MATHEW THOMAS🎞️ മാളവികയെ ചുംബിച്ച് മാത്യു തോമസ്, ഇനി വിജയ്‍ക്കൊപ്പം തമിഴകത്തേക്കും

കൊച്ചി:മലയാളത്തിൻ്റെ യുവനിരയിലെ ശ്രദ്ധേയ താരം മാത്യു തോമസ് തിരക്കിലാണ്. മലയാളത്തിൽ നായകനായുള്ള ചിത്രങ്ങൾ ഒരുപിടി തയാറാകുമ്പോൾ തമിഴിലേക്കും സ്വപ്നതുല്യമായ തുടക്കം ലഭിച്ചിരിക്കുകയാണ്. മലയാളത്തിൽ ക്രിസ്റ്റിയാണ് അടുത്തതായി മാത്യുവിൻ്റെ റിലീസ്. ആദ്യ ചിത്രം മുതൽ മികച്ച സിനിമകളുടെ ഭാഗമായ മാത്യു തോമസ് ഇപ്പോൾ ബോക്സോഫീസിലും താരമൂല്യമുള്ള നായകനാണ്. മലയാള ചിത്രം ക്രിസ്റ്റി റിലീസിനു തയാറെടുക്കുമ്പോൾ മാത്രംയു തോമസ് കാശ്മീരിൽ തമിഴ് ചിത്രത്തിൻ്റെ തിരക്കിലാണ്…

തീരപ്രദേശത്തിൻ്റെ പശ്ചാത്തലത്തിൽ ഒരുക്കുന്ന വ്യത്യസ്തമായ പ്രണയ കഥയാണ് ക്രിസ്റ്റി. തീരപ്രദേശത്തിൻ്റെ സംസ്ക്കാരവും ജീവിതവും റിയലിസ്റ്റിക്കായി പറഞ്ഞുകൊണ്ട് യുവത്വത്തിൻ്റെ വികാരവായ്പ്പുകൾക്ക് പ്രാധാന്യം നൽകിയാണ് ചിത്രം ഒരുക്കുന്നത്. നവാഗതനായ ആൽവിൻ ഹെൻറി സംവിധാനം ചെയ്യുന്ന ചിത്രത്തിൻ്റെ തിരക്കഥ, സംഭാഷണം എഴുതിയിരിക്കുന്നത് സാഹിത്യകാരന്മാരായ ജി.ആർ. ഇന്ദുഗോപനും ബെന്ന്യാമിനും ചേർന്നാണ്. ആദ്യമായാണ് ഇരുവരു ചേർന്ന് ഒരു സിനിമയ്ക്കായി എഴുതുന്നത്. ക്രിസ്റ്റിയിൽ തെന്നിന്ത്യൻ നായിക മാളവിക മോഹനനാണ് മാത്യുവിൻ്റെ നായികയായി അഭിനയിക്കുന്നത്. സംവിധായകൻ തന്നെ കഥ ഒരുക്കിയിരിക്കുന്ന ചിത്രത്തിൽ ജോയ് മാത്യു, വിനീത് വിശ്വം, രാജേഷ് മാധവൻ, മുത്തുമണി, ജയാ എസ്. കുറുപ്പ്, സ്മിനു സിജോ, മഞ്ജു പത്രോസ്, വീണാ നായർ എന്നിവരും പ്രധാന താരങ്ങളാണ്. ഗോവിന്ദ് വസന്തയാണ് ചിത്രത്തിൻ്റെ സംഗീത സംവിധാനം നിർവഹിച്ചിരിക്കുന്നത്.

സമീപകാലത്ത് ഒരു അഭിമുഖത്തിൽ ക്രിസ്റ്റിയിലെ ചുംബനരംഗത്തെക്കുറിച്ച് മാളവിക തുറന്നു പറഞ്ഞിരുന്നു. ക്രിസ്റ്റിയിൽ മാത്യു തോമസ് കിസ് ചെയ്യാൻ വരുന്നുണ്ട്. ആ സീനെടുത്തത് വളരെ തമാശയായിരുന്നു. കാരണം മാത്യു വളരെ പാവമാണ്. ആ സീനെടുക്കുമ്പോൾ വളരെ പേടിച്ചിരിക്കുകയായിരുന്നു അവൻ. മുമ്പ് സ്ക്രീനിൽ ഞാനും കിസ് ചെയ്യുന്ന രംഗത്തിൽ അഭിനയിച്ചിട്ടുണ്ടായിരുന്നില്ല. അതുകൊണ്ടു തന്നെ ചിത്രീകരണം വളരെ തമാശയായിരുന്നു. ഒരുപാട് ടേക്ക് പോയെന്നു മാളവിക പറഞ്ഞു. മാളവിക ഇടവേളയ്ക്കു ശേഷം മലയാളത്തിലേക്ക് തിരികെ എത്തുകയാണ് ഈ ചിത്രത്തിലൂടെ. ഫെബ്രുവരി 17 ന് ക്രിസ്റ്റി തിയറ്ററിലെത്തും.

ഇന്ത്യൻ സിനിമ ഉറ്റുനോക്കുന്ന ചിത്രത്തിലൂടെ തമിഴിലേക്ക് സ്വപ്ന തുല്യമായ തുടക്കമാണ് മാത്യു തോമസിന് ലഭിച്ചിരിക്കുന്നത്. മാസ്റ്ററിനു ശേഷം ലോകേഷ് കനകരാജും ദളപതി വിജയും ഒന്നിക്കുന്ന ചിത്രത്തിൽ വളരെ പ്രധാനപ്പെട്ട കഥപാത്രത്തെയാണ് മാത്യു അവതരിപ്പിക്കുന്നത്. വിജയ്, സംവിധായകൻ ലോകേഷ് കനകരാജ്, വിജയ്, ഗൗതം വാസുദേവ് മേനോൻ എന്നിവർക്കൊപ്പം മാത്യുവുമുള്ള ചിത്രം പുറത്തുവിട്ടിരുന്നു. ആക്ഷൻ ത്രില്ലർ മൂഡിലൊരുക്കുന്ന ചിത്രത്തിൽ വലിയ താരനിരയാണ് അണിനിരക്കുന്നത്. കാശ്മീരിൽ ച്ത്രീകരണം പുരോഗമിക്കുന്ന ലിയോയിൽ തൃഷ, പ്രിയ ആനന്ദ് എന്നിവരാണ് നായികമാരാകുന്നത്. ബോളിവുഡ് താരം സഞ്ജയ് ദത്ത് വില്ലനാകുമ്പോൾ അർജുൻ, മിഷ്കിൻ, മൻസൂർ അലി ഖാൻ എന്നിവരും പ്രധാന കഥാപാത്രങ്ങളാകുന്നു. ചിത്രം 2023 ഒകടോബർ 19 ന് വേൾഡ് വൈഡ് തിയറ്ററിലെത്തും.

ക്രിസ്റ്റിക്കു പിന്നാലെ ഒരുപിടി ചിത്രങ്ങളിലാണ് മാത്യു തോമസ് ഇനി നായകനാകുന്നത്. തണ്ണീ‍ർ മത്തൻ ദിനങ്ങൾ, ജോ ആൻഡ് ജോ എന്നീ ചിത്രങ്ങൾക്കു ശേഷം മാത്യു തോമസും നസ്ലിൻ കെ ഗഫൂറും പ്രധാന കഥാപാത്രമാകുന്ന നെയ്മറാണ് റിലീസിനൊരുങ്ങുന്ന മറ്റൊരു ചിത്രം. നവാഗതനായ സുധി മാഡിസൻ കഥയെഴുതി സംവിധാനം ചെയ്യുന്ന ചിത്രം ഫുട്ബോളിൻ്റെ പശ്ചാത്തലത്തിലാണ് കഥ പറയുന്നത്. വിജയരാഘവൻ, ജോണി ആൻ്റണി തുടങ്ങിയവരും പ്രധാന വേഷങ്ങളില്‍ എത്തുന്നു. ഷാൻ റഹ്‌മാൻ്റെ സംഗീത സംവിധാനത്തിൽ ഒൻപതു ഗാനങ്ങളുണ്ട് ചിത്രത്തിൽ. ബാഡ്മിൻ്റൺ കളിയുടെ പശ്ചാത്തലത്തിൽ ഒരുങ്ങുന്ന മറ്റൊരു ചിത്രമാണ് കപ്പ്. നമിത പ്രമോദ്, ഗുരു സോമസുന്ദരം, ബേസിൽ ജോസഫ്, ഇന്ദ്രൻസ് തുടങ്ങിയവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. ഇടുക്കിയിൽ നിന്ന് ബാഡ്മിൻ്റണിലൂടെ ഇന്ത്യയ്ക്ക് വേണ്ടി കളിക്കാൻ ആഗ്രഹിക്കുന്ന ഒരു സാധാരണക്കാരനായ കുട്ടിയുടെ കഥയാണ് ചിത്രം പറയുന്നത്. സഞ്ജു വി. സാമുവൽ കഥയെഴുതി സംവിധാനം ചെയ്യുന്ന കപ്പിൻ്റെ ചിത്രീകരണം പൂർത്തിയായി.

സ്കൂൾ, കോളജ് കാലത്തെ പ്രേമവും സൗഹൃദവും കളിയും ചിരിയുമായാണ് മാത്യു തോമസ് മലയാളി പ്രേക്ഷകരെ കയ്യിലെടുത്ത്. കുമ്പളങ്ങി നൈറ്റ്സിലെ ഫ്രാങ്കി, തണ്ണീർമത്തനിലെ ജയ്സൺ, ജോ ആൻഡ് ജോയിലെ ജോമൊനെക്കെ മലയാളി പ്രേക്ഷകർ സ്വീകരിച്ച കഥാപാത്രങ്ങളാണ്. പതിവായുള്ള അത്തരം കഥാപാത്രങ്ങളിൽ നിന്നും മാറി ​ഗ്രേ ഷേഡിലുള്ള കഥാപാത്രങ്ങളും തനിക്ക് ചെയ്യാൻ ആ​ഗ്രഹമുണ്ടെന്നു സമീപകാലത്ത് മാത്യു തോമസ് വെളിപ്പെടുത്തിയിരുന്നു. കരിയറിൽ മികച്ച പാതയിലാണ് ഈ യുവതാരം ഇപ്പോൾ സഞ്ചരിക്കുന്നത്.

വാണിജ്യ വിജയവും മികച്ച നിരൂപക പ്രശംസയും നേടിയ കുമ്പളങ്ങി നൈറ്റ്സിലൂടെയാണ് മാത്യു തോമസ് വെള്ളിത്തിരയിലെത്തുന്നത്. പിന്നീട് അനശ്വര രാജനൊപ്പം ജോഡിയായെത്തിയ തണ്ണീർമത്തൻ ദിനങ്ങൾ 50 കോടി ക്ലബിൽ ഇടം പിടിച്ച ചിത്രമായിരുന്നു. കരിയറിൽ മികച്ച സിനിമകളാണ് മാത്യുവിനെ തേടിയെത്തിയിട്ടുള്ളത്. അഞ്ചാം പാതിര, ഓപറേഷൻ ജാവ, വൺ, ജോ ആൻഡ് ജോ തുടങ്ങിയ ചിത്രങ്ങളും മികച്ച താരമൂല്യം ഈ യുവതാരത്തിനു നേടിക്കൊടുത്തു. ഇപ്പോൾ തമിഴിലിലേക്കും തുടക്കം കുറിക്കുന്നതോടെ കരിയറിൽ മറ്റൊരു ടേണിംഗ് പോയിൻ്റിലാണ് താരം.