അബുദാബി:ട്വന്റി-20 ലോകകപ്പിൽ അഫ്ഗാനിസ്താനെ എട്ടു വിക്കറ്റിന് തകർത്ത് ന്യൂസീലൻഡ് ഗ്രൂപ്പ് രണ്ടിൽ നിന്ന് സെമിയിൽ കടക്കുന്ന രണ്ടാമത്തെ ടീമായി. പാകിസ്താനാണ് ഗ്രൂപ്പിൽ നിന്ന് സെമിയിലെത്തിയ ആദ്യ ടീം.
അഫ്ഗാൻ ഉയർത്തിയ 125 റൺസ് വിജയലക്ഷ്യം കിവീസ് 18.1 ഓവറിൽ രണ്ട് വിക്കറ്റ് മാത്രം നഷ്ടപ്പെടുത്തി മറികടന്നു. കിവീസിന്റെ ജയത്തോടെ ഇന്ത്യ ലോകകപ്പിന്റെ സെമി കാണാതെ പുറത്തായി.
125 റൺസ് വിജയലക്ഷ്യത്തിലേക്ക് ബാറ്റെടുത്ത കിവീസിന്റേത് ഭേദപ്പെട്ട തുടക്കമായിരുന്നു. സ്കോർ 26-ൽ നിൽക്കേ 12 പന്തിൽ 17 റൺസുമായി ഡാരിൽ മിച്ചൽ മടങ്ങി.23 പന്തിൽ നിന്ന് നാലു ഫോറടക്കം 28 റൺസെടുത്ത മാർട്ടിൻ ഗുപ്റ്റിലിനെ ഒമ്പതാം ഓവറിൽ റാഷിദ് ഖാൻ മടക്കി.
പിന്നാലെ മൂന്നാം വിക്കറ്റിൽ 68 റൺസ് ചേർത്ത കെയ്ൻ വില്യംസൺ – ഡെവോൺ കോൺവെ സഖ്യമാണ് കിവീസിനെ വിജയത്തിലെത്തിച്ചത്.
42 പന്തുകൾ നേരിട്ട വില്യംസൺ 40 റൺസോടെ പുറത്താകാതെ നിന്നു. കോൺവെ 32 പന്തിൽ നിന്ന് 36 റൺസെടുത്തു.നേരത്തെ ടോസ് നേടി ആദ്യം ബാറ്റിങ്ങിനിറങ്ങിയ അഫ്ഗാന് നിശ്ചിത 20 ഓവറിൽ എട്ടു വിക്കറ്റ് നഷ്ടത്തിൽ 124 റൺസെടുക്കാനേ സാധിച്ചുള്ളൂ.
അർധ സെഞ്ചുറി നേടിയ നജിബുള്ള സദ്രാന് മാത്രമാണ് അഫ്ഗാൻ നിരയിൽ ഭേദപ്പെട്ട പ്രകടനം നടത്താനായത്. 48 പന്തുകൾ നേരിട്ട സദ്രാൻ മൂന്ന് സിക്സും ആറ് ഫോറുമടക്കം 73 റൺസെടുത്തു.നാല് ഓവറിൽ വെറും 17 റൺസ് മാത്രം വഴങ്ങിയ മൂന്ന് വിക്കറ്റ് വീഴ്ത്തിയ ട്രെൻഡ് ബോൾട്ടാണ് കിവീസ് ബൗളിങ് നിരയിൽ തിളങ്ങിയത്. ടിം സൗത്തി രണ്ട് വിക്കറ്റ് വീഴ്ത്തി.
ബാറ്റിങ്ങിനിറങ്ങിയ അഫ്ഗാന്റെ തുടക്കം തന്നെ തകർച്ചയോടെയായിരുന്നു. 5.1 ഓവറിൽ 19 റൺസെടുക്കുന്നതിനിടെ തന്നെ അവർക്ക് മുഹമ്മദ് ഷഹ്സാദ് (4), ഹസ്റത്തുള്ള സസായ് (2), റഹ്മാനുള്ള ഗുർബാസ് (6) എന്നിവരെ നഷ്ടമായി.തുടർന്ന് ഗുൽബാദിൻ നയ്ബും നജിബുള്ള സദ്രാനും ചേർന്ന് ടീമിനെ 56 റൺസ് വരെയെത്തിച്ചു. 18 പന്തിൽ നിന്ന് 15 റൺസെടുത്ത നയ്ബിനെ പുറത്താക്കി ഇഷ് സോധി 10-ാം ഓവറിൽ ഈ കൂട്ടുകെട്ട് പൊളിച്ചു.
തുടർന്ന് ക്രീസിൽ ഒന്നിച്ച സദ്രാൻ – മുഹമ്മദ് നബി സഖ്യമാണ് അഫ്ഗാനെ 100 കടത്തിയത്. അഞ്ചാം വിക്കറ്റിൽ ഇരുവരും ചേർന്ന് 59 റൺസിന്റെ കൂട്ടുകെട്ടുണ്ടാക്കി. 20 പന്തിൽ നിന്ന് 14 റൺസെടുത്ത നബി 18-ാം ഓവറിലാണ് പുറത്തായത്. പിന്നാലെ സദ്രാനും മടങ്ങിയതോടെ ഡെത്ത് ഓവറുകളിൽ അഫ്ഗാന് സ്കോർ ഉയർത്താനായില്ല.
നേരത്തെ ടോസ് നേടിയ അഫ്ഗാനിസ്താൻ ബാറ്റിങ് തിരഞ്ഞെടുക്കുകയായിരുന്നു. മാറ്റമില്ലാതെയാണ് ന്യൂസീലൻഡ് കളിക്കുന്നത്. അഫ്ഗാൻ നിരയിൽ ഒരു മാറ്റമുണ്ട്. ഷറഫുദ്ദീൻ അഷ്റഫിന് പകരം മുജീബുർ റഹ്മാൻ ടീമിലെത്തി.
