കൊച്ചി:എ.വി ഗോപിനാഥിനെ പാർട്ടിയിലേക്ക് തിരിച്ചുകൊണ്ടുവരണമെന്ന് കോൺഗ്രസ് നേതാവ് പത്മജ വേണുഗോപാൽ. ഗോപിനാഥിനെ പോലെ കഴിവുള്ള നേതാക്കളെ മാറ്റിനിർത്തിയതാണ് പാർട്ടിക്ക് സംഭവിച്ച തകർച്ചയ്ക്ക് കാരണമെന്നും പത്മജ പറഞ്ഞു.
ഗോപിനാഥിനെ കാലങ്ങളായി നന്നായി അറിയാം. കരുണാകരന്റെ വിശ്വസ്തരുടെ കൂട്ടത്തിലുള്ള ആളായിരുന്നു അദ്ദേഹം. എല്ലാവരുംകൂടി ഗോപിനാഥിന് ദ്രോഹിക്കുന്നത് കണ്ടപ്പോൾ പലപ്പോഴും ഇക്കാര്യം പറയണമെന്ന് തോന്നിയിരുന്നു. ഇപ്പോഴെങ്കിലും ഇക്കാര്യം പറഞ്ഞില്ലെങ്കിൽ അച്ഛന്റെ ആത്മാവിനോട് ചെയ്യുന്ന നീതികേടായിരിക്കുമെന്നും പത്മജ പറഞ്ഞു.
മനസിൽ തോന്നിയ കാര്യം മാത്രമാണ് താൻ പറഞ്ഞത്. ഇതൊരിക്കലും നേതൃത്വത്തിനെതിരല്ല. ഗോപിനാഥിന് പാർട്ടിയിലേക്ക് തിരിച്ചുവരാൻ ഇനിയും സമയമുണ്ട്. അദ്ദേഹത്തെ തിരിച്ചുകൊണ്ടുവരാൻ അവസരം ലഭിക്കുകയാണെങ്കിൽ അതുചെയ്യുമെന്നും അവർ പറഞ്ഞു. ഗോപിനാഥിനെ കോൺഗ്രസിൽ തിരിച്ചെത്തിക്കണമെന്ന് പരസ്യമായി ഫെയ്സ്ബുക്ക് കുറിപ്പിലൂടെയും പത്മജ ആവശ്യപ്പെട്ടിരുന്നു.
കെപിസിസി പട്ടികയിൽ സ്ത്രീകൾക്ക് വേണ്ടത്ര പ്രാധാന്യം ലഭിച്ചില്ലെന്നും പത്മജ കുറ്റപ്പെടുത്തി. ഉയർന്ന സ്ഥാനങ്ങളിലും വനിതകളെ നിയോഗിക്കാം. അവർക്ക് അതിനുള്ള കഴിവുണ്ടെന്നും പത്മജ പറഞ്ഞു.
ഫെയ്സ്ബുക്ക് പോസ്റ്റിന്റെ പൂർണരൂപം
എ.വി ഗോപിനാഥിനെ പോലുള്ളവരെ തിരിച്ചു കോൺഗ്രസ്സിലേക്ക് കൊണ്ട് വരണം. ഗോപിനാഥിന്റെ കഴിവ് നേരിട്ടു കണ്ടിട്ടുള്ള ഒരാളാണ് ഞാൻ.
ഒരിക്കൽ രാമനിലയത്തിൽ വെച്ച് അച്ഛൻ ഒരു കാര്യം ഗോപിനാഥിനെ ഏൽപ്പിക്കുന്നത് ഞാൻ കണ്ടു. എനിക്കു കേട്ടപ്പോൾ അസാധ്യം എന്ന് തോന്നിയ ഒരു കാര്യം. ഞാൻ അത് ചെയ്തിട്ടേ ഇനി ലീഡറുടെ മുൻപിൽ വരൂ എന്ന് പറഞ്ഞു . അതു പോലെ തന്നെ സംഭവിച്ചു. ഞാൻ അത്ഭുതപ്പെട്ടു പോയി, അങ്ങനെയുള്ള നേതാക്കളെ മാറ്റിനിർത്തിയതാണ് നമുക്ക് ഇന്ന് സംഭവിച്ചിരിക്കുന്ന തകർച്ച. ഇങ്ങനെയുള്ളവരെ മുന്നിലേക്ക് കൊണ്ടുവരണം.
