കോട്ടയം: യാക്കോബായ സഭയ്ക്ക് നീതി ഉറപ്പാക്കാൻ ആർജ്ജവമുള്ള സർക്കാരാണ് ഇവിടെ ഉള്ളതെന്നാണ് വിശ്വാസമെന്ന് യാക്കോബായ മെത്രാപ്പൊലിത്തൻ ജോസഫ് ഗ്രിഗോറിയസ്. സഭയ്ക്ക് സഹായം ചെയ്യുന്നവരെ തിരിച്ചും സഹായിക്കും.
2017ലെ കോടതിവിധിയുടെ ഘട്ടത്തിൽ ആ വിധി നീതിയല്ലെന്ന് പറഞ്ഞ മുഖ്യമന്ത്രി ഇവിടെയുണ്ടെന്നത് പ്രതീക്ഷയാണ്. പുതുപ്പള്ളിയിൽ സഭയ്ക്ക് സമദൂര നിലപാടാണ് ഉള്ളതെന്നും ജോസഫ് ഗ്രിഗോറി പറഞ്ഞു. എൽഡിഎഫ് സ്ഥാനാർഥി ജെയ്ക് സി തോമസുമായുള്ള കൂടിക്കാഴ്ചയ്ക്ക് ശേഷമായിരുന്നു പ്രതികരണം.
“സർക്കാർ കഴിഞ്ഞ ഏഴുവർഷക്കാലം സഗൗരവം സഭയുടെ വിഷയത്തിൽ ഇടപെട്ടിട്ടുണ്ട്. സർക്കാർ പലകാര്യങ്ങളും ചെയ്തുതന്നിട്ടുണ്ട്. എന്നാൽ നിയമനിർമ്മാണത്തിലൂടെ യാക്കോബായ സുറിയാനി സഭയുടെ വിഷയം മസങ്കര ചർച്ച് ബില്ലുകൊണ്ട് പരിഹരിക്കാമെന്നുള്ള സർക്കാരിന്‍റെ തീരുമാനം അത് അന്തിമഘട്ടത്തിലെത്തി നിൽക്കുകയാണ്.
ആ കാര്യത്തിൽ കൂടുതൽ സാവകാശം വരുന്നതിൽ വിശ്വാസികൾക്ക് അൽപ്പം ആശങ്കയുണ്ടെങ്കിലും സഭയ്ക്ക് നീതി ഉറപ്പാക്കുന്നതിൽ ഇപ്പോഴത്തെ സർക്കാർ പ്രതിജ്ഞാബദ്ധമാണെന്നാണ് ഞാൻ വിശ്വസിക്കുന്നത്. അതിനുവിരുദ്ധമായി വിശ്വസിക്കേണ്ട ഒരു കാര്യമില്ല.” ജോസഫ് ഗ്രിഗോറിയസ് പറഞ്ഞു.
പുതുപ്പള്ളി സ്ഥാനാർഥി ജെയ്ക് സി തോമസും മന്ത്രി വിഎൻ വാസവനുമാണ് യാക്കോബായ മെത്രാപ്പൊലിത്തൻ ജോസഫ് ഗ്രിഗോറിയസിനെ അരമനയിലെത്തി കണ്ടത്. ഈ കൂടിക്കാഴ്ചയ്ക്ക് ശേഷം മാധ്യമങ്ങളെ കണ്ടപ്പോഴാണ് സർക്കാരിനെ പുകഴ്ത്തി അദ്ദേഹം സംസാരിച്ചത്. ആർക്ക് വോട്ട് ചെയ്യണമെന്ന് സഭ പറയുന്നില്ല. പുതുപ്പള്ളിയിൽ സമദൂര നിലപാടാണ് സഭയ്ക്കുള്ളതെന്ന് വേണമെങ്കിൽ പറയാമെന്നും അദ്ദേഹം പറഞ്ഞു.
അതേസമയം പുതുപ്പള്ളിയിൽ ബിജെപിയും സ്ഥാനാർഥിയെ പ്രഖ്യാപിച്ചിട്ടുണ്ട്. ബിജെപിയുടെ കോട്ടയം ജില്ലാ പ്രസിഡന്‍റ് ജി ലിജിൻലാലാണ് സ്ഥാനാർഥി. കഴിഞ്ഞ നിയമസഭാ തെരഞ്ഞെടുപ്പില്‍ കടുത്തുരുത്തി മണ്ഡലത്തില്‍ സ്ഥാനാര്‍ഥിയായിരുന്നു ലിജിൻലാൽ. യുവമോർച്ച ജില്ലാ പ്രസിഡന്‍റ്, ജനറൽ സെക്രട്ടറി എന്നീ നിലകളിൽ പ്രവർത്തിച്ചിട്ടുണ്ട്.
