ന്യൂഡല്ഹി: അഹമ്മദാബാദില് അപകടത്തില്പ്പെട്ട വിമാനത്തിന്റെ ഫ്യുവല്സ്വിച്ച് ഓഫ് ചെയ്യപ്പെട്ടതാണെന്നും അത് ചെയ്തത് ക്യാപ്റ്റനാണെന്നുമുള്ള സൂചന നല്കി യുഎസ് മാധ്യമത്തിന്റെ റിപ്പോര്ട്ട്. വിമാനാപകടവുമായി ബന്ധപ്പെട്ട് ആദ്യഘട്ടത്തില് ലഭ്യമായ തെളിവുകള് പരിശോധിച്ച യുഎസ് അധികൃതരെ ഉദ്ധരിച്ചാണ് അമേരിക്കന് മാധ്യമമായ ‘വാള്സ്ട്രീറ്റ് ജേണല്’ ഇത്തരമൊരു റിപ്പോർട്ട് നല്കിയത്.
എയര്ഇന്ത്യയുടെ ബോയിങ് 787 ഡ്രീംലൈനര് വിമാനം അഹമ്മദാബാദില് തകര്ന്നുവീഴുന്നതിന് തൊട്ടുമുന്പ് കോക്പിറ്റില് നടന്ന സംഭാഷണത്തിന്റെ ശബ്ദരേഖ ബ്ലാക്ബോക്സ് പരിശോധനയിലൂടെ നേരത്തേ ലഭ്യമായിരുന്നു. എന്ജിനിലേക്കുള്ള ഇന്ധന സ്വിച്ച് ഓഫായത് സംബന്ധിച്ച് പൈലറ്റുമാര് തമ്മില് നടത്തിയ സംഭാഷണമാണ് ശബ്ദരേഖയിലുണ്ടായിരുന്നത്. എന്തിനാണ് ഓഫ് ചെയ്തതെന്ന് ഒരു പൈലറ്റ് സഹപൈലറ്റിനോട് ചോദിക്കുന്നതും താന് ചെയ്തിട്ടില്ലെന്ന് മറ്റേയാള് മറുപടി നല്കുന്നതുമാണ് ശബ്ദരേഖയിലുണ്ടായിരുന്നത്.
ഇത് ആര് ആരോട് പറഞ്ഞു എന്നതുസംബന്ധിച്ച് നേരത്തേ പുറത്തുവന്ന പ്രാഥമികാന്വേഷണ റിപ്പോര്ട്ടില് വ്യക്തമാക്കിയിരുന്നില്ല. എന്നാല്, വിമാനത്തിലെ ഫസ്റ്റ് ഓഫീസറായ ക്ലൈവ് കുന്ദര് ക്യാപ്റ്റനായ സുമീത് സഭര്വാളിനോടാണ് എന്തിനാണ് ഫ്യുവല്സ്വിച്ചുകള് കട്ട് ഓഫ് ചെയ്തതെന്ന ചോദ്യം ചോദിച്ചതെന്നാണ് വാള്സ്ട്രീറ്റ് ജേണലിന്റെ റിപ്പോര്ട്ടിലുള്ളത്.
15,638 മണിക്കൂര് വിമാനം പറത്തി പ്രവൃത്തിപരിചയമുള്ള പൈലറ്റായിരുന്നു ക്യാപ്റ്റന് സുമീത് സഭര്വാള്. വിമാനത്തിലെ ഫസ്റ്റ് ഓഫീസറായ ക്ലൈവ് കുന്ദറിന് 3,403 മണിക്കൂര് വിമാനം പറത്തിയ പരിചയവുമുണ്ട്. വിമാനം റണ്വേയില്നിന്ന് പറന്നുയര്ന്നതിന് പിന്നാലെ കൂടുതല് പ്രവൃത്തിപരിചയമുള്ള വിമാനത്തിലെ ക്യാപ്റ്റനോട് ഫസ്റ്റ് ഓഫീസറാണ് എന്തുകൊണ്ടാണ് താങ്കള് ഫ്യുവല് സ്വിച്ച് കട്ട് ഓഫ് ചെയ്തതെന്ന ചോദ്യം ചോദിച്ചതെന്നാണ് വാള്സ്ട്രീറ്റ് ജേണല് റിപ്പോര്ട്ട് ചെയ്തിരിക്കുന്നത്.
അതേസമയം, വാള്സ്ട്രീറ്റ് ജേണലിന്റെ റിപ്പോര്ട്ട് സംബന്ധിച്ച് ഇന്ത്യയിലെ വ്യോമയാന മന്ത്രാലയം, ഡയറക്ടറേറ്റ് ജനറല് ഓഫ് സിവില് ഏവിയേഷന്(ഡിജിസിഎ) എയര്ക്രാഫ്റ്റ് ആക്സിഡന്റ് ഇന്വെസ്റ്റിഗേഷന് ബ്യൂറോ(എഎഐബി) എയര്ഇന്ത്യ, പൈലറ്റുമാരുടെ രണ്ട് സംഘടനകള് എന്നിവരോട് പ്രതികരണം തേടിയെങ്കിലും മറുപടി ലഭിച്ചില്ലെന്ന് വാര്ത്താഏജന്സിയായ റോയിട്ടേഴ്സ് റിപ്പോര്ട്ട് ചെയ്തു. വാള്സ്ട്രീറ്റ് ജേണലിന്റെ റിപ്പോര്ട്ട് സംബന്ധിച്ച് പ്രതികരിക്കാന് ബോയിങ്ങും വിസമ്മതിച്ചെന്നും റോയിട്ടേഴ്സിന്റെ റിപ്പോര്ട്ടിലുണ്ട്.
ജൂണ് 12-ന് അഹമ്മദാബാദില് എയര്ഇന്ത്യ വിമാനം തകര്ന്നുവീണ് യാത്രക്കാരടക്കം 260 പേരാണ് കൊല്ലപ്പെട്ടത്. രണ്ട് പൈലറ്റുമാരും 10 ക്യാബിന് ക്രൂ അംഗങ്ങളുമടക്കം 242 യാത്രക്കാരാണ് വിമാനത്തിലുണ്ടായിരുന്നത്. ഇതില് ഒരാളൊഴികെ എല്ലാവരും മരിച്ചു. വിമാനം തകര്ന്നുവീണ മെഡിക്കല് കോളേജ് ഹോസ്റ്റല് കെട്ടിടത്തിലുണ്ടായിരുന്നവരും മരിച്ചവരില് ഉള്പ്പെടുന്നു.