കൊച്ചി: യൂട്യൂബ് വ്ലോഗറുടെ വീട്ടിൽ അതിക്രമിച്ച് കയറി തോക്ക് ചൂണ്ടി ഭീഷണിപ്പെടുത്തിയെന്ന പരാതിയിൽ നടൻ ബാലയുടെ മൊഴി പൊലീസ് രേഖപ്പെടുത്തി. പരിശോധനയിൽ തോക്ക് കണ്ടെത്തിയിട്ടില്ലെന്ന് പൊലീസ് പറഞ്ഞു. യൂട്യൂബർ അജു അലക്സിന്റെ പരാതിയിൽ ബാലയ്ക്കെതിരെ തൃക്കാക്കര പൊലീസ് കേസെടുത്തിരുന്നു.
ബാലയെ വിമർശിച്ച് അജു അലക്സ് സ്വന്തം യൂട്യൂബ് ചാനലിൽ വീഡിയോ പോസ്റ്റ് ചെയ്തതിലുള്ള വിരോധം കാരണം ഫ്ലാറ്റിലെത്തി വസ്ത്രങ്ങൾ വാരിവലിച്ചിട്ടെന്നും വീഡിയോ തയാറാക്കാൻ വച്ചിരുന്ന ബാക്ഡ്രോപ് കീറിയ ശേഷം വീഡിയോ ഡിലീറ്റ് ചെയ്തില്ലെങ്കിൽ ബാക്കി അപ്പോഴറിയാം എന്ന് ഭീഷണിപ്പെടുത്തിയെന്നും പരാതിയിൽ പറയുന്നുണ്ട്.
സിനിമാ മേഖലയിലെ ചില പ്രമുഖതാരങ്ങളെ ആക്ഷേപിച്ചതിന് സന്തോഷ് വർക്കിയെക്കൊണ്ട് മാപ്പ് പറയിക്കുന്ന വീഡിയോ കഴിഞ്ഞ ദിവസം ബാല സമൂഹമാദ്ധ്യമങ്ങളിൽ പങ്കുവച്ചിരുന്നു. മാപ്പ് പറയിക്കാൻ ബാല കോടതിയാണോ എന്ന് ചോദിച്ച് അജു അലക്സ് വീഡിയോ പുറത്തിറക്കിയിരുന്നു. ഇതാണ് പ്രശ്നമായതെന്ന് അജു പറഞ്ഞു.
എന്നാൽ അജുവിന്റെ ആരോപണം അടിസ്ഥാന രഹിതമാണെന്നും തോക്കുമായി പോയെന്ന് പറയുന്നത് ശരിയല്ലെന്നും ഭീഷണിപ്പെടുത്തിയിട്ടില്ലെന്നും ബാല വ്യക്തമാക്കിയിരുന്നു. അജു അലക്സ് വീഡിയോകളിൽ ഉപയോഗിക്കുന്ന മോശം ഭാഷയ്ക്കെതിരെയാണ് താൻ പ്രതികരിച്ചതെന്നും ബാല പറഞ്ഞു.
