HONEY TRAP 👩‍🦰 ഹണിട്രാപ്പ് സുന്ദരി പിടിയിൽ, പിടിയിലാകുന്നത് ഒന്നര വർഷത്തിന് ശേഷം, ആലപ്പുഴ ഹണിട്രാപ്പ് കേസിൽ വഴിത്തിരിവ്

ആലപ്പുഴ: റിസോർട്ട് ഉടമയിൽ നിന്ന് പത്ത് ലക്ഷം തട്ടാൻ ശ്രമിച്ച ഹണിട്രാപ്പ് കേസിൽ വഴിത്തിരിവ്. മുഖ്യപ്രതി തൃശൂർ സ്വദേശിനി പിടിയിൽ. 2021 നവംബറിൽ ആലപ്പുഴയിലെ മരാരിക്കുളത്തെ റിസോര്‍ട്ട് ഉടമയെ ഭീഷണിപ്പെടുത്തി 10 ലക്ഷം രൂപ തട്ടാന്‍ ശ്രമിച്ച കേസില്‍ അഞ്ചു പേര്‍ പോലീസ് പിടിയിലായിരുന്നു.

പിന്നീട് 2022 മെയ് മാസം മറ്റ് അഞ്ച് പ്രതികളെ കൂടി പോലീസ് അറസ്റ്റ് ചെയ്തിരുന്നു. മാരാരിക്കുളം വടക്ക് പഞ്ചായത്ത് സ്വദേശി വാറാൻ കവലയ്ക്ക് സമീപം റിസോർട്ട് നടത്തുന്ന നാൽപത്തിമൂന്നുകാരനെയാണ് ഭീഷണിപ്പെടുത്തി 10 ലക്ഷം തട്ടിയെടുക്കാൻ ശ്രമിച്ചത്.

സാമ്പത്തിക ബുദ്ധിമുട്ടിനെ തുടർന്ന് ഇയാൾ പലരെയും വായ്പയ്ക്കു സമീപിച്ചിരുന്നു. ഇത്തരത്തിൽ തൃശൂരിലെ യുവതിയെ പരിചയപ്പെട്ടു. ഇവർ ആവശ്യപ്പെട്ടതു പ്രകാരം തൃശൂരിലെ ലോഡ്ജിലെ മുറിയിലെത്തിയ റിസോർട്ട് ഉടമയെ പിന്നീട് സ്ത്രീയുടെ സുഹൃത്തുക്കളെന്ന പേരിലെത്തിയ യുവാക്കൾ ഹോട്ടൽ മുറിയിൽ വച്ച് ബന്ധനസ്ഥനാക്കി ശാരാരീകമായും, മാനസീകമായും ഉപദ്രവിച്ചും ഭീഷണിപ്പെടുത്തിയും 10 ലക്ഷം രൂപ ആവശ്യപ്പെടുകയും ചെയ്യുകയായിരുന്നു.

ഇതിനിടെ റിസോർട്ട് ഉടമയുടെ വീട്ടുകാർ ഇയാളെ കാണാനില്ലെന്നുകാട്ടി പോലീസിൽ പരാതി നൽകിയിരുന്നു. പോലീസ് അന്വേഷണത്തിലാണ്, ഇയാളെ ചെറുതുരുത്തിക്കു സമീപം ആൾത്താമസമില്ലാത്ത വീട്ടിൽ തടവിൽ പാർപ്പിച്ച നിലയിൽ കണ്ടെത്തിയത്. ഒപ്പമുണ്ടായിരുന്ന അഞ്ച് പേരെ ആദ്യം കസ്റ്റ‍ിയിലെടുക്കുകയായിരുന്നു.

തൃശൂര്‍ മുള്ളൂര്‍ക്കര ആയൂര്‍ അങ്ങത്തുപറമ്പ് മുഹമ്മദ് ഷാഫില്‍(23), ചെറുതുരുത്തി കല്ലാടിക്കുന്നത്ത് അഷ്‌റഫ് (23), ചെറുതുരുത്തി കല്ലേക്കുന്ന് സനൂഷ് (22), മുളങ്കന്നത്തുകാവ് ചോറ്റുപാറ വലിയവിരിപ്പില്‍ എസ്.സനു (27), ചെറുതുരുത്തി പാളയംകോട്ടക്കാരന്‍ ബി.സജീര്‍ (30) എന്നിവരെയാണ് മണ്ണഞ്ചേരി പൊലീസ് തൃശൂരില്‍നിന്നു പിടികൂടിയിരുന്നത്.

പിന്നീട് 2022 മെയ് മാസത്തിൽ തൃശൂർ കീഴേ പള്ളിക്കര പോഴത്ത് വീട്ടിൽ എസ്.നിധീഷ് (22), ചോറുപാറ കൊള്ളാനൂർ വീട്ടിൽ കെ.എബി (19), ചാവക്കാട് പുത്തൻപുരയിൽ ഹൗസിൽ എസ്. അജ്മൽ (20), വേലൂർ കിരാലൂർ വാവറൂട്ടി ഹൗസിൽ എം.ശ്രീഹരി (21), പുല്ലേരി വാഴപ്പുള്ളി ഹൗസിൽ റൊണാൾഡോ വില്യംസ് (21) എന്നിവരെ പിടികൂടി. ഇവർ അഞ്ച് പേരും എഞ്ചിനീയറിം​ഗ് വിദ്യാർത്ഥികളാണ്. പ്രധാന പ്രതികളായ ചാവക്കാട് സ്വദേശിയും തൃശൂർ സ്വദേശിനിയും ഒളിവിലായിരുന്നു. തൃശൂർ സ്വദേശിനി സൗമ്യയെയാണ് പോലീസ് ഇപ്പോൾ പിടികൂടിയിരിക്കരുന്നത്.

കേസിലെ ഒന്നാം പ്രതിയും മുഖ്യ ആസൂത്രകയുമാണ് സൗമ്യയെന്നാണ് പോലീസ് പറയുന്നത്. മണ്ണഞ്ചേരി പോലീസ് ലുക്ക് ഔട്ട് നോട്ടീസ് പുറപ്പെടുവിച്ചിരുന്ന പ്രതി ഒന്നരവർഷത്തോളം ഒളിവിലായിരുന്നു. ശനിയാഴ്ച വിദേശത്തുനിന്ന് മടങ്ങിവരുന്ന വഴി തിരുവനന്തപുരം വിമാനത്താവളത്തിൽ വച്ച് സൗമ്യയെ പോലീസ് പിടികൂടുകയായിരുന്നു. ആലപ്പുഴ ഹണിട്രാപ്പ് കേസിൽ വൻ വഴിത്തിരിവായിരിക്കുകയാണ് സൗമ്യയുടെ അറസ്റ്റ്.