ചെന്നൈ: ദേഹാസ്വാസ്ഥ്യത്തെതുടര്ന്ന് ആശുപത്രിയിൽ പ്രവേശിപ്പിച്ച എ ആര് റഹ്മാന്റെ ആരോഗ്യനില തൃപ്തികരമെന്ന് ആശുപത്രി അധികൃതർ. ചെന്നൈ അപ്പോളോ ആശുപത്രിയിലാണ് റഹ്മാനെ പ്രവേശിപ്പിച്ചത്. ഇന്ന് രാവിലെ നെഞ്ചുവേദനയെ തുടര്ന്നാണ് എ ആര് റഹ്മാനെ ആശുപത്രിയിൽ എത്തിച്ചത്. ഇന്ന് രാവിലെ 7.10ഓടെയാണ് റഹ്മാനെ ആശുപത്രിയിൽ പ്രവേശിപ്പിച്ചത്. റംസാൻ വ്രതം അനുഷ്ഠിച്ചിരുന്നതിനാൽ നിർജ്ജലീകരണം ഉണ്ടായതാണ് ദേഹാസ്വാസ്ഥ്യം ഉണ്ടാകാൻ കാരണമെന്നാണ് ആശുപത്രി അധികൃതർ പറയുന്നതെന്ന് ദേശീയ മാധ്യമങ്ങൾ റിപ്പോർട്ട്ചെയ്യുന്നു.
ഇസിജി, എക്കോകാര്ഡിയോഗ്രാം, ആന്ജിയോഗ്രാം അടക്കമുള്ള പരിശോധനകള് നടത്തി. അപ്പോളോ ആശുപത്രിയിലെ വിദഗ്ധരായ ഡോക്ടര്മാരുടെ സംഘമാണ് എആര് റഹ്മാനെ പരിശോധിക്കുന്നത്. പരിശോധന നടക്കുകയാണെന്നും എ ആര് റഹ്മാന്റെ ആരോഗ്യനില തൃപ്തികരമാണെന്നും ആശുപത്രി വൃത്തങ്ങള് അറിയിച്ചു. ലണ്ടനിലായിരുന്ന എ ആര് റഹ്മാൻ കഴിഞ്ഞ ദിവസമാണ് ചെന്നൈയിൽ തിരിച്ചെത്തിയത്. എആര് റഹ്മാന്റെ ആരോഗ്യസ്ഥിതിയിൽ നിലവിൽ ആശങ്കവേണ്ടെന്നാണ് ലഭ്യമാകുന്ന വിവരം.