കൊച്ചി:ഹരി ഉപയോഗം നടക്കുന്നതിനാല്‍ മകനെ സിനിമയില്‍ വിടില്ലെന്ന ടിനി ടോമിന്‍റെ പരാമർശത്തോട് പ്രതികരിച്ച് സംവിധായകൻ രഞ്ജൻ പ്രമോദ്. ലഹരിയെ പേടിച്ച് സിനിമയില്‍ മാത്രമല്ല സ്കൂളിലും കുട്ടികളെ അയക്കാന്‍ പറ്റില്ലെന്നും മകനെ ടിനി ടോം വീട്ടിലെ റൂമില്‍ അടച്ചിടേണ്ടിവരുമെന്നും അദ്ദേഹം പറഞ്ഞു.
ഒരു ഓൺലൈൻ മീഡിയക്ക് നല്‍കിയ അഭിമുഖത്തിലാണ് രഞ്ജൻ പ്രമോദ് ഇക്കാര്യം പറഞ്ഞത്. ‘ലഹരി പേടിച്ച് സിനിമയില്‍ മാത്രമല്ല സ്കൂളിലും കുട്ടികളെ അയക്കാന്‍ പറ്റില്ല. മകനെ ടിനി ടോം വീട്ടിലെ റൂമില്‍ അടച്ചിടേണ്ടിവരും പുറത്തേക്ക് വിട്ടാല്‍ മുഴുവൻ ലഹരിയാണ്. എവിടെ പോയാലും ലഹരിയാണ്.
മകനെ പറഞ്ഞ് മനസിലാക്കണം ഇത് ചെയ്യാന്‍ പാടില്ലെന്ന്. ഒപ്പം മകനില്‍ അല്‍പ്പം വിശ്വാസം അര്‍പ്പിക്കണം. ആരെങ്കിലും എന്തെങ്കിലും വായിലിട്ടാല്‍ കഴിക്കുന്ന പൊട്ടനല്ല മകന്‍ എന്ന് അംഗീകരിക്കണം. അവന് വെളിവുണ്ടെന്നും. അവന് പശുവല്ല കയറിട്ട് വലിക്കാന്‍ എന്നും ടിനി ടോം മനസിലാക്കുക എന്നതെ ഇതില്‍ പറയാനുള്ളൂ’, രഞ്ജൻ പ്രമോദ് പറഞ്ഞു.
തന്റെ പുതിയ ചിത്രമായ ‘ഓ ബേബി’യുടെ പ്രൊമോഷനുമായി ബന്ധപ്പെട്ട് നൽകിയ അഭിമുഖത്തിലാണ് രഞ്ജൻ പ്രമോദ് പ്രതികരിച്ചത്. സംവിധായകനും നടനുമായ ദിലീഷ് പോത്തൻ ആദ്യമായി നായകനാവുന്ന ചിത്രമാണ് ‘ഒ ബേബി’. ത്രില്ലർ ഗണത്തിൽ പെടുന്ന ചിത്രത്തിൽ രഘുനാഥ്‌ പലേരി, ഹാനിയ നസീഫ, നടൻ എം ജി സോമന്റെ മകനായ സജി സോമൻ, ഷിനു ശ്യാമളൻ, അതുല്യ ഗോപാലകൃഷ്ണൻ, വിഷ്ണു അഗസ്ത്യ എന്നിവരാണ് മറ്റ് പ്രധാന കഥാപാത്രങ്ങൾ അവതരിപ്പിക്കുന്നത്.
ദിലീഷ് പോത്തൻ, അഭിഷേക് ശശിധരൻ, പ്രമോദ് തേവർപള്ളി എന്നിവരാണ് ചിത്രം നിർമ്മിക്കുന്നത്. അരുൺ ചാലിൽ ക്യാമറ നിർവഹിക്കുന്ന ചിത്രത്തിന്റെ എഡിറ്റർ സംജിത്ത് മുഹമ്മദാണ്. വരുൺ കൃഷ്ണ, പ്രണവ് ദാസ് ചേർന്ന് ഗാനങ്ങൾക്ക് ഈണം നൽകുന്ന ചിത്രത്തിന് പശ്ചാത്തല സംഗീതം ഒരുക്കിയത് ലിജിൻ ബാംബിനോ ആണ്.
