കൊല്ക്കത്ത: ഐ ലീഗില് ഗോകുലം കേരള എഫ്.സിയ്ക്ക് മൂന്നാം തോല്വി. കരുത്തരായ മുഹമ്മദന്സാണ് ഗോകുലത്തെ കീഴടക്കിയത്. ഒന്നിനെതിരേ രണ്ട് ഗോളുകള്ക്കാണ് മുഹമ്മദന്സിന്റെ വിജയം.
ഒരു ഗോളിന് മുന്നില് നിന്ന ശേഷമാണ് ഗോകുലം രണ്ട് ഗോളുകള് വഴങ്ങി തോല്വി ഏറ്റുവാങ്ങിയത്. 13-ാം മിനിറ്റില് മലയാളി താരം അബ്ദുള് ഹക്കുവിലൂടെ മുന്നിലെത്തുകയും ആദ്യ പകുതിയില് ആ ലീഡ് നിലനിര്ത്തുകയും ചെയ്തു.
എന്നാല് രണ്ടാം പകുതിയില് കളി മാറിമറിഞ്ഞു. ആക്രമണം അഴിച്ചുവിട്ട മുഹമ്മദന്സ് 67-ാം മിനിറ്റില് അബിയോള ദൗദയിലൂടെ സമനില ഗോള് നേടി. മത്സരം സമനിലയില് അവസാനിക്കുമെന്ന് കരുതിയപ്പോഴാണ് കീന് ലൂയിസ് മുഹമ്മദന്സിന്റെ വിജയനായകനായി ഉയര്ന്നത്. മത്സരമവസാനിക്കാന് സെക്കന്ഡുകള് മാത്രം ബാക്കിനില്ക്കേ ഇന്ജുറി ടൈമില് ഗോളടിച്ചുകൊണ്ട് ലൂയിസ് മുഹമ്മദന്സിന് വിജയം സമ്മാനിച്ചു.
ഇതിനുമുന്പുള്ള ഐ ലീഗിലെ രണ്ട് മത്സരങ്ങളിലും ഗോകുലം പരാജയപ്പെട്ടിരുന്നു. കഴിഞ്ഞ മത്സരത്തില് റൗണ്ട്ഗ്ലാസ് പഞ്ചാബും അതിന് മുന്പുള്ള മത്സരത്തില് നെറോക്ക എഫ്.സിയും ഗോകുലത്തെ കീഴടക്കി.
ഈ തോല്വിയോടെ നിലവിലെ ചാമ്പ്യന്മാരായ ഗോകുലത്തിന്റെ കിരീട പ്രതീക്ഷകള്ക്ക് മങ്ങലേറ്റു. 16 മത്സരങ്ങളില് നിന്ന് 24 പോയന്റ് മാത്രമുള്ള ടീം പട്ടികയില് മൂന്നാമതാണ്. 37 പോയന്റുമായി ശ്രീനിധി ഡെക്കാനാണ് പട്ടികയില് ഒന്നാമത്. റൗണ്ട് ഗ്ലാസ് പഞ്ചാബ് രണ്ടാമതും ട്രാവു മൂന്നാമതുമാണ്.