ചെന്നൈ: മാന്ഡസ് ചുഴലിക്കാറ്റില് തമിഴ്നാട്ടില് നാല് പേർ കൊല്ലപ്പെട്ടു. തകര്ന്ന കെട്ടിടത്തിന് അടിയില്പ്പെട്ടും വൈദ്യുതാഘാതമേറ്റുമാണ് നാല് പേര് മരിച്ചത്. ഇരുന്നൂറിലധികം പേരെ ദുരിതാശ്വാസ ക്യാമ്പുകളിലേക്ക് മാറ്റി. ചെന്നൈയിലടക്കം ശക്തമായ മഴ തുടരുകയാണ്. താഴ്ന്നയിടങ്ങളിലെ നിരവധി വീടുകളില് വെള്ളം കയറി.
ചെങ്കല്പ്പേട്ട്, കാഞ്ചീപുരം, വിഴുപ്പുരം ജില്ലകളില് ദേശീയ ദുരന്ത നിവാരണ സേനയുടെ നേതൃത്വത്തിലാണ് രക്ഷാപ്രവര്ത്തനം. ചെന്നൈ നഗരത്തിലാകെ 400 മരങ്ങളാണ് കടപുഴകി വീണത്. വെള്ളം കയറിയതിനാൽ 15 സബ് സ്റ്റേഷനുകളുടെ പ്രവർത്തനം താത്കാലികമായി നിർത്തിവെച്ചു. ഇത് പലയിടത്തും വൈദ്യുത ബന്ധം തകരാറിലാക്കി.
പുതുച്ചേരി, കാരയ്ക്കാൽ തുടങ്ങിയ മേഖലകളിലും ശക്തമായ മഴയും കാറ്റുമുണ്ടായി. ചെന്നൈ വിമാനത്തവളത്തിൽ നിന്ന് 27 വിമാനങ്ങളുടെ സർവീസ് വൈകി. തീരമേഖലയിലെ നിരവധി വീടുകള്ക്ക് നാശനഷ്ടമുണ്ടായി. അന്പതിലധികം ബോട്ടുകള് തകര്ന്നതായും വിവരമുണ്ട്. വീട് തകര്ന്നവര്ക്ക് ധനസഹായം നല്കുമെന്ന് തമിഴ്നാട് മുഖ്യമന്ത്രി സ്റ്റാലിന് വ്യക്തമാക്കി.
ചെന്നൈ: മാൻഡോസ് ചുഴലിക്കാറ്റ് കര തൊട്ടതോടെ തമിഴ്നാട്ടിലെ തീരദേശ മേഖലയിൽ ശക്തമായ മഴയും കാറ്റും. മഹബലിപുരത്തിന് സമീപമാണ് ചുഴലിക്കാറ്റ് കരതൊട്ടത്. ഇതോടെ ചെന്നൈ അടക്കമുള്ള സ്ഥലങ്ങളിൽ ശക്തമായ കാറ്റും മഴയും തുടരുകയാണ്. പുതുച്ചേരിയിലും ആന്ധ്രപ്രദേശിൻ്റെ തീരദേശങ്ങളിലും കനത്ത മഴയുണ്ടാകുമെന്നാണ് റിപ്പോർട്ട്.
ചുഴലിക്കാറ്റ് കരതൊട്ടതോടെ പുതുച്ചേരിക്കും ശ്രീഹരിക്കോട്ടയ്ക്കും ഇടയിൽ ഇന്ന് പുലർച്ചെ 1.30 ഓടെ മണിക്കൂറിൽ 75 കി.മീ വേഗതയിൽ കാറ്റടിച്ചു. പുലർച്ചെ 5.30 വരെ ചെന്നൈയിൽ 115.1 മില്ലിമീറ്റർ വരെ മഴ ലഭിച്ചു. ശക്തമായ കാറ്റിനെ തുടർന്ന്
ചെന്നൈയിൽ ഇരുന്നൂറോളം മരങ്ങൾ കടപുഴകി. ചെങ്കൽപട്ട് ജില്ലയിലും സമീപ പ്രദേശങ്ങളിലും മരങ്ങൾ കടപുഴകി.
ചുഴലിക്കാറ്റിൻ്റെ ശക്തി കുറയുകയാണെന്നാണ് ഏറ്റവും പുതിയ റിപ്പോർട്ട്. ചുഴലിക്കാറ്റ് വടക്കുപടിഞ്ഞാറൻ ദിശയിലേക്ക് നീങ്ങുന്നതിനാൽ വടക്കുപടിഞ്ഞാറൻ മേഖലകളിൽ മണിക്കൂറിൽ 55 – 65 കിലോമീറ്റർ വേഗതയിൽ കാറ്റ് വീശാൻ സാധ്യതയുണ്ട്. വൈകുന്നേരത്തോടെ ഇത് 30-40 കിലോമീറ്റർ വേഗതയിൽ കുറയുമെന്ന് ചെന്നൈ ആർഎംസി ഡിഡിജിഎം എസ് ബാലചന്ദ്രൻ പറഞ്ഞു.
ശക്തമായ മഴയും കാറ്റും കണക്കിലെടുത്ത് ചെങ്കൽപട്ട്, കാഞ്ചീപുരം, വില്ലുപുരം ജില്ലകളിൽ റെഡ് അലേർട്ടാണ് നൽകിയിരിക്കുന്നത്. ചെന്നൈ ഉൾപ്പെടെ സംസ്ഥാനത്തെ 12 ജില്ലകളിലെ സ്കൂളുകൾക്കും കോളേജുകൾക്കും അവധി പ്രഖ്യാപിച്ചിട്ടുണ്ട്. മത്സ്യത്തൊഴിലാളികൾ കടലിൽ പോകുന്നതിൽ വിലക്കുണ്ട്. ഏത് സാഹചര്യവും നേരിടാൻ ദേശീയ ദുരന്ത നിവാരണ സേന സജ്ജമാണെന്ന് അധികൃതർ വ്യക്തമാക്കി. സംസ്ഥാനത്താകെ 5093 ദുരിതാശ്വാസ ക്യാംപുകള് സജ്ജമാക്കി.
ഇനിയൊരു അറിയിപ്പ് ഉണ്ടാകുന്നത് വരെ നഗരത്തിലെ പാര്ക്കുകളും കളിസ്ഥലങ്ങളും അടച്ചിടാന് ചെന്നൈ ഭരണകൂടം ഉത്തരവിട്ടിട്ടുണ്ട്. ഇന്ന് ബീച്ചുകള് സന്ദര്ശിക്കരുതെന്നും മരങ്ങള്ക്ക് താഴെ വാഹനങ്ങള് പാര്ക്ക് ചെയ്യരുതെന്നും നിര്ദ്ദേശം നല്കി. ബീച്ചുകള്ക്ക് സമീപമുള്ള എല്ലാ കടകളും അടഞ്ഞു കിടക്കുകയാണ്. താഴ്ന്ന പ്രദേശങ്ങളിൽ താമസിക്കുന്നവരോട് സുരക്ഷിതമായ സ്ഥലങ്ങളിലേക്ക് മാറാൻ ജില്ലാ ഭരണകൂടം നിർദേശം നൽകി.