കൊച്ചി: താരസംഘടനയായ ‘അമ്മ’യിലെ ഭാരവാഹികളിൽ നിന്ന് തനിക്ക് നീതി ലഭിക്കുമെന്ന് യാതൊരു പ്രതീക്ഷയുമില്ലെന്നും നടൻ ടിനി ടോമിനെതിരെ ശക്തമായ നിയമനടപടികളുമായി മുന്നോട്ട് പോകുമെന്നും നടി അൻസിബ ഹസൻ. തന്നെ മണിക്കൂറുകളോളം സ്റ്റേഷനിൽ വെച്ച് മാനസികമായി പീഡിപ്പിക്കുകയും മൊഴിയിൽ കൃത്രിമം കാണിക്കുകയും ചെയ്ത തൃപ്പൂണിത്തുറ വനിതാ സ്റ്റേഷനിലെ എസ്.ഐ രേഷ്മയ്ക്കെതിരെ ആഭ്യന്തര മന്ത്രിക്ക് പരാതി നൽകുമെന്നും താരം വെളിപ്പെടുത്തി. ഈ വിഷയത്തിൽ യാതൊരുവിധ ഒത്തുതീർപ്പുകൾക്കും താൻ തയ്യാറല്ലെന്ന് അൻസിബ കൃത്യമായി വ്യക്തമാക്കി.
സംഘടനയ്ക്കുള്ളിൽ താൻ നേരിട്ട ജിഹാദി പരാമർശവും ഡി.എൻ.എ അധിക്ഷേപവും നടി നീന കുറുപ്പ് പരസ്യമായി ശരിവെച്ചിട്ടും ‘അമ്മ’ പ്രസിഡന്റ് (മോഹൻലാൽ) അതിനെ നിസ്സാരവൽക്കരിക്കാനാണ് ശ്രമിച്ചതെന്ന് അൻസിബ കുറ്റപ്പെടുത്തി. “നീന കുറുപ്പ് ഈ ആരോപണങ്ങൾ ശരിവെച്ചിട്ടും ‘ഒരാളല്ലേ ഇത് കേട്ടിട്ടുള്ളൂ’ എന്നാണ് പ്രസിഡന്റ് ചോദിക്കുന്നത്. അതുകൊണ്ട് തന്നെ ഈ കമ്മിറ്റിയിൽ നിന്ന് എനിക്ക് നീതി ലഭിക്കുമെന്ന് ഒരു വിശ്വാസവുമില്ല. സംഘടനയിലെ പലരും ഇപ്പോൾ എന്നെ ഫോണിൽ വിളിക്കുന്നുണ്ട്. എന്നാൽ എനിക്കിനി അവരുമായി ഒരു സംസാരത്തിന് താല്പര്യമില്ല. കാരണം ഈ വിഷയങ്ങളെല്ലാം നേരത്തെതന്നെ ഞാൻ അസോസിയേഷനിൽ ബോധിപ്പിച്ചതാണ്.
ഭാരവാഹികൾക്കെല്ലാം ഇതെല്ലാം അറിയാമായിരുന്നിട്ടും അന്നൊന്നും ഒന്നും ചെയ്യാത്തവർ ഇപ്പോൾ മാധ്യമങ്ങളുടെയും പൊതുജനങ്ങളുടെയും സമ്മർദം ഉള്ളതുകൊണ്ട് മാത്രമാണ് സംസാരിക്കാൻ തയ്യാറാകുന്നത്,” അൻസിബ പറഞ്ഞു.തൃപ്പൂണിത്തുറ വനിതാ പോലീസ് സ്റ്റേഷനിൽ വെച്ച് തനിക്ക് നേരിടേണ്ടി വന്നത് അങ്ങേയറ്റം ക്രൂരവും പക്ഷപാതപരവുമായ പെരുമാറ്റമാണെന്ന് നടി വെളിപ്പെടുത്തി. “ഒരു വനിതാ സ്റ്റേഷൻ ആയതുകൊണ്ട് കംഫർട്ട് ആയിരിക്കും എന്ന് കരുതിയാണ് അവിടെ പോയത്. എന്നാൽ മൂന്ന് മണിക്കൂറോളമാണ് എസ്.ഐ രേഷ്മ എന്നെ അവിടെയിരുന്ന് അധിക്ഷേപിച്ചത്.
തികച്ചും മുൻവിധിയോടെയായിരുന്നു അവരുടെ പെരുമാറ്റം. പരാതിക്കാരിക്ക് ആ സ്റ്റേഷനിലെ ഉദ്യോഗസ്ഥരുമായി വലിയ സൗഹൃദമുണ്ടായിരുന്നു. എസ്.ഐയുടെ മുന്നിലിരുന്നാണ് പരാതിക്കാരി എന്നെ തെറിവിളിച്ചതും ശപിച്ചതും. അതൊന്നും കേട്ടിട്ട് മിണ്ടാതിരിക്കുന്ന ഒരു എസ്.ഐയെ ഞാൻ ജീവിതത്തിൽ ആദ്യമായാണ് കാണുന്നത്. അവിടെ പുരുഷ ഉദ്യോഗസ്ഥർ ഉണ്ടായിരുന്നെങ്കിൽ എനിക്ക് ഇത്രയും ബുദ്ധിമുട്ട് അനുഭവിക്കേണ്ടി വരില്ലായിരുന്നു എന്ന് ഇപ്പോൾ തോന്നുന്നു,” അൻസിബ കൂട്ടിച്ചേർത്തു.
എസ്.ഐ രേഷ്മ തന്നെ ഭീഷണിപ്പെടുത്തി നിർബന്ധപൂർവ്വം മാപ്പ് എഴുതി ഒപ്പിടുവിച്ചതായും അതിൽ പിന്നീട് കൃത്രിമം കാണിച്ചതായും അൻസിബ ഗുരുതരമായ ആരോപണം ഉന്നയിച്ചു. “ഞാൻ ‘ഖേദം പ്രകടിപ്പിക്കുന്നു’ എന്ന് എഴുതി ഒപ്പിട്ട് നൽകിയ രേഖയിൽ, ഞാൻ ഒപ്പിട്ടതിന് ശേഷം എസ്.ഐ രണ്ട് വരികൾ കൂടി കൂട്ടിച്ചേർത്തു. ‘ഇനി നിങ്ങളുടെ കുടുംബം അൻസിബ തകർക്കില്ല എന്ന് കൂടെ എഴുതിച്ചേർക്കട്ടെ’ എന്ന് അവർ എന്നോട് ചോദിച്ചിരുന്നു. ഭാവിയിൽ എന്റെ വായടപ്പിക്കാൻ വേണ്ടിയാണ് ഇങ്ങനെയൊരു മാപ്പപേക്ഷ ഒപ്പിടുവിച്ചത്. പരാതിക്കാരിക്ക് ഈ രേഖ ഫോട്ടോ എടുക്കാൻ അനുവാദം നൽകിയ എസ്.ഐ എന്നെ ഫോട്ടോ എടുക്കാൻ അനുവദിച്ചില്ല. കൃത്രിമം നടന്നത് കൊണ്ട് എനിക്ക് ഇപ്പോൾ വലിയ പേടിയുണ്ട്. ഇതിനെതിരെ ശക്തമായ നിയമപോരാട്ടവുമായി മുന്നോട്ട് പോകും,” അൻസിബ നിലപാട് വ്യക്തമാക്കി.
താരസംഘടനയിലെ ഭാരവാഹികൾക്കെതിരെയുള്ള അൻസിബയുടെ ഈ തുറന്നുപറച്ചിലും പോലീസിനെതിരെയുള്ള ഗുരുതര ആരോപണങ്ങളും സിനിമാ-രാഷ്ട്രീയ മേഖലകളിൽ വലിയ ചർച്ചയായിരിക്കുകയാണ്. വരും ദിവസങ്ങളിൽ ഈ വിഷയത്തിൽ ആഭ്യന്തര വകുപ്പിന്റെ ഭാഗത്തുനിന്നും ‘അമ്മ’ സംഘടനയുടെ നേതൃത്വത്തിൽ നിന്നും എങ്ങനെയുള്ള പ്രതികരണങ്ങൾ ഉണ്ടാകുമെന്നാണ് സാംസ്കാരിക കേരളം ഉറ്റുനോക്കുന്നത്.
Actress Ansiba Hassan has announced that she will take legal action against actor Tini Tom and a female Sub-Inspector from the Thrippunithura Women’s Police Station. Speaking to Mathrubhumi News, Ansiba stated she has no faith in getting justice from the ‘AMMA’ association, noting that the president dismissed her claims despite actress Neena Kurup confirming them. She accused SI Reshma of mental harassment, forcing her to sign an apology, and later altering the statement, adding that she would file a complaint with the Home Minister.