ചെന്നൈ: നഗരത്തില് കൂടുതല് മാധ്യമപ്രവര്ത്തകര്ക്ക് കൊവിഡ് സ്ഥിരീകരിച്ചു. ഇന്ന് 10 മാധ്യമ പ്രവര്ത്തകര്ക്ക് കൂടിയാണ് കൊവിഡ് സ്ഥിരീകരിച്ചത്. ഇവരില് ആറ് പേര് ഒരു തമിഴ് ചാനലിലെ മാധ്യമപ്രവര്ത്തകരാണ്. ഇതോടെ ചെന്നൈയില് കൊവിഡ് സ്ഥിരീകരിച്ച ആകെ മാധ്യമപ്രവര്ത്തകരുടെ എണ്ണം 40 ആയി.
ചാനല് ജീവനക്കാര്ക്ക് കൂട്ടത്തോടെ രോഗം വന്നതിനെ തുടര്ന്ന് ഒരു പ്രമുഖ തമിഴ് ന്യൂസ് ചാനല് ഇന്ന് തത്സമയ സംപ്രേക്ഷണം നിര്ത്തിയിരുന്നു. നേരത്തെ തന്നെ അമ്പതോളം മാധ്യപ്രവര്ത്തകരെ നിരീക്ഷണത്തിലാക്കിയിരുന്നു. ഇന്ന് കൂടുതല് പേര്ക്ക് രോഗം സ്ഥിരീകരിച്ചതോടെ കൂടുതല് മാധ്യമപ്രവര്ത്തകര് നിരീക്ഷണപട്ടികയില് വരും
.
മറ്റൊരു ചാനലിലെ സബ് എഡിറ്റര്ക്കും കൊവിഡ് സ്ഥിരീകരിച്ചതോടെ ന്യൂസ് റീഡര്മാരടക്കം ഇരുപത്തിമൂന്ന് മാധ്യമപ്രവര്ത്തകരെ നിരീക്ഷണത്തിലാക്കി. കഴിഞ്ഞ ദിവസം കൊവിഡ് സ്ഥിരീകരിച്ച തമിഴ് ദിനപ്ത്രത്തിലെ ലേഖകന് ആരോഗ്യസെക്രട്ടറിയുടെ വാര്ത്താസമ്മേളനത്തില് സ്ഥിരം പങ്കെടുത്തിരുന്നു. വാര്ത്താ സമ്മേളനത്തില് പങ്കെടുത്തവര്ക്കായി പ്രത്യേക പരിശോധന തുടങ്ങി.
ചെന്നൈയിലും മധ്യപ്രദേശിലും മഹാരാഷ്ട്രയിലും മാധ്യമപ്രവര്ത്തകര്ക്ക് കൊവിഡ് ബാധ റിപ്പോര്ട്ട് ചെയ്തതിനെ തുടര്ന്ന് കൊവിഡ് ബാധിത മേഖലയില് ജോലി ചെയ്യുന്ന മാധ്യമപ്രവര്ത്തകര് ആവശ്യമായ മുന്കരുതലുകള് സ്വീകരിക്കണമെന്ന നിര്ദേശം കേന്ദ്രം പുറപ്പെടുവിച്ചു. കേന്ദ്ര വാര്ത്താ വിനിമയ മന്ത്രാലയമാണ് ഇതു സംബന്ധിച്ച നിര്ദേശം നല്കിയിരിക്കുന്നത്.
തമിഴ്നാട്ടില് ചെന്നൈ കഴിഞ്ഞാല് കോയമ്പത്തൂര്, തിരുപ്പൂര്, തേനി, തിരുനെല്വേലി എന്നിവടങ്ങളിലാണ് രോഗബാധിതര് കൂടുതല്. കോയമ്പത്തൂരില് 134പേര്ക്കും തിരുപ്പൂരില് 109 പേര്ക്കുമാണ് കൊവിഡ്.ചെന്നൈയില് ഇന്ന് 58 പേര്ക്ക് കൂടി രോഗം സ്ഥിരീകരിച്ചതോടെ കൊവിഡ് ബാധിതര് 1596 ആയി. പത്ത് ദിവസത്തിനുള്ളില് ചെന്നൈയില് മാത്രം ഇരുന്നൂറോളം പേര്ക്കാണ് കൊവിഡ് സ്ഥിരീകരിച്ചത്.