CRIME 🔪വെട്ടുകത്തിയുമായി സ്ത്രീയെ ആക്രമിക്കാൻ ശ്രമം; തുരത്തിയോടിച്ച് കടയുടമ

തിരുവനന്തപുരം: വെട്ടുകത്തിയുമായി കടയിൽ കയറി ജീവനക്കാരിയെ ആക്രമിക്കാൻ ശ്രമം. കല്ലിയൂർ പെരിങ്ങമ്മലയിൽ രാഗേഷിന്റെ ഉടമസ്ഥതയിലുള്ള അനഘ ഹോട്ട് ചിപ്സിൽ വ്യാഴാഴ്ച വൈകിട്ടോടെയായിരുന്നു സംഭവം. സ്ത്രീ ഇറങ്ങി ഓടി രക്ഷപ്പെട്ടു.

സ്ത്രീയുടെ അയൽവാസിയായ യുവാവാണ് ആക്രമണം നടത്തിയത്. ആദ്യം കടയിലെത്തി സ്ത്രീയെ അസഭ്യം പറയുന്നത് വിലക്കിയതോടെയാണ് യുവാവ് വെട്ടുകത്തിയെടുത്ത് വീശിയത്. സംഭവത്തിൽ ഭയന്ന സ്ത്രീ ഇറങ്ങിയോടി കടയ്ക്ക് പിന്നിൽ ഒളിച്ചു. നാട്ടുകാർ ഓടിക്കൂടി യുവാവ് വന്ന ബൈക്കിന്റെ താക്കോൽ ഊരിയെടുത്തു. യുവാവിനൊപ്പം മറ്റൊരു ബൈക്കിൽ വന്ന മൂന്നംഗസംഘം മാറിനിൽക്കുകയായിരുന്നു.

വെട്ടുകത്തി വീശിയതോടെ കടയുടമ കയ്യിൽ കിട്ടിയ വസ്തുവെടുത്ത് യുവാവിനെ തടുത്തു. നാട്ടുകാർ എത്തിയതോടെ യുവാവ് ബൈക്ക് ഉപേക്ഷിച്ച് ഒപ്പം വന്നവരുടെ ബൈക്കിൽ കയറി രക്ഷപ്പെട്ടു.