ചെങ്ങന്നൂര്: ചെങ്ങന്നൂര് മുന്സിഫ് മജിസ്ട്രേറ്റിനെ ചേംബറില് കയറി ആക്രമിക്കാന് ശ്രമിക്കുകയും സ്ഥലത്ത് നിന്നും രക്ഷപ്പെടാന് ശ്രമിക്കുകയും ചെയ്ത യുവാവിനെ നാട്ടുകാര് മല്പ്പിടിത്തത്തിലൂടെ കീഴടക്കി. ചെങ്ങന്നൂര് കോടതിയില് മുന്സിഫ്-മജിസ്ട്രേറ്റ് അമലാ ലോറന്സിന്റെ ചേംബറില് ബുധനാഴ്ച രാവിലെ 9.45-ഓടെയായിരുന്നു സംഭവം. ചെങ്ങന്നൂര് പെരിങ്ങാല മോഹിനി സദനത്തില് അരുണ് മോഹന് (34) ആണ് ചേമ്പറിലേക്ക് ബഹളംവെച്ചുകൊണ്ട് കയറിയത്. ഓഫീസ് അസിസ്റ്റന്റ് വെളിയിലായിരുന്നതിനാല് മജിസ്ട്രേറ്റ് മാത്രമേ ഈ സമയം ചേംബറിലുണ്ടായിരുന്നുള്ളു.
യുവാവ് അക്രമാസക്തനാകുന്നതുകണ്ട് പരിഭ്രമിച്ച മജിസ്ട്രേറ്റ്, കോടതിഹാളിലേക്ക് പ്രവേശിക്കാനുള്ള വാതിലിലൂടെ പുറത്തേക്കോടി. ഇതുകണ്ട അരുണും പിന്നാലെ ഓടി. ബാര് അസോസിയേഷന്റെ വരാന്തയിലേക്ക് പ്രാണരക്ഷാര്ഥം ഓടുന്നതിനിടെ മജിസ്ട്രേറ്റ് രണ്ടുതവണ വീണു. ബഹളംകേട്ട് ഓടിയെത്തിയ മജിസ്ട്രേറ്റിന്റെ ഓഫീസ് അസിസ്റ്റന്റും ക്ലാര്ക്കും ചേര്ന്നു യുവാവിനെ തടയാന് ശ്രമിച്ചു. അതിനിടെ വെള്ളംനിറച്ച കുപ്പി യുവാവ് മജിസ്ട്രേറ്റിനു നേരേയെറിഞ്ഞു. കൂടുതലാളുകള് എത്തിയതോടെ രക്ഷപ്പെടാനായി യുവാവ് കോടതിയുടെ കിഴക്കേ ഗേറ്റിലൂടെ റോഡിലേക്കോടി. ഇതുകണ്ട ജീവനക്കാരും പിന്നാലെയോടി.
തുടര്ന്ന്, സിവില് സ്റ്റേഷനു മുന്നില്വെച്ച് ജീവനക്കാരും ഓട്ടോത്തൊഴിലാളികളും ചേര്ന്ന് ഇയാളെ കീഴടക്കി കെട്ടിയിടുകയായിരുന്നു. വിവരമറിഞ്ഞെത്തിയ പോലീസ് യുവാവിനെ കസ്റ്റഡിയിലെടുത്തു. കുറച്ചുദിവസമായി യുവാവ് കോടതി പരിസരത്തുണ്ടായിരുന്നതായി ബാര് അസോസിയേഷന് ഭാരവാഹികള് പറഞ്ഞു. യുവാവും അച്ഛനും തമ്മില് കോടതിയില് കേസുണ്ട്. ഇതിലെ വൈരാഗ്യമാകാം മജിസ്ട്രേറ്റിനെ ആക്രമിക്കാന് ശ്രമിച്ചതിന് പിന്നിലെന്നാണ് കരുതുന്നത്. അടുത്തിടെ യുവാവ് വീട്ടില് പ്രവേശിക്കുന്നതിനെതിരേ കോടതിയില്നിന്ന് ഇന്ജക്ഷന് ഓര്ഡര് നല്കിയിരുന്നു.
മല്പ്പിടിത്തത്തിനിടെ രണ്ടു ജീവനക്കാരെ യുവാവു ചവിട്ടി. ഓഫീസ് അസിസ്റ്റന്റ് കമല്, ക്ലാര്ക്ക് ജയകുമാര് എന്നിവര്ക്കാണു പരിക്കേറ്റത്. ഇവര് പിന്നീട് ഗവ. ആശുപത്രിയില് ചികിത്സതേടി. വീഴ്ചയില് നിസ്സാര പരിക്കേറ്റ മജിസ്ട്രേറ്റ് ചെങ്ങന്നൂര് ജില്ല ആശുപത്രിയിലും ചികിത്സതേടി. യുവാവിന്റെ മാനസികനില പരിശോധിക്കുമെന്ന് പോലീസ് പറഞ്ഞു. ആക്രമണ ശ്രമം, ജോലി തടസ്സപ്പെടുത്തല് ഉള്പ്പെടെയുള്ള വകുപ്പുകള് ചേര്ത്ത് കേസെടുത്തു.
സംഭവത്തില് ചെങ്ങന്നൂര് ബാര് അസോസിയേഷന് കോടതി ബഹിഷ്കരിച്ച് പ്രതിഷേധിച്ചു. ജുഡീഷ്യല് ഓഫീസര്മാര്ക്ക് മതിയായ സുരക്ഷയൊരുക്കണമെന്ന് ബാര് അസോസിയേഷന് യോഗത്തില് ആശ്യപ്പെട്ടു. കേരളത്തിലെ വനിതാ ജുഡീഷ്യല് ഓഫീസര്മാര് ഉള്പ്പെടെയുള്ള ജുഡീഷ്യല് ഓഫീസര്മാര്ക്ക് മതിയായ സുരക്ഷാക്രമീകരണങ്ങളൊരുക്കണമെന്നും അക്രമിക്കെതിരേ കര്ശന നടപടിസ്വീകരിച്ച് ശിക്ഷ ഉറപ്പുവരുത്തണമെന്നും യോഗമാവശ്യപ്പെട്ടു. സംഭവത്തില് പ്രതിഷേധിച്ച് ബുധനാഴ്ച ചെങ്ങന്നൂര് കോടതിനടപടികള് അഭിഭാഷകര് ബഹിഷ്കരിച്ചു.
A 34-year-old youth identified as Arun Mohan was subdued by locals and court staff after he forcefully entered the chamber of Chengannur Munsiff-Magistrate Amala Lawrence and attempted to attack her. The incident occurred around 9:45 AM on Wednesday when the magistrate was alone in her chamber as her office assistant was outside. Following the commotion, the accused tried to flee the court premises but was chased down and handed over to the Chengannur police for further legal action.