തിരുവനന്തപുരം: ജഡ്ജിക്ക് നൽകാനെന്നപേരിൽ കക്ഷിയിൽനിന്ന് കൈക്കൂലിവാങ്ങിയെന്ന ആരോപണത്തിൽ ഹൈക്കോടതി അഭിഭാഷകനെതിരേ പോലീസ് അന്വേഷണം. അഡ്വക്കേറ്റ്സ് അസോസിയേഷൻ ഭാരവാഹിയായി അടുത്തിടെ തിരഞ്ഞെടുക്കപ്പെട്ട അഭിഭാഷകനെതിരേയാണ് അന്വേഷണം.
അന്വേഷണം ആവശ്യപ്പെട്ട് ഹൈക്കോടതി രജിസ്ട്രാർ നൽകിയ കത്തിന്റെ അടിസ്ഥാനത്തിലാണിത്. കൊച്ചി സിറ്റി പോലീസ് കമ്മിഷണറാണ് അന്വേഷണം നടത്തുന്നത്. സംസ്ഥാനത്ത് ആദ്യമായാണ് ഹൈക്കോടതിയുടെ ആവശ്യപ്രകാരം ഒരു അഭിഭാഷകനെതിരേ പോലീസ് അന്വേഷണം നടക്കുന്നത്.
രജിസ്ട്രാറുടെ കത്ത് കഴിഞ്ഞയാഴ്ച പ്രത്യേകദൂതനാണ് തിരുവനന്തപുരത്തെത്തി ഡി.ജി.പി.ക്ക്‌ കൈമാറിയത്. തുടർന്ന് കമ്മിഷണറെ തിരുവനന്തപുരത്തേക്ക്‌ വിളിച്ചുവരുത്തിയാണ് ഡി.ജി.പി. അന്വേഷണത്തിന് നിർദേശിച്ചത്.
ജഡ്ജിക്ക് നൽകാനെന്നുപറഞ്ഞ് സിനിമാമേഖലയുമായി ബന്ധപ്പെട്ട ഒരു കക്ഷിയിൽനിന്ന് അഭിഭാഷകൻ പണം വാങ്ങിയെന്നാണ് ആരോപണം. ഹൈക്കോടതിയിലെ ഒരു അഭിഭാഷകന്റെ ഫെയ്സ്ബുക്ക് പോസ്റ്റിലും ആരോപണം ഉന്നയിക്കപ്പെട്ടിരുന്നു.
ഇത് വലിയ ചർച്ചയായതിനുപിന്നാലെ ചീഫ് ജസ്റ്റിസിന്റെ നിർദേശപ്രകാരം ഹൈക്കോടതി വിജിലൻസ് രജിസ്ട്രാർ പ്രാഥമികാന്വേഷണം നടത്തി. ഇതിൽ അഭിഭാഷകനെതിരേ പ്രഥമദൃഷ്ട്യാ തെളിവുകണ്ടെത്തിയിരുന്നു. അന്വേഷണം ആവശ്യപ്പെട്ട് ഹൈക്കോടതിയിലെ ഒരു ജഡ്ജിതന്നെ ചീഫ് ജസ്റ്റിസിന് കത്തും നൽകി.
വിജിലൻസ് രജിസ്ട്രാറുടെ അന്വേഷണറിപ്പോർട്ടിനു പിന്നാലെ ചേർന്ന ഫുൾ കോർട്ടാണ് പോലീസ് അന്വേഷണത്തിനുവിടാൻ തീരുമാനിച്ചത്. വിഷയം വളരെ ഗൗരവത്തോടെയാണ് ഹൈക്കോടതി എടുത്തിരിക്കുന്നത്. അന്വേഷണവിവരങ്ങൾ പുറത്തുവിടരുതെന്ന നിർദേശവും നൽകിയെന്നാണ് അറിയുന്നത്.
