പാലക്കാട്: ഉപതിരഞ്ഞെടുപ്പിലെ പരാജയം ഏറ്റെടുക്കാന്‍ തയ്യാറാണെന്ന് പാലക്കാട്ടെ ബി.ജെ.പി സ്ഥാനാര്‍ഥി സി.കൃഷ്ണകുമാര്‍. താന്‍ ഉത്തരവാദിത്തപ്പെട്ട പാര്‍ട്ടിപ്രവര്‍ത്തകനാണെന്നും ഒഴിഞ്ഞുമാറാന്‍ തയ്യാറല്ലെന്നും അദ്ദേഹം പറഞ്ഞു. താന്‍ കാരണമാണ് പരാജയപ്പെട്ടതെന്ന് പാര്‍ട്ടി പറയുകയാണെങ്കില്‍ അത് ഏറ്റെടുക്കാന്‍ തയ്യാറാണ്. തെറ്റുകള്‍ തിരുത്താന്‍ തയ്യാറാണ്. എന്നാല്‍ സംഘടനയുടെ ഉത്തരവാദിത്തപ്പെട്ടവരാരും ഇതുവരെ അങ്ങനെ പറഞ്ഞിട്ടില്ലെന്നും കൃഷ്ണകുമാര്‍ കൂട്ടിച്ചേര്‍ത്തു.
ഒരു സ്ഥാനാര്‍ഥിയെന്ന നിലയില്‍ പിഴവുകള്‍ പറ്റിയിട്ടുണ്ടെങ്കില്‍ തിരുത്താന്‍ തയ്യാറാണ്. സ്ഥാനാര്‍ഥിയാകണമെന്ന് ഞാന്‍ ആവശ്യപ്പെട്ടിട്ടില്ല. അതിന് ആരുടെയും ശുപാര്‍ശക്കും നടന്നിട്ടില്ല. പാര്‍ട്ടി തീരുമാനമനുസരിച്ചാണ് മത്സരിച്ചതെന്നും സ്ഥാനാര്‍ഥിയാകാനുള്ള ഒരു ശ്രമവും നടത്തിയിട്ടില്ലെന്നും കൃഷ്ണകുമാര്‍ പറഞ്ഞു.
പാര്‍ട്ടി സ്ഥാനാര്‍ഥിയാകാന്‍ പറഞ്ഞപ്പോള്‍ അച്ചടക്കമുള്ള പാര്‍ട്ടി പ്രവര്‍ത്തകനെന്ന നിലയില്‍ സ്ഥാനാര്‍ഥിയാകുകയെന്നത് തന്റെ ഉത്തരവാദിത്തമാണ്. സ്ഥാനാര്‍ഥിയെന്ന നിലയില്‍ തന്റെ കഴിവിന്റെ പരമാവധി സമയവും പ്രയത്‌നവും അതിനായി വിനിയോഗിച്ചിട്ടുണ്ടെന്നാണ് തന്റെ ബോധ്യം. അതില്‍ എന്തെങ്കിലും കുറവ് വന്നിട്ടുണ്ടെന്ന് പാര്‍ട്ടി പറയുകയാണെങ്കില്‍ നടപടികള്‍ ഏറ്റുവാങ്ങാന്‍ തയ്യാറാണ്.
അതേസമയം ബി.ജെ.പി വിട്ട് കോണ്‍ഗ്രസില്‍ ചേര്‍ന്ന സന്ദീപ് വാര്യര്‍ ഉന്നയിച്ച ആരോപണങ്ങള്‍ക്കും കൃഷ്ണകുമാര്‍ മറുപടി നല്‍കി. 2000 -ല്‍ സിപിഎം കാലാകാലങ്ങളായി ജയിച്ച വാര്‍ഡില്‍ ഞാന്‍ ജയിക്കുന്നു. 2010 ല്‍ സിപിഎം 30 വര്‍ഷമായി ജയിച്ച വാര്‍ഡില്‍ ജയിക്കുകയും 2015 ല്‍ അന്നത്തെ കോണ്‍ഗ്രസിന്റെ നഗരസഭാ ചെയര്‍മാനെ പരാജയപ്പെടുത്തി വാര്‍ഡ് പിടിക്കുകയും ചെയ്തു.
എന്നാല്‍ ആരോപണമുന്നയിച്ച സന്ദീപ് ഒരു പഞ്ചായത്ത് മെമ്പറെയെങ്കിലും ജയിപ്പിച്ചിട്ടുണ്ടോ? സന്ദീപ് മത്സരിച്ചാല്‍ കെട്ടിവെച്ചകാശ് പോലും കിട്ടില്ല. ഒരു വാര്‍ഡ് തിരഞ്ഞെടുപ്പില്‍പോലും മത്സരിക്കാന്‍ സന്ദീപ് ചങ്കൂറ്റം കാണിക്കാത്തതെന്താണെന്നും അദ്ദേഹം ചോദിച്ചു. സന്ദീപ് വാര്യര്‍ വന്നതുകൊണ്ടാണ് ജയിച്ചതെന്ന് കോണ്‍ഗ്രസിന്റെ പ്രധാനനേതാക്കള്‍ പറയട്ടെയെന്നും അങ്ങനെ പറഞ്ഞാല്‍ താന്‍ സമ്മതിക്കാമെന്നും കൃഷ്ണകുമാര്‍ കൂട്ടിച്ചേര്‍ത്തു.
