കൊച്ചി:സ്വർണ്ണക്കടത്തു കേസിൽ മുഖ്യമന്ത്രി പിണറായി വിജയനെതിരെ നിർബന്ധിച്ച് വ്യാജമൊഴി രേഖപ്പെടുത്തിയെന്ന പരാതിയിൽ കേന്ദ്ര ഏജൻസിയായ ഇ.ഡിയ്ക്കെതിരെ [എൻഫോഴ്സ്മെൻ്റ് ഡയറക്ട്രേറ്റ്] കേസെടുത്തു. ക്രൈംബ്രാഞ്ച് രജിസ്റ്റർ ചെയ്ത കേസിൽ എറണാകുളം ഒന്നാം ക്ലാസ് മജിസ്ട്രേറ്റ് കോടതിയിൽ ഇ.ഡി.ഉദ്യോഗസ്ഥരെ പ്രതികളാക്കി എഫ് ഐ ആർ സമർപ്പിച്ചു.
കേസിൽ മുഖ്യമന്ത്രിയുടെ പേരു പറയാൻ അന്വേഷണോദ്യോഗസ്ഥർ ഭീഷണിപ്പെടുത്തുന്നു എന്നു വ്യക്തമാക്കുന്ന പ്രതി സ്വപ്ന സുരേഷിൻ്റെ ശബ്ദരേഖ ജയിലിൽ കഴിയുന്നതിനിടെ പുറത്തു വന്നിരുന്നു. ശബ്ദരേഖയിൽ അന്വേഷണമാവശ്യപ്പെട്ട് ഇ.ഡി.നൽകിയ പരാതിയാണ് തിരിഞ്ഞ് കൊത്തിയത്.
ശബ്ദം തൻ്റേതാണെന്ന് സ്വപ്ന ജയിൽ അധികൃതർക്ക് സ്വന്തം കൈപ്പടയിൽ എഴുതി നൽകിയിരുന്നു. സ്വപ്നയുടെ സുരക്ഷക്കായി നിയോഗിച്ച വനിതാ പൊലീസ് ഉദ്യോഗസ്ഥരുടെ മൊഴിയും നിർണ്ണായകമായി. മുഖ്യമന്ത്രിയുടെ പേര് പറയാൻ ഇഡി ഉദ്യോഗസ്ഥർ നിർബന്ധിച്ചത് കേട്ടുവെന്നായിരുന്നു മൊഴി. ഡയറക്ടർ ജനറൽ ഓഫ് പ്രോസിക്യൂഷൻ്റെ നിയമോപദേശത്തെ തുടർന്നായിരുന്നു കേസെടുത്തത്.
തെറ്റായി ഒരാളെ ഉൾപ്പെടുത്താൻ ഗൂഢാലോചന നടത്തുകയും സമ്മർദ്ദം ചെലുത്തുകയും ചെയ്യുന്നത് ഔദ്യോഗിക കൃത്യനിർവ്വഹണത്തിൻ്റെ ഭാഗമല്ലെന്ന് ക്രൈംബ്രാഞ്ച് അന്വേഷണ സംഘം കണ്ടെത്തിയിരുന്നു.
മുഖ്യമന്ത്രിയുടെ പേര് പറയാൻ നിർബന്ധിക്കുന്നുവെന്ന സ്വപ്നയുടെ ശബ്ദരേഖയിൽ അന്വേഷണം ആവശ്യപ്പെട്ടത് ഇഡി തന്നെയായിരുന്നു. 20-11-2020 ന് ഇ ഡി നൽകിയ കത്തിൻ്റെ അടിസ്ഥാനത്തിലായിരുന്നു ക്രൈംബ്രാഞ്ച് അന്വേഷണം. ഈ അന്വേഷണത്തിലാണ് ഇഡിക്കെതിരെ സാക്ഷിമൊഴികൾ ലഭിച്ചത്.