നിറത്തിന്റെയും ശാരീരിക ഘടനയുടെയും പേരില്‍ നിരവധി പേരാണ് ക്രൂശിക്കപ്പെടാറുള്ളത്. ഇപ്പോള്‍ തന്റെ അമ്മയും നേരിട്ട കളിയാക്കലുകളും മറ്റും തുറന്നു പറയുന്ന മകളുടെ കുറിപ്പാണ് വൈറലാകുന്നത്. അന്‍സി വിഷ്ണുവാണ് തന്റെ അമ്മ നേരിട്ട ദുരനുഭവങ്ങളെ കുറിച്ച് പങ്കുവെച്ചത്. ഇരുണ്ട നിറമായതിന്റെ പേരിലും മുടി കുറവായതിന്റെ പേരില്‍ തന്റെ അമ്മ ഏറ്റുവാങ്ങിയ പരിഹാസങ്ങളും അന്‍സി തുറന്ന് പറയുന്നു.
അന്‍സിയുടെ കുറിപ്പ്;
അമ്മ കറുത്തതായിരുന്നു, അമ്മക്ക് മുടി കുറവായിരുന്നു. ഈ കാരണങ്ങളുടെ പേരില്‍ അമ്മ ആള്‍ക്കൂട്ടങ്ങളില്‍, കല്യാണ വീടുകളില്‍, പിറന്നാള്‍ വീടുകളില്‍, മരണ വീടുകളില്‍ ഒക്കെയും കളിയാക്കല്‍ നേരിട്ടുണ്ട്. നിറത്തിന്റെ പേരിലും ജാതിയുടെ പേരിലും ഒരു നീണ്ട കാലം കളിയാക്കലുകള്‍ നേരിട്ട സ്ത്രീയാണ് അമ്മ. കടുത്ത നിറങ്ങള്‍ ഇഷ്ടമുള്ള അമ്മ നിറം മങ്ങിയ സാരികള്‍ ഉടുത്ത് കളിയാക്കലുകളെ അതിജീവിച്ചു. പ്രിയപ്പെട്ട നിറമുള്ള സാരി ഉടുത്തപ്പോഴൊക്കെ ‘ഒന്നൂടി കറുത്തു’ എന്നുള്ള ചിരിയോട് കൂടിയുള്ള വര്‍ത്തമാനങ്ങള്‍ അമ്മ കേട്ട് കൊണ്ടിരുന്നു.
ചുവപ്പും നീലയും നിറമുള്ള ഭംഗിയുള്ള സാരികള്‍ അലമാരയുടെ അടിത്തട്ടില്‍ മടക്കി വെച്ച്, എവിടെയെങ്കിലും യാത്ര പുറപ്പെടുപ്പോള്‍ ആ സാരികള്‍ ഓരോന്നായി ശരീരത്തോട് ചേര്‍ത്ത് വെച്ച് ഇതെനിക്ക് ചേരില്ലല്ലേ, ഇതുടുത്താല്‍ ഞാന്‍ ഒന്നൂടി കറുക്കും അല്ലെ എന്ന് അമ്മ പറയാറുണ്ട്, അങ്ങനെ അമ്മ പറയാനുള്ള കാരണക്കാര്‍ അതുവരെ നീ കറുത്തതല്ലേ ഈ നിറങ്ങള്‍ ഒന്നും നിനക്ക് ചേരില്ലെന്ന് അമ്മക്ക് ചുറ്റും നിന്ന് പറഞ്ഞവരാണ്..
അമ്മ പൊട്ട് തൊടാറില്ല, പൊട്ട് തൊട്ടാല്‍ ഒന്നൂടി കറുപ്പ് കൂടുതല്‍ തോന്നുമെന്ന അഭിപ്രായം അമ്മക്ക് ചുറ്റും നിരവധി വട്ടം വന്ന് പോയിട്ടുണ്ട്. ഇഷ്ടപ്പെട്ട നിറങ്ങള്‍ ഉള്ള വസ്ത്രങ്ങള്‍ ധരിക്കാതെ, പൊട്ട് തൊടാതെ അമ്മ വല്ലാതെ bodyshaming നേരിട്ടുണ്ട്. എന്റെ കല്യാണത്തിന് സാരു എടുക്കുമ്പോള്‍ ഒരു ചുമന്ന പട്ട് സാരീ എടുത്ത് ശരീരത്തോട് ചേര്‍ത്തിട്ട് ഇതെനിക്ക് ഇഷ്ടായി പക്ഷേ ഇതുടുത്താല്‍ ഒന്നൂടി കറുപ്പ് തോന്നുമെന്ന് പറഞ്ഞ് അമ്മ ആ സാരി മാറ്റിവെച്ചു.
കല്യാണ തലേന്ന് ആ ചുമന്ന പട്ട് സാരിയാണ് ഞാന്‍ അമ്മക്ക് സമ്മാനം നല്‍കിയത്, അമ്മ ഇതുടുത്താല്‍ മതി എന്ന് ശാസിക്കുകയും ചെയ്തു. പിറ്റേന്ന് അമ്മ ആ സാരിയുടുത്തു, പൊട്ട്തൊട്ടു, മുല്ലപ്പൂ ചൂടി. നാളതു വരെ അമ്മ നേരിട്ട കളിയാക്കലുകള്‍ കുട്ടിക്കാലം മുതല്‍ കാണുന്നതാണ് ഞാന്‍. അമ്മക്കുള്ള എന്റെ ഏറ്റവും വലിയ സമ്മാനം അമ്മയുടെ ഇഷ്ടങ്ങളെ അമ്മയോട് കൂടെ ചേര്‍ക്കുക എന്നതായിരുന്നു. ഓസ്‌കര്‍ വേദിയില്‍ തന്റെ ഭാര്യയുടെ മുടിയില്ലാത്ത തലയെ കളിയാക്കിയ അവതാരകനെ തല്ലിയ വില്‍ സ്മിത്തിനെ കണ്ടപ്പോള്‍ ഞാന്‍ ഓര്‍ത്തത് അമ്മയെയാണ്.
കാലങ്ങളോളം നിറത്തിന്റെ പേരില്‍ കളിയാക്കലുകള്‍ നേരിട്ട അമ്മ. പ്രതികരിക്കാന്‍ എനിക്ക് അറിയാതിരുന്ന നാളുകളില്‍, നിറം മങ്ങിയ നിറങ്ങള്‍ക്കുള്ളില്‍ ഇഷ്ടങ്ങള്‍ ഒളിപ്പിച്ച അമ്മ. പല്ല് പൊങ്ങിയവനെ, മുടിയില്ലാത്തവനെ, കറുത്തവരെ, പൊക്കം ഇല്ലാത്തവരെ, കളിയാക്കി ഒളിഞ്ഞും തെളിഞ്ഞും ചിരിച്ച് അവരെ വേദനിപ്പിച്ചു കരയിപ്പിക്കലാണ് കാലങ്ങളായി നമ്മള്‍ ചെയ്യുന്നത്. കുറവുകളുള്ള ശരീരത്തിലെ വിശാലമായ മനസ് ആരും കാണാന്‍ ശ്രെമിക്കുന്നില്ല എന്നതാണ് സത്യം. ആരുടേയും ശരീരത്തെ കളിയാക്കരുത് എന്നതാണ് നമ്മള്‍ ആദ്യം പഠിക്കേണ്ട പാഠം.
