ദുര്ഗ്: ഛത്തീസ്ഗഢില് മതപരിവര്ത്തനവും മനുഷ്യക്കടത്തും ആരോപിച്ച് അറസ്റ്റ് ചെയ്ത മലയാളി കന്യാസ്ത്രീകളുടെ ജാമ്യാപേക്ഷ തള്ളി. ദുര്ഗിലെ വിചാരണ കോടതിയാണ് ജാമ്യാപേക്ഷ തള്ളിയത്. ഉടന് സെഷന്സ് കോടതിയില് ജാമ്യാപേക്ഷ നല്കുമെന്ന് ഇവരുടെ അഭിഭാഷക അറിയിച്ചു.
ഇതിനിടെ ജയിലില് കഴിയുന്ന കന്യാസ്ത്രീകളെ പ്രതിപക്ഷ എംപിമാര് സന്ദര്ശിച്ചു. ബജ്റംഗ്ദള് പ്രവര്ത്തകര് വളരെ മോശമായ രീതിയിലാണ് തങ്ങളെ നേരിട്ടതെന്ന് കന്യാസ്ത്രീകള് പറഞ്ഞതായി എംപിമാര് സന്ദര്ശനത്തിന് ശേഷം പറഞ്ഞു.
എന്.കെ.പ്രേമചന്ദ്രന്, ഫ്രാന്സിസ് ജോര്ജ്, ബെന്നി ബഹ്നാന്, സപ്തഗിരി എന്നീ എംപിമാരാണ് ദുര്ഗ് സെന്ട്രല് ജയിലില് കഴിയുന്ന കന്യാസ്ത്രീകളെ കാണാനായി എത്തിയത്. ഇവരെ കൂടാതെ കന്യാസ്ത്രീകളുടെ ബന്ധുവായ ബൈജുവിനും ജയിലില് ഇവരെ കാണാന് അനുമതി ലഭിച്ചിരുന്നു.
ഛത്തീസ്ഗഢിലെ ദുര്ഗ് റെയില്വേ സ്റ്റേഷനില്വെച്ചാണ് കന്യാസ്ത്രീകളായ സി. പ്രീതി മേരി, സി. വന്ദന ഫ്രാന്സിസ് എന്നിവര് ഞായറാഴ്ച അറസ്റ്റിലായത്. ഇരുവരും നിലവില് ദുര്ഗ് ജയിലിലാണുള്ളത്. ഒരു പറ്റം ബജ്റംഗ്ദള് പ്രവര്ത്തകര് കന്യാസ്ത്രീകളെ വളഞ്ഞ് ബഹളമുണ്ടാക്കിയതിനെത്തുടര്ന്നായിരുന്നു അറസ്റ്റ്. കണ്ണൂര് ഉദയഗിരി ഇടവകാംഗമാണ് സിസ്റ്റര് വന്ദന ഫ്രാന്സിസ്, അങ്കമാലി എളവൂര് ഇടവകാംഗമാണ് സിസ്റ്റര് പ്രീതി മേരി.