധത്തിലായി. എന്നാല്‍ സുന്ദര്‍ മറുവശത്ത് നിന്ന് ശക്തമായി തിരിച്ചടിച്ചു.

മുകേഷ് കുമാര്‍ ചെയ്ത അവസാന ഓവറില്‍ 13 റണ്‍സാണ് സണ്‍റൈസേഴ്‌സിന് വേണ്ടിയിരുന്നത്. ആദ്യ പന്തില്‍ സുന്ദര്‍ രണ്ട് റണ്‍സ് നേടി. എന്നാല്‍ രണ്ടാം പന്തില്‍ മുകേഷ് റണ്‍സ് വഴങ്ങിയില്ല. മൂന്നാം പന്തില്‍ സുന്ദറിന് ഒരു റണ്ണാണ് നേടാനായത്. നാലാം പന്തില്‍ യാന്‍സണും ഒരു റണ്‍ മാത്രമാണ് നേടാനായത്. ഇതോടെ രണ്ട് പന്തില്‍ 9 റണ്‍സായി വിജയലക്ഷ്യം. അഞ്ചാം പന്തിലും സുന്ദറിന് സിംഗിളെടുക്കാനേ സാധിച്ചുള്ളൂ. ഇതോടെ ഡല്‍ഹി വിജയമുറപ്പിച്ചു. അവസാന പന്തില്‍ യാന്‍സണ് റണ്‍സെടുക്കാനായില്ല. ഇതോടെ ഡല്‍ഹി ഏഴ് റണ്‍സിന്റെ വിജയം നേടി. അവസാന ഓവറില്‍ മികച്ച പ്രകടനം പുറത്തെടുത്ത മുകേഷ് കുമാറാണ് ഡല്‍ഹിയുടെ വിജയശില്‍പ്പി.

ഡല്‍ഹിയ്ക്ക് വേണ്ടി അക്ഷര്‍ പട്ടേലും ആന്റിച്ച് നോര്‍ക്യെയും രണ്ട് വിക്കറ്റ് വീതം വീഴ്ത്തിയപ്പോള്‍ ഇഷാന്ത് ശര്‍മയും കുല്‍ദീപ് യാദവും ഓരോ വിക്കറ്റ് വീതം സ്വന്തമാക്കി.

ആദ്യം ബാറ്റുചെയ്ത ഡല്‍ഹി 20 ഓവറില്‍ ഒന്‍പത് വിക്കറ്റ് നഷ്ടത്തില്‍ 144 റണ്‍സെടുത്തു. കണിശതയോടെ പന്തെറിഞ്ഞ സണ്‍റൈസേഴ്‌സ് ബൗളര്‍മാരാണ് ഡല്‍ഹിയെ ചെറിയ സ്‌കോറിലൊതുക്കിയത്.

ടോസ് നേടി ബാറ്റിങ് ആരംഭിച്ച ഡല്‍ഹിയ്ക്ക് ആദ്യ ഓവറില്‍ തന്നെ ഓപ്പണര്‍ ഫില്‍ സാള്‍ട്ടിനെ നഷ്ടമായി. അക്കൗണ്ട് തുറക്കുംമുന്‍പ് താരത്തെ ഭുവനേശ്വര്‍ കുമാര്‍ പുറത്താക്കി. പിന്നാലെ വന്ന മിച്ചല്‍ മാര്‍ഷ് ആക്രമിച്ച് കളിക്കാന്‍ തുടങ്ങിയതോടെ ഡല്‍ഹി സ്‌കോര്‍ കുതിച്ചു. ഓപ്പണര്‍ വാര്‍ണറും കൂടി ചേര്‍ന്നതോടെ ഡല്‍ഹി 4.3 ഓവറില്‍ 39 റണ്‍സിലെത്തി. എന്നാല്‍ 15 പന്തില്‍ നിന്ന് 25 റണ്‍സെടുത്ത മാര്‍ഷിനെ നടരാജന്‍ വിക്കറ്റിന് മുന്നില്‍ കുടുക്കിയതോടെ ഡല്‍ഹിയുടെ സ്‌കോറിങ് വേഗം കുറഞ്ഞു.

പിന്നാലെ വാര്‍ണറും (21) നാലാമനായി വന്ന സര്‍ഫ്രാസ് ഖാനും (10) അമന്‍ ഹക്കിം ഖാനും (4) പെട്ടെന്ന് പുറത്തായതോടെ ഡല്‍ഹി 62 ന് അഞ്ച് എന്ന സ്‌കോറിലേക്ക് കൂപ്പുകുത്തി. ആറാം വിക്കറ്റില്‍ ഒന്നിച്ച മനീഷ് പാണ്ഡെ-അക്ഷര്‍ പട്ടേല്‍ സഖ്യമാണ് വലിയ തകര്‍ച്ചയില്‍ നിന്ന് ഡല്‍ഹിയെ രക്ഷിച്ചത്. ഇരുവരും 69 റണ്‍സിന്റെ കൂട്ടുകെട്ട് പടുത്തുയര്‍ത്തി.

എന്നാല്‍ 18-ാം ഓവറില്‍ 34 റണ്‍സെടുത്ത അക്ഷര്‍ പട്ടേലിനെ ഭുവനേശ്വര്‍ ക്ലീന്‍ ബൗള്‍ഡാക്കി. പിന്നാലെ 34 റണ്‍സ് നേടിയ മനീഷ് പാണ്ഡെ റണ്‍ ഔട്ടായി. ഇതോടെ ഡല്‍ഹിയുടെ സ്‌കോറിങ് വേഗം കുറഞ്ഞു. ആന്റിച്ച് നോര്‍ക്യെയും (2), റിപാല്‍ പട്ടേലും (5) അതിവേഗത്തില്‍ റണ്‍ ഔട്ടായി മടങ്ങി. കുല്‍ദീപ് യാദവും (4) ഇഷാന്ത് ശര്‍മയും (1) പുറത്താവാതെ നിന്നു.

സണ്‍റൈസേഴ്‌സിനുവേണ്ടി വാഷിങ്ടണ്‍ സുന്ദര്‍ മൂന്ന് വിക്കറ്റെടുത്തു. ഭുവനേശ്വര്‍ നാലോവറില്‍ 11 റണ്‍സ് മാത്രം വഴങ്ങി രണ്ട് വിക്കറ്റ് വീഴ്ത്തി. നടരാജന്‍ ഒരു വിക്കറ്റ് സ്വന്തമാക്കി.