കൊച്ചി: ലക്ഷദ്വീപിലെ സര്ക്കാര് നടപടികള്ക്കെതിരെ വീണ്ടും വിമര്ശനങ്ങളുമായി ഐഷ സുല്ത്താന. ദ്വീപിലെ കപ്പല് ഗതാഗതത്തെക്കുറിച്ച് വ്യാജ പ്രചരണങ്ങള് നടത്തിയതിന് അറസ്റ്റ് ചെയ്യപ്പെട്ട ഹുസൈന് എന്ന വ്യക്തിയെ അനുകൂലിച്ചുകൊണ്ടാണ് ഐഷ സുല്ത്താന രംഗത്തു വന്നിരിക്കുന്നത്.
‘നട്ടെല്ലിന്റെ സ്ഥാനത്ത് ചിലര്ക്കുള്ളത് വാഴപ്പിണ്ടിയാണ്, അവരിലാണ് ഭയമുള്ളത്. അവരുടെ തെറ്റിനെ ചൂണ്ടി കാണിക്കുന്നവരെ അവര് ഭയക്കുന്നു. രാജ്യത്തിനു സ്വാതന്ത്ര്യം കിട്ടിയത് 2014 ആണെന്ന് പറഞ്ഞ കങ്കണയുടെ പ്രസ്ഥാവന ശെരിയും, ഒപ്പം രാജ്യസ്നേഹി പട്ടവും സമ്മാനമായി കൊടുത്തു’, ഐഷ സുല്ത്താന ഫേസ്ബുക്കില് കുറിച്ചു.
ഫേസ്ബുക് കുറിപ്പിന്റെ പൂര്ണ്ണരൂപം:
നെട്ടല്ലിന്റെ സ്ഥാനത്ത് ചിലര്ക്കുള്ളത് വാഴപ്പിണ്ടിയാണ്, അവരിലാണ് ഭയമുള്ളത്. അവരുടെ തെറ്റിനെ ചൂണ്ടിക്കാണിക്കുന്നവരെ അവര് ഭയക്കുന്നു.
രാജ്യത്തിനു സ്വാതന്ത്ര്യം കിട്ടിയത് 2014 ആണെന്ന് പറഞ്ഞ കങ്കണയുടെ പ്രസ്താവന ശെരിയും,ഒപ്പം രാജ്യസ്നേഹി പട്ടവും സമ്മാനമായി കൊടുത്തു.
എന്നാല്, ജനിച്ച നാട്ടിലും, കണ്ട് വളര്ന്ന നാട്ടുകാര്ക്കെതിരെയും നടപ്പാക്കിയ കരട് നിയമത്തെ ചോദ്യം ചെയ്ത ഞങ്ങളൊക്കെ രാജ്യദ്രോഹിയും, ഒപ്പം കേസും, കൊള്ളാം.
ഹുസൈന് സാറിനൊപ്പം നാടും നാട്ടുകാരും ഒറ്റ കെട്ടായിട്ടുണ്ടാവും. ഞാന് മുന്പ് പറഞ്ഞിരുന്നില്ലേ ‘അവരില് ഉള്ളതും നമ്മില് ഇല്ലാത്തതും ഒന്നാണ് ഭയം’. നട്ടെല്ലുള്ള നാട്ടുകാരെ തൊടാന് ഒരുത്തനെ കൊണ്ടും സാധിക്കില്ല.