റിയാലിറ്റി ഷോയില്‍ കണ്ടുമുട്ടി,മാലിക്കും സനയും മൂന്ന് വർഷമായി പ്രണയത്തില്‍;നടിയുടെ സുഹൃത്തുക്കൾപോലും ഒന്നും അറിഞ്ഞില്ല
ഇസ്‌ലാമബാദ്ന്മ പാക്കിസ്ഥാന്‍ ക്രിക്കറ്റ് താരം ശുഐബ് മാലിക്കും ഭാര്യ സന ജാവേദും വിവാഹിതരാകുന്നതിനു മുന്‍പു മൂന്നു വര്‍ഷത്തോളം അടുപ്പത്തിലായിരുന്നെന്നു പാക്കിസ്ഥാന്‍ മാധ്യമങ്ങള്‍. കഴിഞ്ഞ ദിവസമാണ് സനയുമൊത്തുള്ള വിവാഹ ചിത്രം മാലിക്ക് സമൂഹമാധ്യമത്തില്‍ പങ്കുവച്ചത്. സന ജാവേദിന്റെ അടുത്ത സുഹൃത്തുക്കള്‍ പോലും വിവാഹത്തെക്കുറിച്ച് അറിഞ്ഞിരുന്നില്ലെന്ന് ഒരു പാക്ക് മാധ്യമം റിപ്പോര്‍ട്ട് ചെയ്തു. ഇന്ത്യന്‍ ടെന്നിസ് താരം സാനിയ മിര്‍സയുമായുള്ള ബന്ധം അവസാനിപ്പിച്ച ശേഷമാണ് മാലിക്ക് പാക്ക് നടിയെ വിവാഹം ചെയ്തത്.
സാനിയയ്ക്കും മാലിക്കിനും അഞ്ചു വയസ്സുള്ള മകനുണ്ട്. സാനിയയ്‌ക്കൊപ്പമാണു മകന്‍ താമസിക്കുന്നത്. സന ജാവേദിന്റെ രണ്ടാം വിവാഹമാണിത്. ഗായകനായ ഉമര്‍ ജസ്വാളിനെയാണ് സന ആദ്യം വിവാഹം കഴിച്ചത്. എന്നാല്‍ 2023 ല്‍ ഇരുവരും വേര്‍പിരിഞ്ഞു. പാക്ക് മാധ്യമമായ സമ ടിവിയിലെ ഒരു മാധ്യമ പ്രവര്‍ത്തകനാണ് മാലിക്ക് പാക്കിസ്ഥാനി നടിയുമായി പ്രണയത്തിലായ വിവരം ആദ്യം പുറത്തുവിടുന്നത്.
ഒരു റിയാലിറ്റി ഷോയുടെ സ്റ്റേജില്‍വച്ചാണ് മാലിക്കും സനയും കണ്ടുമുട്ടുന്നത്. അതിനു ശേഷം ശുഐബ് മാലിക്ക് പങ്കെടുത്ത പല ടെലിവിഷന്‍ പരിപാടികളിലും സനയുമെത്തി. മാലിക്കിന്റെ പ്രത്യേക നിര്‍ദേശ പ്രകാരമാണ് നടിയെയും പരിപാടികളിലേക്കു ക്ഷണിച്ചത്.
മാലിക്ക് സനയുമായി അടുപ്പത്തിലാണെന്ന് അറിഞ്ഞ സാനിയ മിര്‍സ, ഇക്കാര്യം പാക്ക് താരത്തിന്റെ ബന്ധുക്കളോടു പറഞ്ഞിരുന്നു. തുടര്‍ന്ന് മാലിക്കിന്റെ കുടുംബം ദുബായിലെത്തി പ്രശ്‌നം പരിഹരിക്കാന്‍ ശ്രമിച്ചു. മാലിക്കിന്റെ മൂത്ത സഹോദരിയുടെ ഭര്‍ത്താവ് ഇമ്രാന്‍ സഫറാണ് ഇക്കാര്യത്തില്‍ കൂടുതല്‍ ചര്‍ച്ചകള്‍ നടത്തിയത്.
എന്നാല്‍ വിവാഹ ബന്ധം തുടരേണ്ടതില്ലെന്ന് മാലിക്കും സാനിയയും തീരുമാനിച്ചു. കുടുംബത്തില്‍ പ്രശ്‌നങ്ങള്‍ തുടങ്ങിയപ്പോള്‍ മുതല്‍ സാനിയയ്‌ക്കൊപ്പമായിരുന്നു മാലിക്കിന്റെ കുടുംബം നിന്നത്. മാലിക്കിന്റെ മൂന്നാം വിവാഹത്തില്‍ ബന്ധുക്കളാരും പങ്കെടുത്തതുമില്ല.
ശുഐബ് മാലിക്കിന് സ്ത്രീകളുമായുള്ള വഴിവിട്ട ബന്ധങ്ങളില്‍ സാനിയ മിര്‍സ മനംമടുത്തിരുന്നെന്ന വെളിപ്പെടുത്തലുമായി മാലിക്കിന്റെ സഹോദരി തന്നെ രംഗത്തെത്തി. സന ജാവേദുമായി നടന്ന മാലിക്കിന്റെ മൂന്നാം വിവാഹത്തിനോട് കുടുംബാംഗങ്ങള്‍ക്ക് കടുത്ത വിയോജിപ്പ് ഉണ്ടായിരുന്നുവെന്നും പാക്ക് മാധ്യമങ്ങള്‍ റിപ്പോര്‍ട്ടു ചെയ്തു.
പ്രസവശേഷം ടെന്നിസ് കോര്‍ട്ടിലേക്ക് മടങ്ങിയെത്തിയ സാനിയ മിര്‍സ കഴിഞ്ഞ ഫെബ്രുവരിയിലാണ് വിരമിച്ചത്. 20 വര്‍ഷം നീണ്ട ടെന്നിസ് കരിയറില്‍ 43 ഡബിള്‍സ് കിരീട നേട്ടങ്ങളില്‍ സാനിയ പങ്കാളിയായി.
