കണ്ണൂര്‍: സി.പി.എം സംസ്ഥാന സെക്രട്ടറി എ വിജയരാഘവനെതിരെ രൂക്ഷവിമര്‍ശനവുമായി കെപിസിസി വര്‍ക്കിംഗ് പ്രസിഡന്റും കണ്ണൂര്‍ എംപിയുമായ കെ സുധാകരന്‍ രംഗത്ത്. വിജയരാഘവന് ഇരിക്കുന്ന സ്ഥാനത്തെ അപമാനിക്കാന്‍ തനിക്ക് താത്പര്യമില്ലെന്നും എന്നാല്‍ കനക സിംഹാസനത്തില്‍ ഇരിക്കുന്നവന്‍ കനകനോ ശുംഭനോ ശുനകനോ എന്ന ചോദ്യത്തിന് പ്രസക്തിയുണ്ടെന്നുമായിരുന്നു സുധാകരന്റെ വിമര്‍ശനം.
കോണ്‍ഗ്രസ് നേതാക്കള്‍ പാണക്കാടെത്തി ലീഗ് നേതൃത്വവുമായി കൂടിക്കാഴ്ച നടത്തിയതിനെതിരെ അതിരൂക്ഷ വിമര്‍ശനവുമായി രംഗത്തു വന്ന സി പി എം സംസ്ഥാന സെക്രട്ടറി എ വിജയരാഘവന് മറുപടി പറയുകയായിരുന്നു കെ സുധാകരന്‍. വിജയരാഘവന് നാണമില്ലെങ്കിലും പാര്‍ട്ടിക്ക് നാണം വേണമെന്നും സുധാകരന്‍ പറഞ്ഞു.
യുഡിഎഫിലെ ഘടകകക്ഷി നേതാക്കളുടെ വീടുകള്‍ കോണ്‍ഗ്രസ് നേതാക്കള്‍ സന്ദര്‍ശിക്കുന്നതില്‍ എന്താണ് തെറ്റെന്നും പാണക്കാടേക്ക് ഇനിയും പോകുമെന്നും ചര്‍ച്ച നടത്തുമെന്നും കെ സുധാകരന്‍ പറഞ്ഞു. തദ്ദേശതിരഞ്ഞെടുപ്പിലെന്ന പോലെ നിയമസഭാ തിരഞ്ഞെടുപ്പിലും സിപിഎം – ബിജെപി കൂട്ടുകെട്ടുണ്ടാവും. അതിനുളള ചര്‍ച്ചകള്‍ അണിയറയില്‍ നടക്കുന്നുണ്ട്. കെപിസിസി അദ്ധ്യക്ഷസ്ഥാനം കാത്തിരിക്കുകയല്ല താനെന്നും പാര്‍ട്ടി തന്നെ ഏല്‍പ്പിക്കുന്ന ഏതു സ്ഥാനവും താന്‍ സ്വീകരിക്കുമെന്നും കെ സുധാകരന്‍ പറഞ്ഞു.