KERALA BUDGET💼 ഭൂമിയുടെ ന്യായവിലയിൽ ഇളവിന്‌ സാധ്യത; ഇന്ധനസെസിൽ ഇന്ന് തീരുമാനം

തിരുവനന്തപുരം: ബജറ്റിലെ നികുതിവർധന സംബന്ധിച്ചുള്ള സർക്കാർനിലപാട് ബുധനാഴ്ച വ്യക്തമാകും. ഇന്ധനസെസ് രണ്ടുരൂപ ഈടാക്കുന്നത് കുറയ്ക്കാനുള്ള തീരുമാനം തത്‌കാലം പരിഗണനയിലില്ലെന്നാണ് സൂചന. ഭൂമിയുടെ ന്യായവിലയിൽ ഇളവുപ്രഖ്യാപിച്ച് പ്രതിഷേധം തണുപ്പിക്കാനുള്ള ആലോചനയും നടക്കുന്നുണ്ട്.

രണ്ടുദിവസമായി നിയമസഭയിൽനടന്ന ബജറ്റ് ചർച്ചയ്ക്ക് ബുധനാഴ്ച ധനമന്ത്രി കെ.എൻ. ബാലഗോപാൽ മറുപടിനൽകും. പ്രതിഷേധവും വിമർശനങ്ങളും ശമിപ്പിക്കാനുള്ള പ്രഖ്യാപനങ്ങൾ ഇതിലുണ്ടായേക്കും.

നികുതിവർധനയെച്ചൊല്ലിയുള്ള പ്രതിപക്ഷപ്രതിഷേധം വലിയ ചലനമുണ്ടാക്കിയില്ലെന്നാണ് സി.പി.എമ്മിന്റെ വിലയിരുത്തൽ. സർക്കാരിനുനേരെ ജനവികാരം സൃഷ്ടിക്കാൻ പ്രതിഷേധങ്ങൾക്ക്‌ കഴിഞ്ഞിട്ടില്ലെന്ന അഭിപ്രായം മന്ത്രിമാർക്കിടയിലുമുണ്ട്.