2019 VU5🎙 വേഗം മണിക്കൂറില്‍ 83,934 കിലോമീറ്റര്‍; വെള്ളിയാഴ്ച ഭൂമിക്കരികിലൂടെ ഒരു ഛിന്നഗ്രഹം കടന്നുപോകും

മുംബൈ:ഇന്ത്യാഗേറ്റിനൊപ്പം വലുപ്പംവരുന്ന ഛിന്നഗ്രഹം ഭൂമിയ്ക്കു സമീപത്തുകൂടി നവംബര്‍ 1 പുലര്‍ച്ചെ കടന്നുപോകുമെന്ന മുന്നറിയിപ്പ് നല്‍കി നാസ. 2019 VU5 എന്നാണ് ഈ നിയര്‍ എര്‍ത്ത് ഒബ്ജക്ടിന്(എന്‍.ഇ.ഒ.) പേര് നല്‍കിയിരിക്കുന്നത്. ഭൂമിയോട് അപകടകരമാംവിധം ചേര്‍ന്നാണ് കടന്നുപോകുന്നതെങ്കിലും തമ്മില്‍ കൂട്ടിയിടിക്കില്ലെന്നും ഗവേഷകർ പറയുന്നു.

അപ്പോളോ ഗ്രൂപ്പില്‍പെടുന്ന ഛിന്നഗ്രഹമാണിത്. 140 അടി വീതിയും ഡല്‍ഹിയിലെ ഇന്ത്യാഗേറ്റിനൊപ്പം വലിപ്പവുമുള്ള 2019 VU5 വെള്ളിയാഴ്ച പുലര്‍ച്ച 2.42-നാണ് ഭൂമിയോട് ഏറ്റവും ചേര്‍ന്ന് വരിക. മണിക്കൂറില്‍ 83,934 കിലോമീറ്റര്‍ വേഗതയിലായിരിക്കും ഛിന്നഗ്രഹം കടന്നുപോവുക.

ഭൂമിയെ ഇടിക്കില്ലെങ്കിലും ഏതെങ്കിലും സാഹചര്യത്തില്‍ ഈ ഛിന്നഗ്രഹം നമ്മുടെ ഗ്രഹവുമായി കൂട്ടിയിടിക്കുന്നപക്ഷം വന്‍ദുരന്തമായിരിക്കും സംഭവിക്കുകയെന്നും ഗവേഷർ പറയുന്നു. ഒന്നിലധികം അണുബോംബ് സ്‌ഫോടനങ്ങള്‍ക്ക് തുല്യമായ ഊര്‍ജമായിരിക്കും ഈ കൂട്ടിയിടിയിലൂടെ പുറത്തെത്തുക. ഒരു പ്രദേശം തന്നെ പൂര്‍ണമായും ഇല്ലാതെയായേക്കാം.