കൊച്ചി: വിമർശനങ്ങൾ ലാഭത്തിലൂടെ മറുപടി നൽകി ഷീ ലോഡ്ജിന്റെ ലാഭക്കണക്ക് നിരത്തുകയാണ് കൊച്ചി കോർപ്പറേഷൻ. ഷീ ലോഡ്ജ് പ്രവർത്തനം ആരംഭിച്ച് ഒരു വർഷം പിന്നിടുമ്പോൾ ലഭിച്ചത് 51.60 ലക്ഷം രൂപയാണ്. നടത്തിപ്പ് ചെലവായത് വെറും 12.53 ലക്ഷം രൂപ മാത്രം. കഴിഞ്ഞ വനിതാദിനത്തിലാണ് കൊച്ചിയിലെത്തുന്ന വനിതകൾക്ക് കുറഞ്ഞ ചെലവിൽ താമസസൗകര്യമൊരുക്കാൻ ഷീ ലോഡ്ജ് ആരംഭിച്ചത്.
പുറത്തെ ഹോട്ടലുകളിൽ താമസിക്കാൻ കുറഞ്ഞത് 500 രൂപയെങ്കിലും വേണമെങ്കിൽ വെറും 100 രൂപയ്ക്കായിരുന്നു താമസസൗകര്യം.ലോഡ്ജ് നടത്തിപ്പ് നഗരസഭ ഏറ്റെടുക്കും മുമ്പ് ലഭിച്ചിരുന്നത് വെറും ഒന്നോ രണ്ടോ ലക്ഷം രൂപയാണ്.
പിന്നീട് പേരണ്ടൂർ കനാലിനടുത്തുള്ള ചേരി നിവാസികളെ പാർപ്പിച്ചിരിക്കുകയായിരുന്നു. അതിനുശേഷം വർഷങ്ങളോളം പൂട്ടിക്കിടന്നു. ആ സ്ഥാനത്താണ് ഷീ ലോഡ്ജിന്റെ നേട്ടം. കുടുംബശ്രീയാണ് നടത്തിപ്പ്.
കോർപ്പറേഷന്റെ ഉടമസ്ഥതയിലുള്ള പഴയ ലിബ്ര ഹോട്ടലിന്റെ ഒരുഭാഗം 4.80 കോടി രൂപ ചെലവിൽ നവീകരിച്ചാണ് ഷീ ലോഡ്ജ് ഒരുക്കിയത്. ഇതേ കെട്ടിടത്തിലാണ് പത്ത് രൂപയ്ക്ക് ഉച്ചയൂണും കുറഞ്ഞനിരക്കിൽ മറ്റ് ആഹാരവും ലഭിക്കുന്ന സമൃദ്ധി@കൊച്ചി ഭക്ഷണശാല.
മുറികളെല്ലാം ബാത്ത് അറ്റാച്ച്ഡാണ്. സൗരോർജ സംവിധാനം വഴി എല്ലാ മുറികളിലും ചൂടുവെള്ളവും ലഭിക്കും. ഡ്രസിംഗ്‌ ടേബിൾ, മേശ, കസേര തുടങ്ങിയവയുമുണ്ട്.
ആധാർ കാർഡ്, നഗരത്തിൽ എത്തിയതിന്റെ കാരണം തെളിയിക്കുന്ന രേഖകൾ എന്നിവ ഹാജരാക്കണം. ഒരാൾക്ക് അഞ്ചു ദിവസം വരെ താമസിക്കാം. ഹ്രസ്വകാല കോഴ്‌സുകൾ ചെയ്യുന്നവർക്ക് ഒരു മാസം വരെ. 12 മണി വരെയാണ് പ്രവേശനം.
ചെലവ് : 4.80 കോടി
മുറികൾ : 96
ഡോർമെട്രി: 25 ബെഡ്
വാടക
ഡോർമെട്രി 100
സിംഗിൾ റൂം 200
ഡബിൾ റൂം 350
പദ്ധതിക്കായി ക്ഷേമകാര്യ സ്റ്രാൻഡിംഗ് കമ്മിറ്റി ചെയർപേഴ്സൺ ഷീബാ ലാൽ വഹിച്ച പങ്ക് നിസ്തുലമാണ്. ഉദ്യോഗസ്ഥരെയും ഷീ ലോഡ്ജിന്റെ നടത്തിപ്പുകാരെയും അഭിനന്ദിക്കുന്നു. ഈ നേട്ടം നിലനിറുത്തണം
എം. അനിൽകുമാർ
മേയർ
