തിരുവനന്തപുരം കൊവിഡ് വ്യാപനത്തേത്തുടര്‍ന്ന് നെയ്യാറ്റിന്‍കര മുന്‍സിപ്പാലിറ്റി ഹോട്ട് സ്‌പോട്ടായി സംസ്ഥാന സര്‍ക്കാര്‍ പ്രഖ്യാപിച്ച സാഹചര്യത്തില്‍ മുന്‍സിപ്പാലിറ്റിയിലെ വിവിധ വാര്‍ഡുകള്‍ ഹോട്ട് സ്‌പോട്ടായി പ്രഖ്യാപിച്ച് ജില്ലാ കളക്ടര്‍ ഉത്തരവിട്ടു. നെയ്യാറ്റിന്‍കര മുന്‍സിപ്പാലിറ്റിയിലെ വാര്‍ഡ് നമ്പര്‍ 1 മുതല്‍ 5 വരെയും 40 മുതല്‍ 44 വരെയും വാര്‍ഡ് നമ്പര്‍ 37 ഉം ഹോട്ട് സ്‌പോട്ടുകളായി പ്രഖ്യാപിച്ചു. ഈ പ്രദേശങ്ങളില്‍ ഓഫീസുകള്‍ അടക്കമുള്ള പൊതു സ്ഥലങ്ങള്‍ അണുവിമുക്തമാക്കുന്നതിന് നടപടി സ്വീകരിക്കും.
രാവിലെ 7 മുതല്‍ ഉച്ചക്ക് രണ്ടു വരെ അവശ്യവസ്തുക്കള്‍ വില്‍ക്കുന്ന കടകള്‍ പ്രവര്‍ത്തിക്കും. സര്‍ക്കാര്‍ ഓഫീസുകള്‍ പരിമിതമായ ജീവനക്കാരെ ഉപയോഗിച്ച് പ്രവര്‍ത്തിക്കും. ഏതു സാഹചര്യത്തിലും കേരള തമിഴ്നാട് അതിര്‍ത്തിയില്‍ ചരക്കുഗതാഗതം സുഗമമായി നടക്കുന്നുണ്ടെന്ന് ഉറപ്പാക്കുമെന്ന് കളക്ടര്‍ അറിയിച്ചു. നെയ്യാറ്റിന്‍കര പി.ഡബ്‌ളിയു.ഡി റസ്റ്റ് ഹൗസില്‍ കളക്ടറുടെ അധ്യക്ഷതയില്‍ യോഗം ചേര്‍ന്ന് സാഹചര്യങ്ങള്‍ വിലയിരുത്തി. ആളുകളുടെ അന്തര്‍ സംസ്ഥാന യാത്ര ആരംഭിക്കുമ്പോള്‍ ആവശ്യമാകുന്ന സംവിധാനങ്ങള്‍ ഒരുക്കുന്നതുമായി ബന്ധപ്പെട്ട് അതിര്‍ത്തിയിലെ ഇഞ്ചി വിളയില്‍ കളക്ടര്‍ സന്ദര്‍ശനം നടത്തി.