തിരുവനന്തപുരം: സ്ഥാനാര്ഥിത്വവുമായി ബന്ധപ്പെട്ട് പാര്ട്ടിയുമായി ഇടഞ്ഞ കെപിസിസി മുന് അധ്യക്ഷന് കെ. സുധാകരനെതിരെ നിലപാട് കടുപ്പിച്ച് കോണ്ഗ്രസ്. സ്ഥാനാര്ഥിയാക്കാമെന്ന് ആര്ക്കും ഉറപ്പ് കൊടുത്തിട്ടില്ലെന്നും സ്ഥാനാര്ഥിയെ പാര്ട്ടിയാണ് തീരുമാനിക്കുകയെന്നും പ്രതിപക്ഷ നേതാവ് വി.ഡി സതീശന് വ്യക്തമാക്കി.
‘കെ. സുധാകരന് ഉറപ്പുകൊടുക്കാന് അത്ര വലിയ നേതാവല്ലല്ലോ ഞാന്. അവരവര് തീരുമാനിക്കുന്നതല്ല മത്സരിക്കുന്ന കാര്യം. പാര്ട്ടിയാണ് തീരുമാനിക്കുന്നത്. ആരും സ്വയം സ്ഥാനാര്ഥിയായി പ്രഖ്യാപിക്കേണ്ടെന്ന് കെപിസിസി അധ്യക്ഷന് പറഞ്ഞിട്ടുണ്ട്. പാര്ട്ടി തീരുമാനിക്കുന്നവരാണ് സ്ഥാനാര്ഥികള്. അതിനപ്പുറം ആരും പോകേണ്ട. എംപിമാര് മത്സരിക്കുന്ന കാര്യം ഹൈക്കമാന്ഡ് തീരുമാനിക്കും. ഞങ്ങള്ക്ക് അതിന് അധികാരമില്ല. താനല്ല ഫേസ്ബുക്ക് പോസ്റ്റിട്ടതെന്നാണ് ഇന്നലെ സുധാകരന് എന്നോട് പറഞ്ഞത്. ഇന്ന് മാറ്റിപ്പറഞ്ഞത് എന്താണെന്ന് അറിയില്ല’ -സതീശന് പറഞ്ഞു.
കെ. സുധാകരനെ അനുകൂലിച്ചുള്ള പോസ്റ്ററുകളും ഫ്ളക്സുകളും സിപിഎമ്മുകാര് കൊണ്ടുവെക്കുന്നതായിരിക്കുമെന്ന് ചോദ്യത്തിന് മറുപടിയായി സതീശന് പറഞ്ഞു. പറവൂരിലാണോ സുധാകരന് സീറ്റ് ചോദിച്ചിരിക്കുന്നത്. അങ്ങനെയെങ്കില് ഞാന് മാറിക്കൊടുക്കാം -അദ്ദേഹം പറഞ്ഞു.
അതേസമയം കെ. സുധാകരന് എംപിക്കെതിരെ ഒളിയമ്പുമായി കാസര്ഗോഡ് എംപി രാജ്മോഹന് ഉണ്ണിത്താന് രംഗത്തുവന്നു. മലവെള്ളപ്പാച്ചിലില് ഈട്ടിത്തടിയായാലും തേക്കായാലും ഒലിച്ചുപോകുമെന്നായിരുന്നു ഉണ്ണിത്താന്റെ’ഒളിയമ്പ്’. സിറ്റിംഗ് എംപിമാര് വീണ്ടും നിയമസഭയിലേക്ക് മത്സരിക്കേണ്ടതില്ലെന്ന നിലപാടില് ഉറച്ചുനില്ക്കുന്നതായി ഉണ്ണിത്താന് വ്യക്തമാക്കി. യുഡിഎഫ് സ്ഥാനാര്ഥികളെ വിജയിപ്പിക്കേണ്ട ഉത്തരവാദിത്വമാണ് എംപിമാര്ക്കുള്ളത്. സൗന്ദര്യമോ പാരമ്പര്യമോ നോക്കിയല്ല സ്ഥാനാര്ഥികളെ തീരുമാനിക്കുന്നത്. സീറ്റ് ആവശ്യപ്പെടാന് എല്ലാവര്ക്കും അവകാശമുണ്ടെങ്കിലും പാര്ട്ടി തീരുമാനമാണ് അന്തിമമെന്ന് അദ്ദേഹം ഓര്മിപ്പിച്ചു. കെ. സുധാകരന്റെ സ്ഥാനാര്ഥിത്വ പ്രഖ്യാപനം പാര്ട്ടിയില് വലിയ ചര്ച്ചകള്ക്ക് വഴിതുറന്നിരിക്കെയാണ് ഉണ്ണിത്താന്റെ പ്രതികരണം.
കെ. സുധാകരനെ അനുനയിപ്പിക്കാനുള്ള ശ്രമങ്ങള് ഒരുഭാഗത്ത് നടക്കുകയാണ്. ദേശീയ അധ്യക്ഷന് മല്ലികാര്ജുന് ഖാര്ഗെ അടക്കമുള്ള നേതാക്കള് സുധാകരനുമായി ഇന്നലെ രാത്രി ഫോണില് സംസാരിച്ചു. നേതാക്കളെ സുധാകരന് അതൃപ്തി നേരിട്ട് അറിയിച്ചതായാണ് സൂചന. തിങ്കളാഴ്ച ഡല്ഹിയിലെത്തുന്ന സുധാകരനെ അനുനയിപ്പിക്കാന് കഴിയുമെന്ന പ്രതീക്ഷയിലാണ് നേതൃത്വം.
The Congress leadership in Kerala has adopted a firm position against former KPCC President K. Sudhakaran following his recent friction with the party regarding candidate selection. Opposition Leader V.D. Satheesan clarified that the party has not given any individual a prior guarantee of candidacy. Satheesan emphasized that the final decision rests solely with the party leadership, signaling a clear message that personal demands will not override organizational procedures.