![](https://breakingkerala.com/wp-content/uploads/2022/01/arunkumar.jpg)
തിരുവനന്തപുരം: സുരക്ഷാ കാരണങ്ങള് ഉന്നയിച്ച് മീഡിയവണ് ചാനലിന്റെ സംപ്രേഷണം കേന്ദ്ര സര്ക്കാര് തടഞ്ഞ വിഷയത്തില് പ്രതികരണവുമായി മാധ്യമ പ്രവര്ത്തകന് അരുണ് കുമാര് രംഗത്ത്. പ്രതിപക്ഷത്തിരിക്കുന്ന മാധ്യമങ്ങളുടെ ചിറകരിഞ്ഞ് ഉറപ്പാക്കേണ്ടതല്ല രാജ്യസുരക്ഷയെന്ന് അരുണ് കുമാര് പറഞ്ഞു. രാജ്യത്തെ ബാക്കി നില്ക്കുന്ന ജനാധിപത്യത്തിന്റെ സുരക്ഷ നേരിടുന്ന ഏറ്റവും വലിയ വെല്ലുവിളി ഇതാണെന്നും അദ്ദേഹം കൂട്ടിച്ചേര്ത്തു.
ഉള്ളടക്കത്തിലെ രാഷ്ട്രീയത്തിലുള്ള വിയോജിപ്പുകള് ഈ മാധ്യമത്തിന്റെ മരണക്കുറിപ്പായിക്കൂടാ എന്നും നിരന്തരം തര്ക്കിച്ചും ചോദ്യങ്ങളുന്നയിച്ചും അധികാര കേന്ദ്രങ്ങളെ അസ്വസ്ഥപ്പെടുത്തിയും ചാനല് സംപ്രേഷണം തുടരേണ്ടതുണ്ടെന്നും അരുണ് കുമാര് പറഞ്ഞു.
അരുണ് കുമാറിന്റെ ഫേസ്ബുക്ക് പോസ്റ്റിന്റെ പൂര്ണ്ണരൂപം;
മാധ്യമങ്ങളില്ലാത്ത ഗവണ്മെന്റോ ഗവണ്മെന്റില്ലാത്ത മാധ്യമങ്ങളോ ഇവയില് ഒരെണ്ണം തിരഞ്ഞെടുക്കാനാവശ്യപ്പെട്ടാല് തീര്ച്ചയായും രണ്ടാമത്തത് സ്വീകരിക്കും എന്ന് പറഞ്ഞത് തോമസ് ജെഫേഴ്സണാണ്. ഉള്ളടക്കത്തിലെ രാഷ്ട്രീയത്തില് വിയോജിപ്പുണ്ട്. പക്ഷെ ആ വിയോജിപ്പുകള് ഈ മാധ്യമത്തിന്റെ മരണക്കുറിപ്പായിക്കൂടാ. നിരന്തരം തര്ക്കിച്ചും ചോദ്യങ്ങളുന്നയിച്ചും അധികാര കേന്ദ്രങ്ങളെ അസ്വസ്ഥപ്പെടുത്തിയും നിങ്ങള് തുടരേണ്ടതുണ്ട്.
പ്രതിപക്ഷത്തിരിക്കുന്ന മാധ്യമങ്ങളുടെ ചിറകരിഞ്ഞ് ഉറപ്പാക്കേണ്ടതല്ല രാജ്യസുരക്ഷ. ഇതാണ് ഒരര്ത്ഥത്തില് രാജ്യത്തെ ബാക്കി നില്ക്കുന്ന ജനാധിപത്യത്തിന്റെ സുരക്ഷ നേരിടുന്ന ഏറ്റവും വലിയ വെല്ലുവിളി. ഓഫ് എയര് എന്നാല് ജനാധിപത്യത്തിന് നോ എയര് എന്നാണര്ത്ഥം.