ആലപ്പുഴ: സ്ഥാനത്തും അസ്ഥാനത്തുമൊക്കെ സി പി എമ്മുകാർ ഗവർണർ ആരിഫ് മുഹമ്മദ്ഖാനെ വിമർശിക്കുമ്പോൾ അദ്ദേഹത്തെ വാനോളം പുകഴ്ത്തി പാർട്ടിയുടെ വനിതാ എം എൽ എയായ യു പ്രതിഭ. ചെട്ടികുളങ്ങര ഹയർ സെക്കൻഡറി സ്കൂൾ നവതിയാഘോഷച്ചടങ്ങിലാണ് എല്ലാവരെയും അമ്പരപ്പിച്ചുകൊണ്ട് എം എൽ എ ഗവർണറെ പ്രശംസകൊണ്ട് മൂടിയത്. ഒപ്പം അദ്ദേഹത്തിന്റെ വേഷത്തെ പുകഴ്ത്തുകയും ചെയ്തു.
‘എല്ലാവരോടും വളരെ സ്നേഹത്തോടെയാണ് ഗവർണർ പെരുമാറുന്നത്. എല്ലാവരുടെയും കാര്യത്തിൽ അദ്ദേഹത്തിന് പ്രത്യേകശ്രദ്ധയുണ്ട്. ചെട്ടികുളങ്ങര പഞ്ചായത്ത് പ്രസിഡന്റ് സുധാകരക്കുറുപ്പിന്റെ ആരോഗ്യസ്ഥിതി മോശമാണെന്ന് പറഞ്ഞപ്പോൾത്തന്നെ വേദിയിൽനിന്ന് അദ്ദേഹത്തിന്റെ അടുത്തെത്തി വിശേഷങ്ങൾ തിരക്കി. രാഷ്ട്രീയാഭിപ്രായങ്ങൾ വ്യത്യസ്തമാണെങ്കിലും ഗവർണറുടെ പെരുമാറ്റം മാതൃകാപരമാണ്.മലയാളംപഠിക്കാൻ അദ്ദേഹം കാണിക്കുന്ന ഉത്സാഹവും കേരളീയ വേഷത്തോടുള്ള ഇഷ്ടവും ശ്രദ്ധേയമാണ്’ – പ്രതിഭ പറഞ്ഞു. പ്രതിഭയുടെ പുകഴ്ത്തലിന് ചിരിയിലൂടെയാണ് ഗവർണർ നന്ദിപ്രകടിപ്പിച്ചത്.
ഗവർണറായിരുന്നു നവതി ആഘോഷച്ചടങ്ങിന്റെ ഉദ്ഘാടകൻ. ചടങ്ങിലേക്ക് മന്ത്രി വി ശിവൻകുട്ടിയെ ക്ഷണിച്ചിരുന്നെങ്കിലും അദ്ദേഹം എത്തിയില്ല. അസൗകര്യമുണ്ടെന്ന് അദ്ദേഹം സ്കൂൾ അധികൃതരെ അറിയിക്കുകയായിരുന്നു. തലസ്ഥാനത്ത് ചില രാഷ്ട്രീയ പ്രശ്നങ്ങളുള്ളതുകൊണ്ടാണ് മന്ത്രി എത്താത്തതെന്ന് വിശദീകരിക്കാനും പ്രതിഭ മറന്നില്ല.
