കണ്ണവം: ജ്യോത്സ്യന്‍ ആണെന്ന് അവകാശപ്പെട്ട ആളുടെ നിര്‍ദേശ പ്രകാരം തങ്ക ഭസ്മം പാലില്‍ കലക്കി കുടിച്ച വിദ്യാര്‍ഥിയുടെ കാഴ്ച ശക്തിക്ക് മങ്ങലേറ്റു. ഭാവിയില്‍ ഐഎഎസ് പരീക്ഷ പാസാകാന്‍ വേണ്ടിയാണ് തങ്കഭസ്മം കഴിച്ചത്. വ്യാജ ഗരുഡ രത്‌നം, തങ്ക ഭസ്മം, വിദേശ ലക്ഷ്മി യന്ത്രം എന്നിവ നല്‍കി 11,75,000 രൂപ തന്റെ കയ്യില്‍ നിന്ന് തട്ടിയെടുത്തതായും കാണിച്ച് കണ്ണൂര്‍ കൊറ്റാളി സ്വദേശി പാരഡിസ് ഹൗസില്‍ മൊബിന്‍ ചാന്ദാണ് കണ്ണവം പോലീസില്‍ പരാതി നല്‍കി.
കണ്ണാടിപ്പറമ്പ് സ്വദേശിയായ ജ്യോത്സ്യനെതിരെയാണ് പരാതി. വീട് നിര്‍മാണത്തിന്റെ മുഹൂര്‍ത്തം നോക്കാനാണ് മൊബിന്‍ ചാന്ദ് ആദ്യമായി കണ്ണാടിപ്പറമ്പിലെ ഇയാളുടെ ജ്യോതിഷാലയത്തില്‍ എത്തിയത് ഈ സമയം വാഹനാപകടത്തില്‍ മൊബിന്‍ മരണപ്പെടാന്‍ സാധ്യതയുണ്ടെന്ന് പറഞ്ഞു വാഹനാപകടത്തിന്റെ കാര്യം പറഞ്ഞു ഭാര്യയെയും ബന്ധുക്കളെയും മറ്റും ജോത്സ്യന്‍ ഭയപ്പെടുത്തി.
അപകടത്തില്‍ നിന്ന് രക്ഷ നേടുന്നതിന് വേണ്ടിയാണ് ആദിവാസികളില്‍ നിന്നു ലഭിക്കുന്ന ഗരുഡന്റെ തലയിലുള്ള ഗരുഡ രത്‌നം പത്ത് എണ്ണം വാങ്ങി വീട്ടില്‍ സൂക്ഷിക്കാന്‍ നിര്‍ദേശിച്ചത്. ഭാവിയില്‍ മകന്‍ ഐഎഎസ് പാസ് ആവണമെങ്കില്‍ തങ്ക ഭസ്മം പാലില്‍ കലക്കി കുടിക്കണം എന്നും വീട്ടില്‍ വിദേശ ലക്ഷ്മി യന്ത്രം സൂക്ഷിക്കണമെന്നും നിര്‍ദേശിച്ചു. തങ്ക ഭസ്മം പാലില്‍ കലക്കി കുടിച്ചപ്പോഴാണ് കാഴ്ച ശക്തിക്ക് മങ്ങലേറ്റത്.
