ചെന്നൈ: തെന്നിന്ത്യൻ സിനിമാലോകത്തെ ആകെ ഉലച്ചുകൊണ്ട് നടൻ രവി മോഹൻ (ജയം രവി) വാർത്താസമ്മേളനത്തിൽ പൊട്ടിക്കരഞ്ഞു. ഗായിക കെനീഷ ഫ്രാൻസിസ് താനുമായുള്ള ബന്ധം പൂർണ്ണമായും ഉപേക്ഷിക്കുന്നതായി ഇൻസ്റ്റാഗ്രാമിലൂടെ പ്രഖ്യാപിച്ചതിന് തൊട്ടുപിന്നാലെയാണ് ചെന്നൈയിൽ താരം മാധ്യമങ്ങളെ കണ്ടത്. തന്റെ വ്യക്തിജീവിതത്തിലെ കടുത്ത പ്രതിസന്ധികളും ഭാര്യ ആരതിയുമായുള്ള വിവാഹമോചന തർക്കങ്ങളും കാരണം കരിയറിൽ ശ്രദ്ധ കേന്ദ്രീകരിക്കാൻ സാധിക്കുന്നില്ലെന്നും, നിയമപരമായ വിവാഹമോചന നടപടികൾ പൂർത്തിയാകുന്നതുവരെ താൻ അഭിനയരംഗത്തുനിന്നും പൂർണ്ണമായി വിട്ടുനിൽക്കുകയാണെന്നും താരം പ്രഖ്യാപിച്ചു. സിനിമയോടുള്ള തന്റെ പ്രതിബദ്ധത ചോദ്യം ചെയ്തവർക്കും നിരന്തരം വേട്ടയാടുന്ന സൈബർ അക്രമികൾക്കും നേരെ കടുത്ത ഭാഷയിലാണ് താരം പ്രതികരിച്ചത്.
“ഇത്രയും നാൾ ഞാൻ എല്ലാം സഹിച്ചു മിണ്ടാതിരുന്നു. എന്നാൽ ഇപ്പോൾ പ്രതികരിക്കേണ്ട സമയം അതിക്രമിച്ചിരിക്കുന്നു. ജയം രവി ഒരു പാവമാണെന്നാണ് എല്ലാവരും കരുതുന്നത്. ഞാൻ അങ്ങനെയായിരുന്നു, എന്നാൽ ഇനി അതല്ല. ചിലർ എന്റെ ക്ഷമ പരീക്ഷിക്കുകയാണ്. ധൈര്യമുണ്ടെങ്കിൽ എന്നോട് നേരിട്ട് ഏറ്റുമുട്ടാൻ ഞാൻ അവരോട് ആവശ്യപ്പെടുകയാണ്. കടുത്ത മാനസിക പീഡനത്തിലൂടെയാണ് ഞാൻ കടന്നുപോകുന്നത്. എന്റെ സ്വന്തം മക്കളെപ്പോലും കാണാൻ അവർ എന്നെ അനുവദിക്കുന്നില്ല. സ്വന്തം വീട്ടുകാരുടെ സമ്മതമില്ലാതെയാണ് ഞാൻ വിവാഹം കഴിച്ചത്.
അതിന്റെ വിലയാണിപ്പോൾ ഞാൻ അനുഭവിച്ചുകൊണ്ടിരിക്കുന്നത്” എന്ന് രവി മോഹൻ പറഞ്ഞു. മുൻപ് താൻ അനുഭവിച്ച കടുത്ത നിരാശയെക്കുറിച്ചും അദ്ദേഹം തുറന്നുപറഞ്ഞു; “ഞാൻ കൈഞരമ്പ് മുറിച്ച സാഹചര്യം വരെയുണ്ടായി, എന്നിട്ടും പിറ്റേന്ന് കൃത്യസമയത്ത് ഞാൻ സിനിമയുടെ ഷൂട്ടിംഗിനായെത്തി. അതാണ് എന്റെ പ്രതിബദ്ധത. പക്ഷേ ഇപ്പോൾ എനിക്ക് ഒന്നിനും ശ്രദ്ധ കേന്ദ്രീകരിക്കാൻ കഴിയുന്നില്ല.”
ഫെമിനിസത്തിന്റെ പേരിൽ ചിലർ അനാവശ്യ മുതലെടുപ്പ് നടത്തുകയാണെന്നും സൈബർ ആക്രമണങ്ങൾക്ക് ഒരു പരിധിയുണ്ടെന്നും താരം കുറ്റപ്പെടുത്തി. തന്റെ കൈവശം എല്ലാത്തിനും കൃത്യമായ തെളിവുകളുണ്ടെന്നും, താൻ അനുഭവിച്ച പീഡനങ്ങൾ ഉൾപ്പെടെയുള്ളവ വരും ദിവസങ്ങളിൽ പുറത്തുവിടുമെന്നും അദ്ദേഹം മുന്നറിയിപ്പ് നൽകി. തനിക്കൊപ്പം നിന്നതിന്റെ പേരിൽ കടുത്ത സൈബർ ബുള്ളിയിംഗ് നേരിട്ട കെനീഷയെക്കുറിച്ച് സംസാരിച്ചപ്പോൾ താരം കൂടുതൽ വൈകാരികനായി. “കെനീഷയെ നിങ്ങൾ പറഞ്ഞയച്ചു. അവൾക്ക് നല്ലൊരു ജീവിതം ആശംസിക്കുന്നു” എന്ന് പറഞ്ഞാണ് താരം പൊട്ടിക്കരഞ്ഞത്.
വാർത്താസമ്മേളനത്തിനിടെ പേരെടുത്ത് പറയാതെ തെന്നിന്ത്യയിലെ ഒരു പ്രമുഖ നടിക്കെതിരെയും രവി മോഹൻ രൂക്ഷവിമർശനം ഉന്നയിച്ചു. “ഫെമിനിസം പ്രസംഗിക്കുന്നതിൽ ഈ നിഷ്ക്രിയയായ നടിക്ക് യാതൊരു കാര്യവുമില്ല. സ്വന്തം സ്വാർത്ഥത കാരണം മറ്റുള്ളവരുടെ കുടുംബങ്ങളെ തകർത്തതിനുശേഷം പൊതുവേദികളിൽ വന്ന് സ്ത്രീവാദത്തെക്കുറിച്ചും നന്മയെക്കുറിച്ചും സംസാരിക്കാൻ അവർക്ക് എന്ത് യോഗ്യതയാണുള്ളത്?” എന്ന് താരം ചോദിച്ചു. രവി മോഹന്റെ ഈ അപ്രതീക്ഷിത പ്രഖ്യാപനവും സിനിമ നിർത്താനുള്ള തീരുമാനവും സിനിമാ വ്യവസായത്തെയും ആരാധകരെയും ഒരുപോലെ ഞെട്ടിച്ചിരിക്കുകയാണ്. കോടികൾ വിലമതിക്കുന്ന നിരവധി പ്രൊജക്ടുകളെ ജയം രവിയുടെ ഈ താൽക്കാലിക പിന്മാറ്റം ബാധിക്കുമെന്നാണ് കോളിവുഡിൽ നിന്നുള്ള പ്രാഥമിക വിലയിരുത്തൽ.
Following Keneesha Francis’s departure, actor Ravi Mohan (Jayam Ravi) broke down in tears at a press conference in Chennai, announcing a complete hiatus from acting until his divorce from Aarathi is finalized. Mohan alleged that he is being barred from seeing his children and revealed a past suicide attempt, highlighting the extreme mental trauma he has been facing. He also lashed out at an unnamed actress for practicing hypocritical feminism and stated that he possesses concrete evidence of the abuse he endured.