Kidnap🎙 ദേശീയപാതയിൽ കാർ തടഞ്ഞ് ആളെയും കാറും തട്ടിക്കൊണ്ടു പോയതായി പരാതി

വടക്കഞ്ചേരി: ദേശീയപാതയില്‍ കാര്‍ തടഞ്ഞ് ആളെയും കാറും തട്ടിക്കൊണ്ടു പോയി. മൂന്ന് കാറുകളിലെത്തിയ സംഘം മറ്റൊരു കാറില്‍ സഞ്ചരിച്ചയാളെയും കാറും തട്ടിക്കൊണ്ട് പോകുകയായിരുന്നു എന്നാണ് പരാതി. ദേശീയപാതയില്‍ പാലക്കാട്, നീലിപ്പാറയില്‍ വ്യാഴാഴ്ച ഉച്ചയ്ക്ക് രണ്ടു മണിയോടെയാണ് സംഭവം.

തൃശ്ശൂര്‍ ഭാഗത്തേക്ക് പോവുകയായിരുന്ന ചുവന്ന കാറിനു മുന്നിലും പിന്നിലുമായി മൂന്നു കാറുകള്‍ വരികയും കാര്‍ തടയുകയും ചെയ്തു. തുടര്‍ന്ന് പിന്നില്‍ വന്ന കാറില്‍ നിന്നിറങ്ങിയവര്‍ ചുവന്ന കാറില്‍ നിന്നും ഒരാളെ ബലമായി പിടിച്ചിറക്കി പിന്നിലെ കാറില്‍ കയറ്റുകയും ചെയ്ത ശേഷം കാറും തട്ടിയെടുത്ത് പോവുകയായിരുന്നു.

സംഭവം കണ്ട നാട്ടുകാര്‍ വടക്കഞ്ചേരി പോലീസിനെ വിവരമറിയിച്ചു. നാട്ടുകാരിലൊരാള്‍ പകര്‍ത്തിയ സംഭവത്തിന്റെ ദൃശ്യം പോലീസിന് കൈമാറി. തുടരന്വേഷണത്തിനിടെ തട്ടിയെടുത്ത കാര്‍ കൊന്നഞ്ചേരിക്ക് സമീപം റോഡിനരികില്‍ ഉപേക്ഷിച്ച നിലയില്‍ പോലീസ് കണ്ടെത്തി. വടക്കഞ്ചേരി പോലീസ് അന്വേഷണം തുടരുന്നു.