കൊച്ചി: വാഹനാപകടത്തിൽ മോഡലുകൾ മരണപ്പെട്ട കേസിൽ സുപ്രധാന തെളിവായ ഹാർഡ് ഡിസ്ക് കായലിൽനിന്ന് കിട്ടിയതായും എന്നാൽ ഇത് തിരികെ കായലിൽ തന്നെയിട്ടെന്നും മത്സ്യത്തൊഴിലാളി മൊഴി നൽകിയതായി പോലീസ്. തിങ്കളാഴ്ച രാവിലെ 10-ന് ഇടക്കൊച്ചി കണ്ണങ്ങാട്ട് പാലത്തിനു സമീപം കായലിൽ മീൻപിടിച്ച വള്ളക്കാരനാണ് ഹാർഡ് ഡിസ്ക് ലഭിച്ചത്. എന്നാൽ, ഇത് തിരിച്ചറിയാനാകാതെ പോയ മീൻപിടിത്തക്കാരൻ ഹാർഡ് ഡിസ്ക് വീണ്ടും കായലിലേക്ക് തള്ളുകയായിരുന്നു. ഇതോടെ കായലിൽ തള്ളിയ ഹാർഡ് ഡിസ്ക് കണ്ടെത്താൻ മത്സ്യത്തൊഴിലാളികളുടെ സഹായം തേടുമെന്ന് അന്വേഷണസംഘം പറഞ്ഞു.
ഡി.ജെ. പാർട്ടി നടന്ന നമ്പർ 18 ഹോട്ടലിലെ ദൃശ്യങ്ങൾ ഉൾപ്പെട്ടിട്ടുണ്ടെന്ന് കരുതുന്ന ഹാർഡ് ഡിസ്ക് തിങ്കളാഴ്ച മീൻപിടിത്തക്കാരന്റെ വലയിൽ കുടുങ്ങിയതായാണ് അന്വേഷണ ഉദ്യോഗസ്ഥർ പറയുന്നത്. എന്നാൽ ഇത് എന്താണെന്ന് തിരിച്ചറിയാൻ കഴിയാതിരുന്ന ഇയാൾ തിരികെ കായലിലേക്ക് തന്നെ എറിയുകയായിരുന്നു. അഗ്നിരക്ഷാസേനയുടെ സ്കൂബ ഡൈവിങ് ടീം കായലിൽ പരിശോധനയ്ക്കിറങ്ങുന്നതിന് മുമ്പായിരുന്നു ഈ സംഭവം.
ഹാർഡ് ഡിസ്ക് കണ്ടെത്താൻ മത്സ്യത്തൊഴിലാളികളെ കൂടി പങ്കെടുപ്പിച്ച് വീണ്ടും തിരച്ചിൽ നടത്താനാണ് പോലീസിന്റെ നീക്കം. വല ഉപയോഗിച്ചും കായലിൽ തിരച്ചിൽ നടത്തും. അതേസമയം, മത്സ്യത്തൊഴിലാളിക്ക് ഹാർഡ് ഡിസ്ക് കിട്ടിയെന്ന വെളിപ്പെടുത്തൽ പോലീസിന്റെ തിരക്കഥയാണെന്നും ആക്ഷേപമുണ്ട്. ഹാർഡ് ഡിസ്ക് കണ്ടെത്താൻ അന്വേഷണം വൈകിപ്പിച്ചെന്ന സാഹചര്യത്തിൽ പോലീസിനെതിരേ വ്യാപക വിമർശനമുയർന്നിരുന്നു. ഇത് ചെറുക്കാനുള്ള നീക്കമാണോ പുതിയ വെളിപ്പെടുത്തലിന് പിന്നിലെന്നും സംശയിക്കുന്നുണ്ട്.