കണ്ണൂർ: പഴയങ്ങാടി അതിയടം വീരൻചിറയിൽ വീടിന് മുകളിലേക്ക് പാറയിടിഞ്ഞ് വീണ് അടുക്കള തകർന്നു. ചൊവ്വാഴ്ച രാത്രിയിലാണ് വീരൻചിറയിലെ എ രഞ്ജിതയുടെ വീടിന്റെ അടുക്കളഭാഗത്ത് ഉഗ്രശബ്ദത്തോടെ കൂറ്റൻ പാറക്കല്ല് ഇടിഞ്ഞുവീണത്. തൊട്ടടുത്ത മുറിയിലുണ്ടായിരുന്ന രഞ്ജിതയും കുഞ്ഞും തലനാരിഴയ്ക്ക് രക്ഷപ്പെട്ടു.
ശബ്ദം കേട്ട ഭാഗത്ത് നോക്കിയപ്പോഴാണ് പാറക്കല്ല് ഇടിഞ്ഞുവീണത് കണ്ടത്. അടുക്കളഭാഗം പൂർണമായും തകർന്നു. വീടിന്റെ മറ്റ് ഭാഗങ്ങളിലും വിള്ളൽ വീണ നിലയിലാണ്.
2019ലെ പഞ്ചായത്ത് തെരഞ്ഞെടുപ്പിൽ വാർഡ് സ്ഥാനാർഥിയായി മത്സരിച്ചതിനെ തുടർന്ന് ഏറെ പ്രതിസന്ധികൾ നേരിടേണ്ടിവന്ന തനിക്ക് സിനിമാതാരവും ബിജെപി മുൻ എംപിയുമായിരുന്ന സുരേഷ് ഗോപിയായിരുന്നു ‘ഹീരാഭവൻ ‘ എന്ന പേരിൽ വീട് നിർമ്മിച്ച് നൽകിയതെന്നും വീട് തകർച്ചയിലായതോടെ തങ്ങൾ ഏറെ ആശങ്കയിലാണെന്നും രഞ്ജിത പറഞ്ഞു.
കനത്ത മഴ തുടരുന്ന സാഹചര്യത്തിൽ കഴിഞ്ഞ നാലുദിവസത്തിനിടെ തളിപ്പറമ്പ് താലൂക്കിൽ ഒരു വീട് പൂർണമായും 37 വീടുകൾ ഭാഗികമായും തകർന്നിട്ടുണ്ട്. തലശ്ശേരി താലൂക്കിൽ 28 വീടുകളും പയ്യന്നൂർ താലൂക്കിൽ 22 വീടുകളും ഇരിട്ടി താലൂക്കിൽ 15 വീടുകളും ഭാഗമായി തകർന്നു. കണ്ണൂർ താലൂക്കിൽ ഇരിവേരി വില്ലേജിൽ ഒരു വീട് പൂർണമായും തകർന്നു. തലശ്ശേരി താലൂക്കിൽ വീട് തകർന്ന ഒരു സ്ത്രീയെ ബന്ധുവീട്ടിലേക്ക് മാറ്റിപ്പാർപ്പിച്ചിട്ടുണ്ട്.
