തൊടുപുഴ: ജോലിസ്ഥലത്തുനിന്നും സ്‌കൂട്ടറില്‍ വീട്ടിലേക്കു മടങ്ങിയ യുവതിയെ പിന്തുടര്‍ന്ന് പീഡിപ്പിക്കാന്‍ ശ്രമം. ഉടുമ്പന്നുരിനു സമീപം വിജനമായ സ്ഥലത്തുവച്ച് യുവതിയെ തടഞ്ഞുനിര്‍ത്തി പീഡിപ്പിക്കാന്‍ ശ്രമിക്കുകയും ശാരീരികമായി ഉപദ്രവിക്കുകയും ചെയ്ത കേസില്‍ ഉടുമ്പന്നൂര്‍ കളപ്പുരയ്ക്കല്‍ മാഹിന്‍ റഷീദ് (23) അറസ്റ്റില്‍.
ഈ മാസം 2നു രാത്രി എട്ടോടെയാണ് സംഭവം. യുവതി കരഞ്ഞപ്പോള്‍ വായ പൊത്തിപ്പിടിച്ച ശേഷമാണ് ഉപദ്രവിച്ചത്. കരിമണ്ണൂര്‍ എസ്‌ഐ കെ. സിനോദിന്റെ നേതൃത്വത്തിലുള്ള അന്വേഷണ സംഘമാണ് പ്രതിയെ അറസ്റ്റ് ചെയ്തത്.
വിവിധ ഇടങ്ങളിലെ സിസിടിവി ദൃശ്യങ്ങള്‍ പരിശോധിച്ചു നടത്തിയ അന്വേഷണത്തിലാണു പ്രതിയെ പിടികൂടാനായത്. പ്രതിയെ യുവതി തിരിച്ചറിഞ്ഞു. കഞ്ചാവ് ഉപയോഗിക്കുന്നവരെപ്പറ്റി നിരീക്ഷണം നടത്തിയതില്‍ നിന്നാണ് പ്രതിയെക്കുറിച്ചു സൂചന ലഭിച്ചത്.
കരിമണ്ണൂര്‍ പൊലീസ് സ്റ്റേഷനില്‍ അടിപിടിക്കേസിലും കഞ്ചാവു കേസിലും മാഹിന്‍ റഷീദ് പ്രതിയാണെന്ന് പൊലീസ് പറഞ്ഞു. പൊലീസ് സംഘത്തെ തിരിച്ചറിഞ്ഞ പ്രതി കടന്നുകളയാന്‍ ശ്രമിച്ചെങ്കിലും പൊലീസ് സാഹസികമായി കീഴ്‌പ്പെടുത്തി.
