കൊച്ചി: ട്വന്റി 20 പാർട്ടിയിൽ നിന്ന് രാജിവെച്ചതിന് തൊട്ടുപിന്നാലെ, പാർട്ടി ചീഫ് കോർഡിനേറ്റർ സാബു എം. ജേക്കബിന് താനയച്ച വാട്സാപ്പ് സന്ദേശങ്ങളുടെ ചിത്രങ്ങൾ പുറത്തുവിട്ട് സംവിധായകനും നടനുമായ അഖിൽ മാരാർ. തനിക്ക് രാഷ്ട്രീയ ജീവിതത്തിൽ നേരിടേണ്ടി വന്ന കടുത്ത ചതികളുടെയും വഞ്ചനയുടെയും യാഥാർത്ഥ്യം ഈ സംഭാഷണങ്ങൾ പുറത്തുപറയുമെന്ന ആമുഖത്തോടെയാണ് അഖിൽ ഫെയ്സ്ബുക്കിലും മറ്റ് സോഷ്യൽ മീഡിയ പ്ലാറ്റ്ഫോമുകളിലും പോസ്റ്റ് പങ്കുവെച്ചത്. തിരഞ്ഞെടുപ്പിന് മുൻപ് താൻ നടത്തിയ ആശയവിനിമയങ്ങളാണ് ഇതെന്ന് വ്യക്തമാക്കിയ അദ്ദേഹം, തനിക്ക് പറ്റിയ തെറ്റുകൾ തിരുത്താനാണ് ഇപ്പോൾ ശ്രമിക്കുന്നതെന്നും കൂട്ടിച്ചേർത്തു. പുറത്തുവന്ന ചാറ്റുകളിൽ പാർട്ടിക്കെതിരെയും സാബു ജേക്കബിനെതിരെയും കടുത്ത ആരോപണങ്ങളാണ് അഖിൽ ഉന്നയിച്ചിരിക്കുന്നത്. ട്വന്റി 20യുടെ രാഷ്ട്രീയ നിലപാടുകളെച്ചൊല്ലിയുള്ള ഈ പുതിയ പോര് വരും ദിവസങ്ങളിൽ സംസ്ഥാന രാഷ്ട്രീയത്തിൽ വലിയ ചർച്ചകൾക്ക് വഴിവെക്കും.
“എന്റെ ജീവിതം കൊണ്ട് കുഴിയിൽ ചാടിച്ചു തകർത്ത ശേഷം ഓടി ഒളിക്കുന്ന ശൈലി ശരിയല്ല, തനിക്ക് നൽകിയ വാക്കു പാലിക്കാൻ നിങ്ങൾക്ക് സാധിച്ചില്ല” എന്ന് അഖിൽ മാരാർ സാബുവിന് അയച്ച മെസ്സേജുകളിൽ ഒന്നിൽ വൈകാരികമായി പറയുന്നുണ്ട്. തിരഞ്ഞെടുപ്പിൽ സ്ഥാനാർത്ഥിയായതോടെ ഉണ്ടായ സാമ്പത്തിക ബാധ്യതകൾ തീർക്കാൻ സ്വന്തമായി ഉണ്ടായിരുന്ന ലക്ഷങ്ങൾ വിലമതിക്കുന്ന ബൈക്ക് വിൽക്കേണ്ടി വന്ന കാര്യവും ചാറ്റിൽ പറയുന്നുണ്ട്. താൻ ഏറെ ആഗ്രഹിച്ചു കഴിഞ്ഞ വർഷം 18 ലക്ഷം രൂപയ്ക്ക് വാങ്ങിയ ബി.എം.ഡബ്ല്യു ബൈക്ക് പിന്നീട് ബാധ്യത കാരണം 10 ലക്ഷം രൂപയ്ക്കാണ് വിറ്റതെന്ന് അദ്ദേഹം സങ്കടത്തോടെ ചൂണ്ടിക്കാട്ടുന്നു. ഇത്തരം എട്ട് നിർണ്ണായക സ്ക്രീൻഷോട്ടുകളാണ് അഖിൽ പുറത്തുവിട്ടത്. എന്നാൽ ഇതിനെല്ലാം മറുപടിയായി “നിങ്ങളുടെ പേര് പരിഗണിച്ചത് തൃക്കാക്കരയിലാണ്, തൃപ്പൂണിത്തുറയിൽ അല്ല” എന്ന് മാത്രമാണ് സാബു മറുപടി നൽകിയത്.
ചാറ്റുകൾ പുറത്തുവിട്ടതിന് ഒപ്പം നീണ്ട ഒരു പോസ്റ്റും അഖിൽ മാരാർ തന്റെ സോഷ്യൽ മീഡിയ പേജിൽ പങ്കുവെച്ചിട്ടുണ്ട്. കൊട്ടാരക്കര മണ്ഡലത്തിൽ സ്വതന്ത്രനായി മത്സരിക്കാൻ താല്പര്യപ്പെട്ടാണ് താൻ 20/20 യുമായി അടുക്കുന്നതെന്ന് അഖിൽ കുറിപ്പിൽ വ്യക്തമാക്കുന്നു. അവിടെ ബിജെപിയുടെ വോട്ടുകൾക്ക് പുറമെ തന്റെ വ്യക്തിബന്ധങ്ങൾ വഴി നേടാൻ കഴിയുന്ന വോട്ടുകൾ കൂടി ചേരുമ്പോൾ ശക്തമായ ഒരു ത്രികോണ മത്സരം സൃഷ്ടിക്കാൻ കഴിയുമെന്നാണ് കണക്കുകൂട്ടിയത്. എന്നാൽ അവിടെ സീറ്റ് നൽകാതെ ട്വന്റി 20 തന്നെ ചതിക്കുകയായിരുന്നുവെന്ന് അദ്ദേഹം തുറന്നടിച്ചു. പിന്നീട് ബിജെപി തനിക്ക് മാന്യത നൽകി തൃപ്പൂണിത്തുറ സീറ്റ് ട്വന്റി 20യ്ക്ക് കൈമാറിയെങ്കിലും സാബു ജേക്കബ് അവിടെയും തനിക്ക് സീറ്റ് നൽകാതെ ചതിക്കുകയാണുണ്ടായത്.
ജയസാധ്യതയുള്ളതോ മികച്ച മുന്നേറ്റം ഉണ്ടാക്കാൻ കഴിയുന്നതോ ആയ ഒരു മണ്ഡലത്തിലും അഖിൽ മാരാർ മത്സരിക്കരുത് എന്ന് ബിജെപിയിലെ ചില സ്വാർത്ഥരായ നേതാക്കൾ ആഗ്രഹിച്ചിരുന്നുവെന്നും അഖിൽ കുറ്റപ്പെടുത്തുന്നു. 35 ശതമാനം ക്രിസ്ത്യൻ വോട്ടുകളുള്ള തൃക്കാക്കര മണ്ഡലത്തിൽ ഉമ്മൻ ചാണ്ടിയുടെ മരുമകനെ നിർത്തിയിരുന്നെങ്കിൽ കൂടുതൽ നേട്ടം ഉണ്ടാക്കാൻ സാധിക്കുമായിരുന്നു. എന്നാൽ അത് ചെയ്യാതെ ബിജെപിക്ക് സ്വാധീനമുള്ള കൊടുങ്ങല്ലൂർ മണ്ഡലം ഇവർ വാങ്ങി നൽകുകയാണുണ്ടായത്. യാതൊരുവിധ രാഷ്ട്രീയ ബോധവുമില്ലാത്ത കുറച്ചുപേർക്ക് ടിക്കറ്റ് നൽകി എൻഡിഎ മുന്നണിക്ക് ആകമാനം ഇവർ നാണക്കേടുണ്ടാക്കിയെന്നും അദ്ദേഹം കടുത്ത ഭാഷയിൽ വിമർശിച്ചു.
തൃക്കാക്കരയിൽ 15,000 വോട്ടുകൾ ലഭിച്ച ഡോക്ടർ ടെറി എന്ന സ്ഥാനാർത്ഥിക്ക് ആ വോട്ട് കിട്ടിയത് അദ്ദേഹത്തിന്റെ വ്യക്തിപരമായ സ്വാധീനം കൊണ്ടാണ്. അല്ലാതെ ട്വന്റി 20 പ്രവർത്തകർ അവിടെ പണി എടുത്തതുകൊണ്ടല്ലെന്ന് അഖിൽ തുറന്നടിച്ചു. തിരഞ്ഞെടുപ്പ് കമ്മിറ്റി ഓഫീസ് പോലുമില്ലാത്ത ഒരേയൊരു എൻഡിഎ സ്ഥാനാർത്ഥി താനായിരുന്നുവെന്ന് അഖിൽ ഓർമ്മിപ്പിക്കുന്നു. സ്വന്തമായി സൃഷ്ടിച്ച സോഷ്യൽ മീഡിയ തരംഗം മാത്രമാണ് തനിക്കവിടെ തുണയായത്. വളരെ കുറച്ചു ബിജെപി പ്രവർത്തകർ മാത്രമാണ് തനിക്ക് വേണ്ടി സത്യസന്ധമായി രംഗത്തിറങ്ങിയത്. ഇതിനെല്ലാം പുറമെ വലിയ രീതിയിൽ തിരഞ്ഞെടുപ്പ് ഫണ്ട് കൈപ്പറ്റിയെന്ന കള്ളപ്രചാരണങ്ങളും അനാവശ്യ പഴികളും തനിക്ക് കേൾക്കേണ്ടി വന്നെന്നും അഖിൽ വേദനയോടെ കുറിച്ചു.
തിരഞ്ഞെടുപ്പ് കഴിഞ്ഞതിന് ശേഷം സാബു ജേക്കബിനെ പലതവണ ഫോണിൽ ബന്ധപ്പെടാൻ ശ്രമിച്ചെങ്കിലും അദ്ദേഹം കോൾ എടുക്കാനോ സന്ദേശങ്ങൾക്ക് മറുപടി നൽകാനോ തയ്യാറായില്ല. എൻഡിഎയുടെ ഭാഗമായതിന്റെ പേരിൽ മുൻപ് അടുത്ത ബന്ധമുണ്ടായിരുന്ന ആളുകളിൽ നിന്നുപോലും വെറുപ്പും മാറ്റിനിർത്തലുകളും അനുഭവിക്കേണ്ടി വന്നു. ഇക്കാര്യങ്ങൾ ബോധ്യപ്പെടുത്തിയിട്ടും സാബു ജേക്കബിന് യാതൊരു കുലുക്കവുമുണ്ടായിരുന്നില്ല. തിരഞ്ഞെടുപ്പ് ഫണ്ടായി ബിജെപിയിൽ നിന്ന് 40 കോടി രൂപ സാബു ജേക്കബ് കൈപ്പറ്റിയതായി മുതിർന്ന നേതാക്കളിൽ നിന്നും അറിയാൻ കഴിഞ്ഞിട്ടുണ്ടെന്നും അദ്ദേഹം വെളിപ്പെടുത്തി. താൻ വാങ്ങാത്ത പണത്തിന്റെ പഴി എന്തിന് ചുമക്കണമെന്നും അഖിൽ ചോദിക്കുന്നു.
രാഷ്ട്രീയ അനുഭവങ്ങളുടെ വെളിച്ചത്തിൽ ട്വന്റി 20 യുമായി പൂർണ്ണമായും ബന്ധം വേർപെടുത്തിയതായി അഖിൽ മാരാർ പ്രഖ്യാപിച്ചു കഴിഞ്ഞു. തനിക്കെതിരെ ഉയർന്ന സാമ്പത്തിക ആരോപണങ്ങൾക്കും കള്ളപ്രചാരണങ്ങൾക്കും മറുപടി നൽകാൻ കൂടിയാണ് ഈ നീക്കമെന്ന് അദ്ദേഹം വ്യക്തമാക്കുന്നു. രാഷ്ട്രീയത്തിലേക്ക് ഇറങ്ങിയതോടെ തന്റെ പ്രൊഫഷണൽ ജീവിതത്തിലും വ്യക്തിജീവിതത്തിലും വലിയ നഷ്ടങ്ങളുണ്ടായതായി അദ്ദേഹം സമ്മതിക്കുന്നു. പൊതുപ്രവർത്തനം എന്നത് വ്യാപാരികളുടെ ലാഭനഷ്ടക്കണക്കല്ലെന്ന് ചൂണ്ടിക്കാട്ടിയാണ് അഖിൽ കുറിപ്പ് അവസാനിപ്പിക്കുന്നത്. അഖിലിന്റെ പുതിയ വെളിപ്പെടുത്തലുകൾക്ക് സാബു എം. ജേക്കബോ ട്വന്റി 20 നേതൃത്വമോ എങ്ങനെ മറുപടി നൽകുമെന്നാണ് രാഷ്ട്രീയ വൃത്തങ്ങൾ ഉറ്റുനോക്കുന്നത്.
English Summary:
Following his exit from the Twenty20 party, director and actor Akhil Marar has leaked screenshots of his WhatsApp chats with party coordinator Sabu M. Jacob. In a detailed post, Akhil alleged that he was betrayed regarding election seats in Kottarakkara and Thrippunithura. He also shared his financial and personal struggles, including selling his BMW bike to clear debts, and accused Sabu Jacob of not responding to him post-elections despite receiving ₹40 crore as election funds from the BJP.