ന്യൂഡല്ഹി: താല്ക്കാലികമായി അടച്ച 32 വിമാനത്താവളങ്ങള് ഈ മാസം 14 വരെ പ്രവര്ത്തിക്കില്ല. ചണ്ഡിഗഡ്, ശ്രീനഗര്, അമൃത്സര്, ലുധിയാന, കുളു- മണാലി, കിഷന്ഗഡ്, പട്യാല, ഷിംല, കാംഗ്ര, ഭട്ടിന്ഡ, ജയ്സല്മേര് എന്നീ വിമാനത്താവളങ്ങളും വിവിധ സംസ്ഥാനങ്ങളില് പ്രതിരോധ ആവശ്യങ്ങള്ക്കായി ഉപയോഗിക്കുന്ന വിമാനത്താവളങ്ങളും കൂട്ടത്തിലുണ്ട്.
ജമ്മു, ശ്രീനഗര്, ലേ, ജോധ്പുര്, അമൃത്സര്, ചണ്ഡിഗഡ്, ഭുജ്, ജാംനഗര്, രാജ്കോട്ട് എന്നിവിടങ്ങളിലേക്കുള്ള എയര് ഇന്ത്യ ഫ്ലൈറ്റുകള് 15 വരെ റദ്ദാക്കി. ഉത്തരേന്ത്യയിലെ പല ചെറുവിമാനത്താവളങ്ങളും അടച്ചതു മൂലം ഡല്ഹി വിമാനത്താവളത്തില് തിരക്കേറി. ഡല്ഹി വഴിയുള്ള 138 വിമാനസര്വീസുകള് റദ്ദാക്കി. പാക്കിസ്ഥാനെ പിന്തുണയ്ക്കുന്ന തുര്ക്കി, അസര്ബൈജാന് എന്നിവിടങ്ങളിലേക്കുള്ള ടിക്കറ്റ് ബുക്കിങ് പല ഇന്ത്യന് ബുക്കിങ് പ്ലാറ്റ്ഫോമുകളും നിര്ത്തി. ഈ രാജ്യങ്ങളിലേക്കുള്ള അനിവാര്യമല്ലാത്ത യാത്രകള് ഒഴിവാക്കാനും ചില പ്ലാറ്റ്ഫോമുകള് നിര്ദേശിച്ചിട്ടുണ്ട്.
രാജ്യത്തെ എല്ലാ വിമാനത്താവളങ്ങളിലും ദേഹപരിശോധനയും ഐഡി പരിശോധനയും കൂടുതല് കര്ശനമാക്കി. യാത്രക്കാര് 3 മണിക്കൂര് മുന്പെത്തണം. ബോര്ഡിങ് ഗേറ്റ് യാത്രയ്ക്ക് 75 മിനിറ്റ് മുന്പ് അടയ്ക്കും. സിഐഎസ്എഫ് പരിശോധനയ്ക്കു ശേഷം ബോര്ഡിങ് ഗേറ്റിനടുത്ത് എയര്ലൈന് ജീവനക്കാര് വീണ്ടും പരിശോധന നടത്തും. ടെര്മിനല് കെട്ടിടങ്ങളില് യാത്രക്കാരല്ലാത്തവരെ വിലക്കി.