കോട്ടയം: ഗാന്ധിനഗർ പോലീസ് സ്റ്റേഷനിലെ ഗ്രേഡ് എസ്ഐ കൈക്കൂലി വാങ്ങുന്നതിനിടെ വിജിലൻസിൻ്റെ പിടിയിലായി. ഗാന്ധിനഗർ സ്റ്റേഷനിലെ ഗ്രേഡ് എസ്ഐ നസീർ വി എച്ചിനെയാണ് കോട്ടയം വിജിലൻസ് ആന്റ് ആന്റി കറപ്ഷൻസ് ബ്യൂറോ എസ്പി വി ജി വിനോദ് കുമാറിന്റെ നേതൃത്വത്തിലുള്ള സംഘം പിടികൂടിയത്.
കോട്ടയം മെഡിക്കൽ കോളേജിനു സമീപത്തുള്ള കേരള ടൂറിസ്റ്റ് ഹോമിൽ മുറിയെടുത്ത ശേഷം പരാതിക്കാരനിൽനിന്നു പണവും മദ്യക്കുപ്പിയും ഇയാൾ കൈക്കൂലിയായി വാങ്ങുകയായിരുന്നു. പരാതിക്കാരൻ വിവരം അറിയിച്ചത് അനുസരിച്ചു സ്ഥലത്ത് എത്തിയ വിജിലൻസ് സംഘം നസീറിനെ പിടികൂടുകയായിരുന്നു.
കല്ലറയിൽ നിയന്ത്രണം വിട്ട കുടിവെള്ള ടാങ്കർ ലോറി ഓട്ടോറിക്ഷയിൽ ഇടിച്ച് ഒരാൾ മരിച്ചു
കോട്ടയം: കല്ലറ കുരിശുപള്ളിയിൽ നിയന്ത്രണം വിട്ട കുടിവെള്ള ടാങ്കർ ലോറി ഓട്ടോറിക്ഷയിൽ ഇടിച്ച് ഒരാൾ മരിച്ചു. രണ്ടു പേർക്കു പരിക്കേറ്റു. ഒപ്പമുണ്ടായിരുന്നയാളെ അപകടത്തിൽ ഗുരുതരമായി പരിക്കേറ്റ് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. അപകടത്തിൽ മരിച്ചയാളെയും പരിക്കേറ്റവരെയും തിരിച്ചറിഞ്ഞിട്ടില്ല.
ബുധനാഴ്ച വൈകിട്ട് ഏഴരയോടെ കല്ലറ കുരിശുപള്ളിയ്ക്കു സമീപമായിരുന്നു അപകടം. ഏറ്റുമാനൂർ ഭാഗത്തു നിന്നും ഓട്ടോറിക്ഷയിൽ കല്ലറയിലേയ്ക്കു പോകുകയായിരുന്നു ഓട്ടോറിക്ഷ. കല്ലറ ജംഗ്ഷന് മീറ്ററുകൾ മുന്നിലായി നിയന്ത്രണം വിട്ട കുടിവെള്ള ടാങ്കർ ലോറി എതിർദിശയിൽ നിന്നും എത്തിയ ഓട്ടോറിക്ഷയുമായി ഇടിക്കുകയായിരുന്നുവെന്നു ദൃക്‌സാക്ഷികൾ പറഞ്ഞു.
അപകടത്തെ തുടർന്നു ടാങ്കർ ലോറിയും ഓട്ടോറിക്ഷയും റോഡിൽ മറിഞ്ഞതായി നാട്ടുകാർ പറയുന്നു. ഓടിക്കൂടിയ നാട്ടുകാർ ചേർന്ന് ആംബുലൻസ് വിളിച്ചു വരുത്തി പരിക്കേറ്റവരെ കോട്ടയം മെഡിക്കൽ കോളേജ് ആശുപത്രിയിൽ എത്തിച്ചു. ആശുപത്രിയിൽ എത്തിച്ച ശേഷമാണ് ഒരാളുടെ മരണം സംഭവിച്ചത്. അപകടത്തെ തുടർന്നു റോഡിൽ പടർന്നൊഴുകിയ രക്തവും ഡീസലും അടക്കമുള്ളവ കോട്ടയത്തുനിന്നു അഗ്നിരക്ഷാസേനാ യൂണിറ്റ് സംഘം എത്തിയാണ് കഴുകിക്കളഞ്ഞത്.
