കോട്ടയം: കുറ്റ്യാടി സീറ്റ് സി.പി.ഐ.എമ്മിന് വിട്ടുനല്‍കിയെന്ന് കേരള കോണ്‍ഗ്രസ് എം. മുന്നണിയുടെ കെട്ടുറപ്പിനും ഐക്യത്തിനുമാണ് പ്രഥമ പരിഗണനയെന്ന് കേരളാ കോണ്‍ഗ്രസ് എം പറഞ്ഞു. കുറ്റ്യാടിയില്‍ സ്ഥാനാര്‍ത്ഥി സിപിഐഎം ചര്‍ച്ച നാളെയുണ്ടാകും. മണ്ഡലത്തില്‍ കുഞ്ഞാഹമ്മദ് കുട്ടി മാസ്റ്റരെ പരിഗണിക്കില്ലെന്നാണ് റിപ്പോര്‍ട്ട്.
വാര്‍ത്താ കുറിപ്പിലൂടെയാണ് കുറ്റ്യാടിയില്‍ സിപിഐഎമ്മിന് സീറ്റ് വിട്ടുനല്‍കുന്നുവെന്ന തീരുമാനം കേരളാ കോണ്‍ഗ്രസ് അറിയിച്ചത്. കേരളാ കോണ്‍ഗ്രസ് എമ്മിന് കുറ്റ്യാടി ഉള്‍പ്പടെ 13 നിയസഭാ സീറ്റുകളാണ് ഇടതുപക്ഷ ജനാധിപത്യമുന്നണി നല്‍കിയത്.
എന്നാല്‍ കുറ്റ്യാടിയില്‍ രൂപപ്പെട്ട സവിശേഷമായ രാഷ്ട്രീയ സാഹചര്യത്തിലാണ് കുറ്റ്യാടി സീറ്റ് സിപിഐഎമ്മിന് വിട്ടുനല്‍കാന്‍ തീരുമാനിച്ചിരിക്കുന്നതായി ചെയര്‍മാന്‍ ജോസ് കെ.മാണി അറിയിച്ചത്. കേരളാ കോണ്‍ഗ്രസ് എമ്മിനെ സംബന്ധിച്ച് ഇടതുപക്ഷജനാധിപത്യ മുന്നണിയുടെ കെട്ടുറപ്പിനും ഐക്യത്തിനുമാണ് മുഖ്യപരിഗണനയെന്നും, ഈ തെരഞ്ഞെടുപ്പില്‍ ഇടതുമുന്നണി ജയിക്കേണ്ടതും, എല്‍ഡിഎഫിന്റെ തുടര്‍ഭരണം കേരളത്തില്‍ ഉണ്ടാകേണ്ടതും രാഷ്ട്രീയമായ അനിവാര്യതയാണ് എന്ന ഉന്നതമായ വീക്ഷണത്തിന്റെ അടിസ്ഥാനത്തിലുമാണ് ഇത്തരത്തിലൊരു തീരുമാനം പാര്‍ട്ടി സ്വീകരിക്കുന്നതെന്നും വാര്‍ത്താ കുറിപ്പില്‍ ജോസ് കെ മാണി പറഞ്ഞു.
മുന്നണിയുടെ ഐക്യത്തിന് ഒരു പോറല്‍പ്പോലും എല്‍പ്പിക്കുന്ന ഒന്നും കേരളാ കോണ്‍ഗ്രസ് എം പാര്‍ട്ടിയുടെ ഭാഗത്ത് നിന്നും ഉണ്ടാകരുതെന്ന നിര്‍ബന്ധമുണ്ടെന്നും 13 സീറ്റ് കേരളാ കോണ്‍ഗ്രസ് പാര്‍ട്ടിക്ക് പൂര്‍ണ്ണമായും അവകാശപ്പെട്ടതാണെങ്കിലും നിലവിലെ പ്രത്യേക സാഹചര്യത്തില്‍ ഇടതുമുന്നണി നേതൃത്വവുമായി നടത്തിയ ചര്‍ച്ചയിലാണ് ഈ തീരുമാനം എടുത്തിട്ടുള്ളതെന്നും ജോസ് കെ.മാണി പറഞ്ഞു.