കോട്ടയം: ഒളിവിൽ കഴിഞ്ഞിരുന്ന ഗുണ്ട പുത്തൻപാലം രാജേഷിനെ ബലാത്സംഗക്കേസിൽ കോട്ടയത്ത് പിടികൂടി.ഗുണ്ടാസംഘത്തലവൻ ഓംപ്രകാശിന്റെ കൂട്ടാളിയാണ്. തിരുവനന്തപുരം ഫോർട്ട് സ്റ്റേഷനിലാണ് ഇയാൾക്കെതിരേ ബലാത്സംഗക്കേസ് രജിസ്റ്റർചെയ്തത്.
ഒളിവിൽ കഴിഞ്ഞിരുന്ന ഇയാളെ കോതനല്ലൂരിൽനിന്നാണ് അറസ്റ്റുചെയ്തത്. ഇയാൾ ജില്ലയിൽ കടന്നതായി പോലീസിന് രഹസ്യവിവരം ലഭിച്ചിരുന്നു. തുടർന്ന്, കോട്ടയം ജില്ലാ പോലീസ് മേധാവി ഷാഹുൽ ഹമീദിന്റെ നേതൃത്വത്തിലുള്ള പ്രത്യേകസംഘവും കടുത്തുരുത്തി പോലീസും ചേർന്ന് നടത്തിയ അന്വേഷണത്തിലാണ് വ്യാഴാഴ്ച രാത്രി 10-ന് ഏഴുപേർക്കൊപ്പം കോതനല്ലൂരിലെ വാടകവീട്ടിൽനിന്നും ഇയാളെ പിടികൂടിയത്.
കൊച്ചിയിൽ ഓംപ്രകാശ് നടത്തിയ ലഹരി പാർട്ടിയുമായി പുത്തൻപാലം രാജേഷിന് ബന്ധമുണ്ടോ എന്ന് പരിശോധിച്ചുവരുന്നതിനിടെയാണ് അറസ്റ്റ്.കൊല്ലപ്പെട്ട പോൾ മുത്തൂറ്റിന്റെ വാഹനത്തിനുള്ളിൽ ഓംപ്രകാശും, പുത്തൻപാലം രാജേഷും ഉണ്ടായിരുന്നതായി അന്നത്തെ അന്വേഷണസംഘം കണ്ടെത്തിയിരുന്നു
കോട്ടയത്ത് ഇയാൾക്കെതിരേ കേസുകൾ ഇല്ല. വാടകവീട്ടിൽ ഇയാൾക്കൊപ്പമുണ്ടായിരുന്ന ഏഴുപേരെയും പോലീസ് കസ്റ്റഡിയിലെടുത്തിടുണ്ട്. ഇവരെ ചോദ്യംചെയ്ത് വിട്ടയയ്ക്കും. പുത്തൻപാലം രാജേഷിനെ തിരുവനന്തപുരം പോലീസിന് കൈമാറും.