കണ്ണൂര്‍: പയ്യന്നൂർ കുന്നരു സ്വദേശിനിയായ സഹകരണസൊസൈറ്റി ജീവനക്കാരി സ്ഥാപനത്തിൽ തൂങ്ങിമരിച്ച സംഭവത്തിൽ ദുരൂഹതനീക്കാൻ പോലീസ് അന്വേഷണമാരംഭിച്ചു. കൊവ്വപ്പുറത്തെ കുഞ്ഞിമംഗലം അഗ്രിക്കൾച്ചർ വെൽഫേർ സൊസൈറ്റി ജീവനക്കാരി കുന്നരുവിലെ കടവത്ത് വളപ്പിൽ കെവി സീന(45) ഓഫീസിൽ തൂങ്ങിമരിച്ച സംഭവത്തിൽ പരിയാരം പോലീസ് അസ്വാഭാവിക മരണത്തിന് കേസെടുത്ത് അന്വേഷണം ഊർജ്ജിതമാക്കിയിട്ടുണ്ട്.
സീന സ്വന്തം വസ്ത്രത്തിനുള്ളിലും മരിച്ച മുറിയിലെ മേശപ്പുറത്ത് ഒട്ടിച്ചുവെക്കുകയും ചെയ്ത ആത്മഹത്യാകുറിപ്പിൽ തന്റെ മരണത്തിന് കാരണക്കാരായ സഹകരണ മേഖലയുമായി ബന്ധമുളള വ്യക്തിയെക്കുറിച്ച് പറയുന്നുണ്ടെങ്കിലും കൂടുതൽ അന്വേഷണം നടത്തി ബന്ധുക്കളുടെയും സഹപ്രവർത്തകരുടെയും മൊഴിയെടുത്ത ശേഷം മാത്രമേ കത്തിൽ പരാമർശിച്ച വ്യക്തിയുടെ പേരിൽ ആത്മഹത്യാ പ്രേരണാകുറ്റത്തിന് കേസെടുക്കണമോയെന്ന് തീരുമാനമെടുക്കുകയുളളുവെന്ന് പോലീസ് പറഞ്ഞു.
തന്റെ മരണത്തിന് ഈ വ്യക്തിക്ക് മാത്രമാണ് ഉത്തരവാദിത്വമെന്നും മറ്റാർക്കും ഇതിൽ പങ്കില്ലെന്നും അയാളെ വിടരുതെന്നുമാണ് കത്തിൽ ഉള്ളതെന്നാണ് സൂചന. സീനയുടെ മൃതദേഹം പോസ്റ്റു മോർട്ടം നടപടികൾക്കു ശേഷം ചൊവ്വാഴ്ച്ചരാവിലെ 11 മണിക്ക് കുന്നരു കാരന്താട്ടെ ശ്മശാനത്തിൽ സംസ്‌കരിച്ചു.
പരേതനായ എം ബാലന്റെയും കാർത്യായനിയുടെയും മകളാണ് സീന.ഭർത്താവ്: കൂലേരി സുരേന്ദ്രൻ. ഏകമകൾ സാന്ദ്ര. സഹോദരങ്ങൾ ബീന, ശ്രീജേഷ്. തിങ്കളാഴ്ച്ച രാവിലെയാണ് നാടിനെ നടുക്കിയ സംഭവമുണ്ടായത്. സൊസൈറ്റിയുടെ താഴത്തെ നിലയിൽ ചായയുണ്ടാക്കാൻ പോയതായിരുന്നു സീന.
ഏറെ നേരം കഴിഞ്ഞിട്ടും തിരിച്ചുവരാത്തതിനെത്തുടർന്ന് സഹപ്രവർത്തകർ അന്വേഷിച്ചപ്പോഴാണ് തൂങ്ങിയ നിലയിൽ കണ്ടെത്തിയത്. ഉടൻ പരിയാരത്തെ കണ്ണൂർ മെഡിക്കൽ കോളേജാശുപത്രിയിലെത്തിച്ചുവെങ്കിലും ജീവൻ രക്ഷിക്കാനായില്ല.
